fbpx

Явни роботи и фахова пракса

автор влдї 4. авґуст 2016

У тей хвильки на евиденциї Националней служби за обезпечованє роботи, Филияла у Шидзе находза ше 3 308 особи. Медзитим, число нєзанятих и векше з оглядом на тото же єст и особи хтори нє евидентовани у спомнутей служби. Од яри по єшень, єдна часц нєзанятих зарабя на наднїци, а єст и таких хтори пошли робиц на три мешаци до державох Европскей униї, насампредз до Словацкей.

По словох Влайка Манойловича, координатора НСЗ у Шидзе, у тей хвильки 18 особи достали роботу на штири мешаци у рамикох такволаних явних роботох. Вони у тим периодзе буду робиц у ЯКП „Стандард”. Тото комуналне подприємство роками уж хаснує можлївосц анґажовац нєзанятих прейґ явних роботох. Вони углавним отримую комуналну гиґиєну, коша траву и отримую желєнїдло, як и на теметовох на погребних услугох. За їх анґажованє, односно плаци, средства по поли обезпечую НСЗ як и локална самоуправа.

Тиж актуална и фахова пракса, а осем особи дочасово достали роботу по тей основи. Слово о трох дипломованих економистох, двох дипломованих правнїкох и трох елетро инженєрох.

– Вони анґажовани на шейсц мешаци, а плацу им обезпечує локална самоуправа. Зоз високу фахову приготовку доставаю плацу 18 000 динари, висшу 16 000 и штредню 14 000 динари. То значни крочай у їх професийней кариєри же би здобули потребни практични и фахово знаня цо им олєгча же би нашли стаємну роботу-наглашує Влайко Манойлович.

През лєто „зацих”, кед слово о других файтох едукацийох, а уж концом септембра ше планує єдна едукацию – 13 месаре би требали здобуц теорийни и практични знаня и схопносци за тоту професию. Наш собешеднїк наглашує же будзе розписани тендер за виводзача едукациї хтора нє за познатого дїлодавца (за даяку клальню, або приватнїка), алє за тарґовище роботи та кед законча едукацию, годни конкуровац кед ше укаже потреба.

(Опатрене 65 раз, нєшка 1)