fbpx

Двацец пейц роки нєзависней України

автор юлиян тамаш 25. октобер 2016

Осем вики после Києвскей Руси и Галицко-волиньского князовства, Україна здобула нєзависносц. Тераз єй двацец пейц роки, мала би зложиц дипломски на животним универзитету по людских мерадлох. За историю то мало, и релативне, и практично нєзависносц ище нєстабилизована. У двох сталїнистичних вигладньованьох економски є вичерпйована и национална интелиґенция єй систематично знїщована, духовно и физично. Тота треца ґенерация интелиґенциї и цала українска крегка нация и єй держава, без огляду на численосц и цивилизацийни здобутки и природни ресурси, виложена державному тероризму Русиї.

Кед остатню войну нє витрима, тераз виложена русийскому империялизму, страци и трецу ґенерацию националней интелиґенциї и историйно щезнє. Путин отворено припознава же велька гришка розпад СССР, у хторим под интернационализмом кончена русификация. Остатня война медзи Русию и Україну отворено пробованє обновиц доминацию Русиї над териториями бувшого СССР. Кед патрице кого потримує, а то восточни деспотиї у Билорусиї, Сириї и Турскей, Русия и Путин маю улогу, хтору пред Другу шветову войну мала Нємецка з Гитлером. Мимикрия лєм софистициранша зоз дириґовану и контроловану нїби демократию и вецейпартийну систему.

Основне зло хторе знашло нєзависну Україну то вельки ступень русификациї. Кончи ю тераз нє комунистична партия, алє Русийска православна церква Московскей патрияршиї, корупция, и, буквално, по поли подзелєносц українского народу на национално освидомених и русификованих гражданох.

Нєсиґурносц хто цо дума, цо гутори а цо роби, лєбо є интимно порихтани зробиц. Так же война нє лєм тота медзи людзми. Вона ище вецей у главох.

Психолоґийно патраци, нєстабилносци сучасней України вельо допринєсол ткв. психолоґийни минимализем – задовольованє з вредносцами давних саґох, яки пановали по Шевченка, а то: дом, фамелия, Бог и жем – а окружую ю Русия и Польска, та и Турска и Мадярска зоз своїма психолоґийнима максимализмами, потребу и якеш нїби богомдане право пановац над другима народами. Єдино ше Шведянє ошлєбодзели од свойого психолоґийного максимализма, односно милитаризма и од теди починаю часи просперитету нордийских народох. А глїбша историйна правда же ше сувереносц народох и державох вше, нажаль, достава през крев власного народу, нїяк лєм за столом. Наздавам ше же українски народ тераз остатнїраз кирвави и же розорве малженство з Русию.

Кед слово о потенциялох хтори на боку України, я их видзим голєм штири.

У приватизациї векшину капиталу маю, заш лєм, Українци.

Природни ресурси и ступень индустрийней свидомосци сполнюю високи стандарди, и доступнєйши є експлоатациї як у Русиї, хтора жиє преважно на природних ресурсох и запшетей економиї, окрем високей технолоґиї, дзе по совєтским моделу од шицких нєрусийских народох бранї русификовани наймудрейши и найкреативнєйши кадри. Учебнїки хтори преважно на русийским язику мож заменїц з компютерами и зашпоровац вирубани українски лєси. Зоз польопривредних продуктох, цо оставаю кед родни рок, розошати по польох, мож правиц енерґенти хтори заменя нафту и ґаз.

Слабосци Русиї найменєй два. Китайци им предзераю з тунїма продуктами и конкурую з  нє лєм воєну, алє и цивилну технолоґию, прелїґню Русиянох. Друга слабосц Русиї – то же трецини нєрусийского жительства у Русиї припадаю два трецини етнїчни териториї, так же би ґеополитично два трецини русийских гражданох остали лєм на трецини своєй етнїчней териториї, з чим траца природни ресурси. На концу, ту и психолоґийна слабосц же и остатнї мужик и Солженїцин думаю же други народи маю робиц, а Русиянє пановац. Значи, проблем нє лєм русийски народ зоз своїм психолоґийним максимализмом, алє преважно русийски политични елити од царох по Путина.

Цивилизацийно патраци, без огляду на чежку прешлосц українского народу цо им нанєсла Русия, Україна блїжей Европи як Азиї. Точнєйше, ма и директни нордийски коренї у власним националним єству. То нє лєм швет вредносних ориєнтацийох характеристичних за саґи. То и, по моїм думаню, плодносц психолоґийного минимализма. Ґу ньому ше намагала найлєпша часц образованого чловечества и креативних поєдинцох. Гоч леґенда же Гесиод, поет мира и роботи, надшпивал Гомера, поету войни и воєних рентох, и то у дружтве геройского менталитету, смисел наших животох жиц у согласносци зоз природу, а нє знїщовац ю, бо од швета останє шмециско, а чловек здохлїна на нїм.

Цо бим особнє суґеровал политичним естаблишментом 25 роки нєзависней України, за нєшка и будучносц? Розорвец малженство з Русию и направиц чисти економски рахунки. Ошлєбодзиц ше емоцийох, чувац жридлово вредносци, а швет и його вредносци и здобутки доживйовац и чувствовац ше як у власним доме.

На питанє як ушориц державу и зачувац єй соборносц, ткв. єдинство, ту бим препоручел меняц Конституцию/Устав, та соборносц бранїц нє централистично и унитаристично, алє сом за соборносц од долу, значи децентрализацию и реґионализацию, як цо то зробели Финци, Нємци, Швайцарци, Шпанци, а буду мушиц и Русиянє, та и Українци. Сербия тиж. Почитованє розликох у управянє з розликами, нєнасилне, вше продуктивнєйше од насилного єдинства и геґемониї. Клонирац чловечество, лєбо єден народ, нїч инше алє мертве морйо, та гоч клонираце и найлєпши прикладнїк єдней файти.

Становиска висловени у тим тексту виключно авторово и нє вше одражую ушорйовацку политику новинох „Руске слово”

(Опатрене 62 раз, нєшка 1)