Модерни писанки

автор фес, фото вев 14. април 2017
DSC_0078

Од давен-давна познате же вайцо вични символ плодносци и живота, символ любови и радосци. Без писаня писанкох, фарбеня и прикрашованя вайцох, чежко же мож задумац Вельку ноц. У нашим народзе писанє писанкох ше преношело з колєна на колєно, прето ище вше популарни стари технїки. И нови технолоґиї нєшка нє мож занєдзбац, та вам понукаме и цошка сучаснєйше.

Уварени вайца ше кладзе до уж порихтаних готових фарбох, з кус есенцу, и нєт тей ґаздинї хтора так дакеди нє фарбела.  Так офарбени вайца ше вола фарбянки, а писанки ше пише, но ридко хто нєшка так и гутори. Частейше учуєце же дахто фарби писанки, та гоч их  пише, малює, дзиркави, украшує…

Офарбени писанки нє вше випадню таки яки их ґаздиня задумала пред тим як почала тоту роботу. То нє раз завиши од фарбох хтори сце купели на пияцу, або у дутяну. Прето кед можеце даґдзе купиц квалитетнєйши фарби, як наприклад у  дутяну здравей поживи, або специялних дзе ше предава фиґури и прибор за торти и колачи, можеце буц сиґурнєйши же и писанки буду красши.

ТРАДИЦИЙНЕ, А КУС ИНШАКЕ

Тоти цо  одлуча фарбиц писанки з природнима фарбами, здогаднєме же  цми кафово писанки буду теди кед ше у добре увареним соку з цвикли (вари ше добру годзину) положи вариц вайца дас 10 минути.

Печинково писанки буду кед ше тиж коло 10 минути варя вайца у  води у котрей пред тим уварени цибульово лїсца, а жовти писанки достанєце кед до литри води положице 4 ложички кария (индийска присмачка) и охабице най добре превре.

Кед же з рока на рок фарбице писанки у цибульовим лїсцу, чисти, або з бетелїну у ботоши, предкладаме же би сце их порихтали кус иншак, та достанєце прекрасни мраморово, або таркасти писанки, хтори на тaнєру прекрашнє випатраю.

Треба пошекац цибульово лїсце и мокре вайцо оваляц у нїм,  добре закруциц до ґази або ботоши и вариц у цибульовей, або води у хторей хторей сце пред тим уварели цвиклу.  Будзеце барз задовольни!

Дакеди ше писанки виписовало зоз кичицу, або з гушим пирком, а нєшка єст наисце тельо технїки, и идеї поготов на Фейсбуку, же „дакеди” и  „нєшка” нє мож прировнац. З воском треба знац писац, и наисце треба мац сцерпеня, но познате же  вельконоцни стол з такима писанками барз крашнє випатра, алє и теди кед  є украшени з видутима вайцами, т. є. празну шкарупину на хторей видзирковани, вибилєни вайца як чипочки. Таки су красни як стари, били, штиковани партки. Дзепоєдни жени у тим прави майсторици, облєкаю шкарупину до плаценкох, прикрашую з  пантлїчками и перлочками…

ПИСАНКИ У ПЕНИ ЗА БРИТВЕНЄ

Нєшка наисце мож офарбиц писанки на сто способи, и дзеци ше тей роботи барз радую. Но, фарбенє писанкох зна буц и стресне поготов младим мацером, бо нє шицко єдно кед на шпоргету и столє даскельо шерпенки з горуцу воду, а дзеци би шицко сцели видзиц, знац и дотхнуц. Прето предкладаме єдну новшу технїку фарбеня у хторей и дзеци и мацери, алє и баби, годни буц на мире. Нїч нє пече, креативне и красне…

Потребне: вайца, пена за бритвенє, есенц, древена палїчка, рукавици, ручнїчок и фарби.

ВИБИЛЄНИ ВАЙЦА

Найлєпше кед пред тим як почнєце робиц, вайца добре вибилїце.

До меншей шерпенки положце 10 вайца, патьце так же би нє були барз жимни, праве з фрижидера виняти, бо знаю попукац. Нє добре анї кед су барз швижи. Налєйце єден погар води и погар есенцу, уключце най превре, алє меркуйце най нє барз вре, бо и вец вайца знаю попукац. Док сциха вре (10 минути), знїмайце пену, а вец сциха одлєйце горуцу воду, налєйце жимней и кажде вайцо зоз шпунджийку очухайце. Меркуйце, бо вибилєни вайца маю ценшу шкарупину!

DSC_0001

Кед вайца вибилєни, можеце их почац фарбиц.

До танєра, або мисочки, висцискайце пену за бритвенє и посипце по нєй фарби такей яки маце, и можеце комбиновац. Наприклад – жовту, желєну и помаранчецову окреме, а окреме, у другей мисочки белаву, целову и лилову. Ту себе дайце на волю, можеце експериментовац як лєм сцеце. Вец з древену палїчку правце „осмички” по тей пени и у тим оваляйце охладзени и вибилєни вайца. Покладзце их на окремни „убрус” лєбо ручнїчок и причекайце 15-20 минути. Вец их посцерайце, намасцце з олєйом же би ше блїщали и увидзице и сами як ше будзеце у нїх цешиц. Добре тото же ше з офарбену пену мож бавиц, тото можу робиц и дзеци, а нє опечу пальци. Пре чисти руки, заш лєм совитуєме же бисце вайца у пени окруцали у ґумових рукавицох.  На фотоґрафийох мож видзиц цали поступок.

И кед сце так крашнє офарбели писанки, остава лєм украшиц попораєне обисце, справиц даєдну икебану, и на нєдзелю, вєдно з писанками и вельконоцним єдлом положиц на вельконоцни стол.

 

(Опатрене 80 раз, нєшка 1)