Танцуєм прето же любим

автор тамара салаґ 23. май 2017
Novi Sad 24.03.2017.  Nikola Stamenovic Ivan Salonski Aleksa Zigic baletska skola baletani foto Robert Getel

 

Иван Салонски зоз Нового Саду вецей як дзешец роки танцовал у Клубу „Болеро” и два роки у Клубу „Алеґро”. То клуби у котрих ше танцую спортски танци, котри Иван танцує од свойого пиятого року. Вон хвильково школяр штвартей класи Балетскей школи у Новим Садзе и планує пойсц на студиї до Русиї.

До спортских танцох спадаю Латиноамерицки танци, як цо Самба, Румба, Ча-Ча-Ча, Пасо добле и Джайв, и Стандардни танци, як цо Анґлийски валцер, Бечски валцер, Танґо, Слов фокс и Квик степ.

– Хвильково нє танцуєм анї у єдним клубу, прето же моя партнерка Сташа нє у Сербиї, алє є на студийох у Москви. Сташа и я вельо роки були танєчна пара, а тиж зме були и водзаца пара у „Болеру”. Тренирали зме обидва файти танцох, алє после вецей рокох тренираня, опредзелєли зме ше за Стандардни танци. Пари котри ше озбильно занїмаю з тим, як дорастаю, вони так вибераю котру файту танцох буду танцовац, т. є. на котру ше буду баржей фокусовац. Добре би було танцовац обидва файти танцох, алє за то потребне вельо часу, одреканя, а и пенєжи. Опредзелєл сом ше за Стандардни танци, прето же за мнє особнє, то дацо прекрасне, елеґантне и ґрациозне. Док танцуєм любим тото чувство лєгкосци, а и крашнє випатра кед два цела танцую як єдно – толкує Иван.

УСПИХ ТВОРИ ПРАВА ПАРА

Иван мал вельо успихи у спортских танцох. Ище як початнїк бул вицешампион у Сербиї, а тота ласкава титула ше му ошмихла ище раз, а тиж освоєл и треце место у Сербиї. На медзинародним змаганю „БеоДенс Опен”, у Беоґрадзе, зоз свою партнерку Сташу вошол до финалу и освоєли штварте место. После тих посцигнутих наградох були у репрезентациї Сербиї, а тиж були и делеґовани зоз ище єдну пару на Европске першенство у Шпаниї. То було єдно барз вельке, приємне и красне искуство за нїх.

IMG_3323– У Русиї зме 2014. року були штернац днї у кампу репрезентациї. Штернац годзини дньово зме були у сали за тренинґи, цо було барз усиловне. Медзитим, без огляду же нам кажди дзень бул усиловни, после каждого тренинґу зме були задовольни зоз тим чувством же знаме цо зме зробели за цали дзень и же зме  научели дацо нове.

То було ище єдно хасновите искуство за нас, после котрого зме вельо напредовали – гвари Салонски.

Попри шицких тих зазначених успихох, Иван бул финалиста и на других вельочислених змаганьох и вше ше пласовал медзи перши три места. Медзинародни змаганя му нє нєпознати, наступал и у Македониї, Словацкей, Ческей и Босни и Герцеґовини.

ВЕЖБАЦ ДО ПЕРФЕКЦИЇ

Иван попри тренираня спортских танцох, рушел и до нїзшей Балетскей школи. После нєй, жадал уписац сучасни танци у штреднєй Балетскей школи у Новим Садзе, медзитим уписал класични балет.

– Професорка балету видзела мойо предиспозициї и конституцию и посовитовала ме же бим заш лєм уписал класични напрям, и то сом и зробел. Барз сом задовольни и прето сом єй подзековни на тим – гвари Иван.

Млади танєчнїк през шицки штири роки учи рижни файти танцох. Класични балет му главни предмет, а коло нього ма сучасни танци, дуетни танци котри спадаю до класичних танцох, характерни танци цо уствари народни танци странских народох и сербски народни танци. Коло танцованя, маю и други предмети. Ґлуму и вокал, историю танцу, дзе уча наставанє балету и його розвой и други общеобразовни предмети.

– У Балетскей школи досц усиловно, з оглядом же маме днї кед зме по цали дзень у школи, як кед бизме уж були на факултету, а попри того идземе и всоботу до школи. Кажди дзень маме даєден од танцуюцих предметох, а коло нїх маме и общи предмети. Главни предмет, а мнє то класични балет, маме шейсц раз у тижню – толкує Салонски.

Кед ше рихтаю за рочни концерти, днї у школи им ище усиловнєйши. Маю части проби, а ходза и до Сербского народного театру, поготов хлопи, бо су обовязни на пробох, то им якашик файта пракси.

– Ми як балетанє мушиме мац одредзене облєчиво котре ношиме на годзини и проби. Потребне облєчиц узки шмати, т. є. дреси и геланки, же би професорка видзела кажди рух цела и же би могла видзиц чи ше правилно роби, а, медзи иншим, и же би нам було приємно и шлєбодно у нїх. Попри того маме окремни балетанки, а дзивки маю шпиц патики – гвари Иван.

DSC_9475

Кажди други рок Здруженє музичних и балетских школох орґанизує републичне змаганє за шицки три напрями, класични балет, сучасни танци и народни танци. Ту школяре указую свою музикалносц и схопносц у танцованю, т. є. тото цо порихтали у своїх уметнїцких школох. Иван 2016. року освоєл треце место на тим змаганю.

Кед бул младши, Иваново товарише з початку нє могли розумиц тото з чим ше вон занїма, алє з часом ше звикли и тераз го потримую у тим цо вон барз люби, а то – танцовац.

После Балетскей школи, Иван може предлужиц свою кариєру у театру, алє вон дума же є ище нє досц дозрети за тот крочай, та дальше школованє сце предлужиц у Русиї, у Москви, на Балетскей академиї „Московского державного институту култури” дзе студира и його партнерка Сташа.

– Достал сом стипендию од Русийского министерства просвити, и уж ше навелько рихтам за примаци испит, алє за ньго ше ище вше нє зна кеди будзе отримани. Скорей примацого испита, отримую ше консултациї у Русиї, на академиї, на котри я мушим пойсц, їх фаховци видза на котри способ я робим, роздумуєм и паметам, и за тото доставам додатни боди. Цо ше дотика самого примацого испита, вон ше состої зоз вецей часцох. Перша часц випатра так же ми задаю даскельо балетски вежби на палїци, потим таки подобни вежби мам робиц на штред сали без помоци палїци, и скоки котри треба же бим успишно одробел. У другей часци робим балетску варияцию котру сам рихтам и вец мам одредзени период за котри треба же бим здумал свою хореоґрафию на музику котру ми вони обдумаю. На самим концу испиту, випитує ше история русийского балету, же би ше видзело кельо сом информовани о уметносци балету у Русиї – толкує Иван.

Иван ше пририхтує так же попри школских годзинох ходзи и на додатни годзини балета, бо є перфекциониста и дума же му у школи нє досц вежби же би ше добре пририхтал за примаци испит и же би ше там указал найлєпше як може.

10492983_1138365586207878_1901614283480216336_o