fbpx

Инвалидносц и мотивация и спокуса

автор але 2. юний 2017

Здруженє шлєпих и слабовидих хторе роби на териториї општинох Вербас, Кула и Оджак попри почежкосцох у финансованю и составе членства ма барз значни резултати, окреме у ґуґланю. Тройо шлєпи и слабовиди ґуґлаше репрезентативци Републики Сербиї, а на їх витирвалосци и моци на тренинґох би им могли позавидзиц велї спортисти.

Мара  Горняк зоз Коцура, Миодраґ Вуканич и Владо Милович зоз Вербасу ше змагаю у трох катеґорийох шлєпих и слабовидих. У катеґориї Б1 ше змага Мара Горняк хтора цалком шлєпа, у Б2 катеґориї ше змагаю особи зоз барз чежким очкодованьом вида дзе и Миодраґ Вуканич, а у трецей катеґориї, Б3, ше змага Владо Милович хтори слабовиди. Вони тройо републични и европски шампиони у ґуґланю и тренираю у ґуґлани Центра за физичну културу „Драґо Йовович”. Тераз ше пририхтую за европске першенство за шлєпих и слабовидих у Апатину хторе ше отрима од 29. мая по 4. юний. Предсидатель Здруженя, Миодраґ Вуканич зоз Вербасу, гварел же им активносци хтори орґанизує Союз шлєпих и слабовидих Войводини и Сербиї барз важни и нє препущую анї єдно змаганє, спортске и кажде друге.

МИОДРАҐ ВУКАНИЧ И ВЛАДО МИЛОВИЧ

– Од локалней самоуправи з Вербасу зме достали безплатно хасновац ґуґлану за нашо тренинґи, а можеме и задармо ходзиц на жимски базен. Ґуґланє тренираме трираз до тижня и тота рекреация нам барз значи. Шлєпи и слабовиди кажди дзень жию у цмоти, а активносци нам даваю шветло у живоце – гварел Вуканич.

Владо Милович єден зоз европских шампионох у ґуґланю за Б3 катеґорию и гвари же ше часто їх ґуґланє третира як рекреация, цо цалком погришне.

– Ми ше єднак пририхтуєме як и други ґуґлаше. Пред тренинґом маме зогриванє  15 минути до пол годзини. По числу „звалєних” бабкох ми нє барз далєко од ґуґлашох у порядней  катеґориї. Кажде з нас руца кулї раз и вец ознова приходза нови бабки, руцаме штири раз по трицец кулї, значи 120 руцаня кулї маме на єдним тренинґу. Сиґурно же нам чежше, бо наша технїка муши буц совершена. Бабки нїхто з нас нє видзи кед их руца. Б2 и Б3 руцаче сами уходза на пантлїку, а Б1 ма свойого додавача кулї и руца з места. Я у Б3 катеґориї и руцам зоз трома крочаями, сам, без асистента, як и порядни ґуґлаше, гоч анї пантлїку нє видзим цалком – гварел Милович.

Здруженє шлєпих и слабовидих иснує од 1965. року, а остатнї даскельо роки роби у тих трох општинох. Ма коло 120 активних членох и одприлики по 30, 40 єст зоз каждей општини. Здруженє ше, окрем у ґуґланю у хторим су найуспишнєйши, змага и у других дисциплинох, у шаху, рецитованю, писаню, алє и окремних змаганьох за шлєпих, у хаснованю рахункара, дисциплинох хтори им помагаю же би звладали каждодньово спокуси… У тей хвильки нє маю свойо шедзиско, збераю ше по обисцох, або у ґуґлани Центра за физичну културу, дзе и вежбаю.

МАРА ГОРНЯК З КОЦУРА

Шицко робя волонтерски, а секретарка Лїляна Драшкович хтора нє ма почежкосци зоз видом водзи Здруженє, помага им у пририхтованю, вожи их на манифестациї и змаганя и добродзечни є асистент членом хтори цалком шлєпи, та и Мари Горняк зоз Коцура.

– Вона барз систематична и орґанизована. Мнє ше сто раз трафело же сом дацо забула або затрацела ключ, телефон, а єй ше то нє може случиц. Практично, шицко роби сама и нє люби кед єй ше помага вецей як треба. Люби буц самостойна и твориц позитивну атмосферу у екипи. Вона дакеди ма вецей моци, мотивациї и самодовирия од людзох хтори нє маю нїяки почежкосци – гварела Лїляна.

DSCF1470

(Опатрене 60 раз, нєшка 1)