Заєднїцка любов ґу природи

автор сaс 9. юний 2017
Djurdjov lovare dzeci

Ловаре з Ловарского дружтва „Дюрдьов” зоз Дюрдьова за найстаршу ґрупу дзецох зоз валалскей Предшколскей установи „Дюрдєвак” пририхтали друженє. Вони там мали нагоду упознац ше зоз ловарами, видзиц котри животинї ловя, як випатра ловарски пес, алє и найважнєйше, питац им ше гевто цо их интересує.

Дзеци привитал предсидатель Дружтва Влада Остоїн, котри им указал трофеї – роги зоз дзивини и препарировану главу дзивей швинї. Бешедовал им же на яки способ ловаре помагаю природи, животиньом и людзом, та и прецо значне отримац природни баланс. Алє, так же би и вони розумели, наприклад – кед єст барз вельо заяци котри любя капусту, нє було би досц сарми за людзох.

Пред приходом ґу ловаром, воспитачки дзецом бешедовали хто ловаре и яку маю улогу у дружтве, а вони вец шицко тото и преверели, бо на стретнуцу були любопитлїви, а єдно з интересантнєйших питаньох було же чи ловаре хасную лук и стрилу.

З чим ловаре найчастейше ловя, указал Драґан Живанов, управнїк ловиска, а о своєй любови ґу животиньом котру указоввал одмалючка, цо потвердзели и присутни воспитачки з ПУ, бешедовал наймладши ловар у дюрдьовским Ловарским дружтве Душан Живанов.

Дзеци ше найбаржей зрадовали кед ловарскому псови руцали мету, з котру ловар учи пса же би лапал уловени плєн. Як ше учи пса, бешедовал ловар Влада Горняк, указал на себе яки шмати ноша ловаре, алє и чом значне мац пирко на ловарским калапу.

Вон указал и як ше патри през двогляд, цо пробовали и дзеци. На концу друженя, вони од ловарох достали рисунки дзивих животиньох и крейдочки за фарбенє, а свойо роботи з Установи на тему ловаре подаровали своїм домашнїм. 

Ловаром з того Дружтва то нє перше друженє з дзецми. Пред даскельома роками, зоз школярами старших оддзелєньох з валалскей основней школи, вони читали дзивину у хотаре. Акциї були задовольство шицким, та як гварели ловаре, буду ше намагац же би вони були частейши.