Велька руска фамелия путує по Горнїци

автор тамара салаґ, фото иван канюх 16. юний 2017
20170527_123706

После розписаного конкурсу Роботного цела за младеж, за одход до Словацкей, почала сом роздумовац чи ше приявиц и препущиц такей авантури, чи забуц на тоту идею и уцагнуц главу ґу обовязком на факултету.

Нє роздумуюци вельо, вибрала сом першу вариянту, бо, тоти обовязки ме причекаю и познєйше. Приявела сом ше за екскурзию и после даскелїх дньох, достала сом потвердзуюци мейл, у котрим розтолковане же сом єдна од осмерих котри пойду на екскурзию до Словацкей. Щесца нїґда конца.

Пришол и тот дзень, куфри позаверани. Товаришка котра тиж ишла на екскурзию, рано 26. мая, на пейц годзин, зоз оцом, зашла по мнє на авту. Потим зме позберали и нашу „мисицу” зоз Дюрдьова, та так почало нашо путованє,

алє, за початок, по Руски Керестур. На догварене место зме сцигли кус скорей, та зме чекали других най сцигню… Розуми ше у авту, бо на шейсц годзин рано ище нїч нє роби – даяке место дзе би зме, наприклад, могли попиц кафу, док чекаме екипу. Помали почали сциговац и други, кед зме були шицки „на числу”, важне було висликовац ше ґрупно, а потим зме ше змесцели до комбия и авта и рушели на далєке путованє. Путованє ше на хвильку застановело, бо зме станули у Бачкей Тополї позберац ище єдну нашу авантуристку. Но, такой зме предлужели далєй.

Мали зме щесца же на гранїцох нє були гужви, алє зме нє мали щесца же гранїчар нє бул найлєпшей дзеки… Алє, и то прешло, и вишли зме зоз Сербиї. У комбию, дахто спал, дахто приповедал, слухал музику, патрел през облак на красни предїли… и вец би ше у єдней хвильки лєм шицко тото претаргло. Пауза. Порозцаговали зме ноги и хрибет, „поцвенкали” зоз апаратом, поєдли сендвичи и предлужели путованє.

А ПРЕД НОГАМИ СЛОВАЦКА

После шейсц, седем годзинох путованя, сцигли зме на перше нашо одредзиско, Кошице. Мали зме дакус часу пообиходзиц тото место. Найвекши упечаток на мнє

охабел парк у котрим прекрасна фонтана и вельки дзвони котри „випущовали” познати мелодиї. Коло тей фонтани на лавочки шедзел єден дїдко зоз квецом у рукох, котри вироятно чекал свою бабочку. Нє дочекали зме бабочку, бо зме уж мушели рушиц и предлужиц далєй нашо путованє, же бизме сцигли на фестивал до Свиднїку. Вшелїяк, сцигли зме до Свиднїку и до нашого змесценя котре було єдно вельке „обисце”, зоз вецей хижами. Були зме як права фамелия. Кус зме ше ошвижели, и нє мали зме часу анї одпочивац, назад до комбия. Тото место, дзе ше отримовало Русински фестивал, було на пейц минути воженя од нашого змесценя. Вишли зме зоз комбия, и я ше такой оглядам, розпатрам… препознавам тото место. Тоти исти ґарадичи и лавки за публику котри ше пресцераю так високо, на горе, и тоту исту вельку сцену, видзела сом и пред даскельома роками кед сом була ту танцовац зоз КУД-ом „Тарас Шевченко” зоз Дюрдьова. Памятки…

Того вечара зме нє видзели вельо зоз репертоару, алє и тото цо зме видзели т. є. чули, а то Мариан Чековски зоз своїм бендом, було нам цалком досц. Прекрасни гласи, прекрасна музика нас наисце порушали и уживали зме з нїма. Медзитим, тото шицко претаргнул диждж. Розбежали ше людзе, та и ми сцекли до нашого „обисца”. Кус зме ше дружели у заєднїцкей дньовей хижи, алє то нє тирвало длуго, бо зме уж були барз вистати и сцели зме ше одпочинуц од длугого путованя. Рано швитло, фриштик на столє. А ми предлужуєме нашу авантуру. Собота випланована так же после фриштику пойдземе до Етно валалу Сканзен, у Свиднїку, а потим до Медзилаборцох. Навечар нас ознова чека фестивал.

У авту зме, план дойсц до места Медзилаборци, мнє випатра як права вичносц, горуцо, вистати зме од того силного путованя. Алє, обецую же пойдземе нащивиц музей Ендия Ворхола, та сом прето щешлїва, понеже кед сом була ту пред даскельома роками, музей бул заварти. Кед сом вишла з музею, упечатки ми були красни и перша думка котра ми спадла на розум була: „Ендийова уметносц наисце интересантна и єдинствена”.

20170527_123941

Пицааа… кратке одпочиванє зоз супер екипу, пицу и словацким, найлєпшим пивом у єдним ресторану, нєдалєко од музея. У ствари, з оглядом же нас було вельо, кухарки нє сциговали направиц каждому вечеру, та дахто вечеру спаковал и єдол у драже, а ми уж „лєцели” назад до Свиднїку, бо гат, дораз почина змаганє за найкрасшу Русинку, односно MISS WORLD.

РУСИНСКИ ФЕСТИВАЛ И МИС ШВЕТА

Док шицки нєсцерпезлїво чекаю спектакл на сцени, забавяю нас „Бабово унукове”, хлопска ґрупа зоз Русиї. Прекрашнє шпивали, була сом одушевена з нїма. И ниа, виходза єдна по єдна мисица. Публика одушевена, кляпка, навия, вшелїяк, зна ше хто бул найгласнєйши. Гоч я нє участвовала у виборе и нє була сом на сцени, алє сом мала трему, як кед бим була. Кед ше уж

приблїжовал конєц програми, думам же шицки були вше баржей и баржей возбудзенши. Хто же будзе Мис? Преглашованє почало иии… єдна з наших треца, т. є. друга вицемис, а за найкрасшу Русинку преглашена дзивка зоз Ческей. Но добре, освоєли зме голєм дацо и прето ше барз пишиме зоз нашу Яну, а вшелїяк и з

другима котри мали шмелосци приявиц ше на таке змаганє. После преглашеня шлїдзела преслава. У шатрох, котри були поставени нєдалєко од оградзеного простору, дзе ше отримовало Фестивал, дружели зме ше и з

другима Руснацами, котри нє зоз Сербиї, єдли зме

ланґош, куртош колач и було наисце крашнє. Вшелїяк же було красне чувство кед ши ше чувствовал як дома. Словаци єден добри, дружелюбиви и госцолюбиви народ. Мило ми було же сом мацерински язик могла бешедовац и там, гет од свойого власного дома.

После наисце напартей ноци, и краткого сна, предлужели зме далєй обиходзиц Словацку. Внєдзелю зме нащивели Бардейов. То єдно прекрасне и мирне место, котре вредзи пойсц опатриц. Зазначели зме и ту

даскельо фотоґрафиї, же бизме их мали за памятку, та назад до Свиднїку. Того вечара на фестивалу грали „Русин Чендеш орхестра”, котри и заварли тогорочни Русински фестивал. После

шицкого того, думам же шицки уж були барз вистати и врацели зме ше до нашого велького „обисца”. Як остатню ноц, нормално, мушели зме направиц дацо як одпитуюци вечар. Направели зме заєднїцки караоке парти-журку, цо думам же кажде з нас будзе паметац.

ДРАГА ДО ДОМУ

DSCF1201Пришол и тот дзень, пондзелок 29. май, конєц нашей екскурзиї. Ознова ше куфри завера, алє тераз ше врацаме назад дому. На драги до дому, за сам конєц, зашли зме ище и до Прешова. Нащивели зме Крайов музей дзе зме дознали историю Прешова, а и дознали зме дацо вецей о Руснацох у тих крайох. И нормално, як пойсц дому, без голєм єдного маґнету з путованя? Авантура и путованє ше помали змесцую до окремного места у паметаню, а зоз ошмихом ше их будзем вше здогадовац. Врациц ше мушиме, бо нас обовязки чекаю, а окреме тоти на факултету. Зоз полнима шерцами, новима

товаришами и дожицами, врацаме ше назад до Сербиї. Дзекуюци орґанизациї Роботного цела за младеж зоз Националного Совиту Руснацох, односно Сашови Сабадошови, Сонї Гудаковей и Иванови Канюхови, барз зме ше крашнє препровадзели на тей екскурзиї, уживали зме и будземе ю наисце завше паметац.

Рано кед сом ше зобудзела у своєй хижи, и почала бешедовац з мою фамелию дома на руским язику, теди сом похопела же як то фино кед пойдзеш аж до другей держави и можеш ше гоч ґу кому озвец на своїм мацеринским язику, вони це буду розумиц. Чи то було у предавальнї, чи у ресторану, чи у музею, чи лєм преходнїкови на улїци.

УПЕЧАТКИ ЗОЗ ЕКСКУРЗИЇ

Инес Шайтош, Нове Орахово:

– Мнє було крашнє на екскурзиї, лєм же могла и кус длужей тирвац. Занавше будзем паметац нови товаришства котри сом упознала.

Йован Живкович, Руски Керестур:

– На екскурзиї ми ше найбаржей пачело тото же зме обиходзели велї места, як цо Медзилаборци, Прешов, Бардейов. Упознал сом баржей руску културу, алє и културу Словацох, як и историю котра ми була барз интересантна. А вшелїяк же ми ше пачели и мисици.

Єлена Кухар, Нови Сад:

– Екскурзия ми ше барз пачела. У найкрасшим паметаню ми останє нашо друженє и Русински фестивал котри бул наисце барз крашнє обдумани и орґанизовани.

Тат’яна Буила, Коцур:

– Барз сом задовольна як прешла екскурзия и вшелїяк же бим любела кед би ше таке дацо повторело. Пачело ми ше як зме представели нашу жем на вибору за Мис, алє ми и други мисици були интересантни. Навияла сом за нашо дзивки, зоз Сербиї, а нарок будземе мац вецей щесца.