Нєизвесна судьба Клуба

автор мар 16. юний 2017
Rusin 24

ФК “Русин” закончел сезону на шестим месце Подручней лиґи Зомбор – Бачка Паланка. То иста позиция на таблїчки з хторей и почали тоту полсезону.

Од кеди оформена Подручна лиґа Зомбор – Бачка Паланка, ФК „Русин” наишол на пременки, то моцнєйша лиґа, алє є праве „по мири” Русина. На змаганьох ше стретаю з екипами котри добре бавя, з клубох котри лєпше финансовани, а финансиї нашого домашнього клубу стоя под знаком питаня.

– Обставини у ФК „Русин” чежки, насампредз пре нєдостаток средствох котри нам того року зменшани, тераз кед нашо трошки ище векши. Конкуровали зме за средства зоз прешлорочного самодоприносу, алє достанєме менєй як цо нам потребне. З нїма зме годни подмириц трошки отримованя и орґанизованя змаганьох. Кед же самодопринос нє будзе вигласани за наступни период, ми останєме и без тих средствох, прецо поцерпаме за судьбу Клуба – дознаваме од тренера русинових фодбалерох Златка Саянковича.

Бавяче творя тим котри гармонично функционує, гоч су свидоми новонастатей ситуациї. До новей сезони штредком авґуста войду ощербени за двох–трох бавячох котри направя павзу пре приватни обовязки, но ту младши фодбалере котри бавя на завидним уровню.

Сезону закончели зоз освоєним 41 бодом, на трицец одбавених змаганьох, од котрих 11 побиди, 11 страцени и 8 нєришени резултати. Под час тей полусезони дали 48 ґоли, а прияли 49.

МЛАДИ ФОДБАЛЕРЕ НОВА НАДЇЯ

Половка фодбалерох релативно млади бавяче, а за собу маю красни успихи. Клуб пре слабу финансийну ситуацию уж давно нє видвоєл средства за дреси або копачки, а нє мож обчековац анї же тоти трошки буду зношиц млади хлапци котри бавя з любови ґу лабди. Як дознаваме од тренера Русиновцох, єдина потримовка му директор клубу Александар Кочиш, медзитим проблеми и цалу ситуацию нє можу ношиц на плєцох лєм их двоме.

КЕРЕСТУРЦИ ВИРНА ПУБЛИКА

На змаганьох у Керестуре вше єст од 150 до 200 патрачох, од наймладших та по найстарших, пензионерох. Зоз трибинох мож чуц гласне кляпканє и скандированє. Без огляду чи процивнїк Русину високо ранґовани, чи остатнї на таблїчки, публика вше ту. На госцованьох єст Русиновей вирней публики, дакеди аж и вецей як домашнєй.

Тренер ФК “Русин”  Златко Саянкович

Тренер ФК “Русин” Златко Саянкович