Проблеми будовалїща ришую сами

автор сас 29. юлий 2017
8

Пре поставянє канализацийней мрежи Жабель–Дюрдьов гражданє Дюрдьова у Улїци Солунских добровольцох маю проблеми пре злєгованє жеми. Гоч волани и инвеститор и инспекциї, ище вше нїч нє ришене.

Вибудов канализацийней мрежи започата 2010. року. У децембру 2015. року предлужена вибудов єдней часци мрежи у Жаблю и поставянє поцискуюцого цивоводу од Жаблю, през Дюрдьов по єдней часци главней улїци на крижней драги зоз Улїцу Солунских добровольцох, вонконцом по Девень у хотаре, дзе будзе пречисцовач. Медзитим, о пейц мешаци пре нєскладанє проєктней документациї зоз станом на терену, медзи Дюрдьовом и Жабльом, кадзи ма буц поставена часц канализацийней мрежи робота застановена и будовалїще заварте. О пол рока, у новембру 2016. року терен випитани и направени вименки у проєкту, алє роботи нє предлужени. Одтеди та потераз даєдни гражданє у Улїци Солунских добровольцох ше пробую вибориц за свойо право.

(НЄ) МУШИ ШЕ ВРАЦИЦ НА ПЕРШОБУТНИ СТАН

Пошвидко по завераню будовалїща, даскельо метери опрез хижох дзе под жему поставени циви од канализацийней мрежи, жем и бетонски плочи ше почали злєговац. Виводзаче роботох мали обовязку висликовац кажде обисце и випатрунок опрез нього, и врациц на першобутни стан. Нє врацене шицким, а даєдним ше злєгли и мосцики. Гражданє ше з таким проблемом явяю до Управи у Општини Жабель, а вони контактую надпатрача того проєкта АД „Войводинапроєкт”, гварел Милорад Трґич, член општинскей ради задлужени за инвестициї и сотруднїцтва зоз фондами у чиєй компетенциї тота вибудов.

– Будованє застановене кед ше обачело же ше у часци кадзи требали буц поставени канализацийни циви находза рижни поджемни инсталациї. Проєкт написани пред седем роками, та зме мушели випитац терен. Средства за предлуженє роботи єст, чекаме законченє даскелїх процедурох и согласносц финансиєра. Обчекуєме же ше роботи першей  и другей фази закончи у тим року – гварел Милорад Трґич.

ВИТИРВАЛИ ЗА ПРАВДУ

Медзи витирвалшима за правду и право Мирела Рац, жителька спомнутей дюрдьовскей улїци. Вона ше длужей як рок намага вибориц же би ше им вибетоновало мосцик. Прето сама мушела похопиц же цала система и функционованє роботох на канализациї, дознала хто виводзч, хто подвиводзач, чия яка робота, яки длужносци, алє у бешеди з нїма нє наиходзела на порозуменє.

Мирела Рац

Мирела Рац

Пред тим, на вецей заводи, о тим проблему єй супруг Синиша Рац пробовал побешедовац з предсидательом Општини Жабель. Нє удало ше му, а о даскельо мешаци дознал же вони нє можу врациц мосцик на першобутни стан, бо нє маю машини за бетонованє. Медзитим, после одредзеного часу им понукли же го вибетоную.

– Нє завадза нам же знїщели єдну часц мосцика, вони робели свойо, алє най го оправя таки яки и бул, бо маме чежку механїзацию и тот мосцик муши буц моцни, груби бетон, а то видно и на часци котру нє розбили. Супругови Синишови понукали же би подписал контракт за бетонованє, алє з ценшого бетону – гварела Мирела Рац.

ПОШЛЇДОК НЄСОВИСНЕЙ ВИБУДОВИ

Пошвидко по завераню будовалїща почали сезони польопривредних роботох, дзири ше почали баржей злєговац. Свидома же нє може ришиц проблем, Мирела под насловом „Пошлїдок нєсовисней вибудови канализацийней мрежи” 14. юния прешлого року информовала и Министерство будовательства, транспорту и инфраструктури. У прилогу им послала и фотоґрафиї улїци.

– Одвит ище вше нє сцигол, алє такой теди, 6. юлия, значи, прешлого року до нас пришол представитель виводзача роботох и општински будовательни инспектор котри ме гандровал чом сом нє пошла перше ґу ньому. Потолковала сом му же зме потали помоц у општини, алє нас нїхто нє сцел прияц – гварела Мирела Рац.

У маю прешлого року згорела єдна часц поджемней електро инсталациї, та ше теди у Рацових погубели велї апарати. Установене же згоренїско на часци дзе ше копало. Проблеми санировани, а дзекуюци Миреловей витирвалосци авто котри специялизовани за находзенє гришки на поджемней инсталациї заплацели подвиводзаче, фирма котра будовала канализацию у Дюрдьове. Велї проблеми Рацово потераз ришели зоз своєй кишенки.

Од теди ше поряднє информує при спомнутому општинскому инспекторови як напредую роботи. А, вони стоя.

ИНВЕСТИТОР, ПРОЄКТАНТ И КОНТРОЛОР

Инвеститор канализацийней мрежи Жабель–Дюрдьов Општина Жабель, проєкт написал Технолоґийни факултет Нови Сад, а роботу окончує Будовательне подприємство „Ґрадитель НС” з Нового Саду. Роботу фахово надпатра АД „Войводинапроєкт”.