Слаба потримовка за одвичательну роботу

автор сас 4. авґуст 2017
20

Прешлого року Добредзечне огньогасне Дружтво Дюрдьов наполнєло дзеведзешат роки од снованя, алє значни ювилей нє преславени як плановане – нє достати потребни финансиї, а проблеми у медзичаше ище баржей загрожели їх основну дїялносц

Добредзечне огньогасне Дружтво Дюрдьов тих дньох ма нови проблеми – понеже нє ма свойо просториї и хаснує општински, прешлого мешаца су поволани же би подписали подквартельошки контракт котри на мешац виноши 18 400 динари. Предсидатель ДОД Дюрдьов Ґоран Берич зоз тим поцагом бул револтирани и отворени вельки проблем.

Так, прешлого штвартку у просторийох Дружтва орґанизована схадзка на котрей присуствовали и представителє Огньогасного союзу Општини Жабель и член предсидательства Огньогасного союзу Войводини Синиша Шавия. У Општини Жабель єдино ДОД Дюрдьов нє ма свойо просториї, алє хаснує општински. Предсидатель ДОД Дюрдьов Ґоран Берич потолковал чом нє прилапює же закуп за просториї  бул 18 400 динари на мешац.

– Нє подписал сом контракт, бо Дружтво нє ма анї средства за основне функционованє. Кед бизме мушели плациц жедляренє, такой бизме ше могли загашиц. Розпитовали зме ше чи иснує можлївосц же би цифра була менша, або же бизме вообще нє плацели квартелїну. После вецей схадзкох з компетентнима з општинскей управи и представителями Оньогасного союзу Општини Жабель на схадзки Општинскей ради одлучене же ше нє наплацовало хаснованє просторийох ДОД Дюрдьов – гварел предсидатель того Дружтва Дюрдьов Ґоран Берич.

Нормално, у просторийох члени ше нє лєм сходза и радза о роботи и задаткох котри маю, алє ту и комплетна опрема и превозне средство за гашенє огня.

– ДОД Дюрдьов, як и шицки огньогасни Дружтва гумана орґанизация, финансує ше з општинского буджета, та би наплацованє закупу општинского простору нє було лоґичне, бо општина дава и бере назад средства – гварел предсидатель Оньогасного союзу Општини Жабель Синиша Шавия, котри визначел же Дюрдьовски ДОД найлєпше функционує, дзекуюци донатором.

Дзекуюци донатором єст два камиони, а места лєм за єден

Дзекуюци донатором єст два камиони, а места лєм за єден

ГОРИ ОБИСЦЕ, А ГОРИВА НЄТ У КАМИОНУ

Од 2013. року средства од општини ше шицким тром општинским ДОД и професийней Огньогасней станїци Жабель розподзелюю по одлуки предсидательства Општинского огньогасного Союзу котре ше состої од огньогасцох зоз шицких штирох општинских местох. Шицки ше зочую з подобнима проблемами, нїхто нє ма досц средства за опрему, а, анї горива, без чого нє мож висц до помоци. Огньогасни камион у зависносци од рока кеди є напаравени и марки, на єдну годзину док гаши огень троши медзи 15 и 30 литри. Дюдьовски огньогасци були на вецей заводи без горива, праве кед требало рушац до акциї. Часто даваю пенєж за гориво з власней кишенки, або пожичую од приятельох. Опрему и средства маю дзекуци донатором, людзом котри маю порозуменя за їх, алє и потреби валачанох.

Општинскму союзу прешлого року одобрени 600 000 динари, а достата половка, та ДВД Дюрдьов достало лєм за виробок паноа з нагоди означованя 90 рочнїци од снованя. Того року у Дюрдьове нє формовани Жатвов штаб, котри требала орґанизовац општина, та нє виплацени анї наднїци за дежурства, котри ше запровадзує 24 годзини.

– Каждого року гонорари од жатви охабяме у Дружтве за подросток и їх обуку. Затераз нам лєм гварене же достанєме за гориво за дежурста у жатви и то дзешец тисячи динари котри маме подзелїц на штири општински ДОД, а то нї зач нє досц За прешли рок ДОД Дюрдьов нє достало средства за функционованє Дружтва. Прето розпущени 34 пионире, сенионре и юниоре. Требали достац 50 000 динари за функционованє Дружтва, понеже нїч нє достали нє мали од чого плациц рахунки. Виключени нам ґаз, а телефон на котри гражданє волаю же треба гашиц огень уж длугши час сцигує опомнуце за виключенє и предтужба – гварел предсидатель ДОД Дюрдьов Ґоран Берич.

ОДПАДЛА ЧАСЦ ПОВАЛИ

У просторийох одпадла єдна часц повали

У просторийох одпадла єдна часц повали

Пред даскельо роки ДОД Дюрдьов достали нови камион, а пре жиму би требал буц у завартим просторе же би у нїм нє змарзла вода, прето ше уж длуго намагаю ришиц тот проблем. Написани проєкт за преширйованє постояцих просторийох за ище єдно оддзелєнє, за нови камион. Проєкт прилапени на совиту Месней заєднїци Дюрдьов, обецана потримовка, алє ше о тим уж роками нїч нє бешедує, гоч ше огньоасци витирвало розпитую. Попри тим, того лєта у найстаршей часци обєкта после дижджох одпадла єдна часц повали у просториї дзе ше дежура. Свидоми су цо им потребне за лєпше функционованє, алє на позитивни одвит нє наиходза нїґдзе.

ТОГО РОКУ СЕДЕМ ИНТЕРВЕНЦИЇ

Гоч нє маю нїяку сиґурну и порядну помоц, осиґурац ше муша сами, алє нє одуставаю. Дзекуюци їх витирвалосци ма опрему, алє є углавним барз стара. У розвитих жемох ше таку опрему одруцує после даскельораз хаснованя, бо престава єй функционалносц, слово о шицкей опреми од шматох та по рижни штранґи. Огньогасци Добродзечного огньогасного Дружтва Дюрдьов у тим року мали седем интервеницї – на вецей заводи ше запалєла поверхносц на каналу Девень котри преходзи през валал, вжиме горело єдно обисце, а влєце и два прикочи зоз сламу. Дюрдьовски огньогасци помагаю и у других местох, алє и им приходза помогац. Остатнїраз гашели огень котри вибухнул у хлїве у Мошорину, кед згорел статок.

(Опатрене 23 раз, нєшка 1)