Почали пририхтованя за нову сезону

автор маф 7. авґуст 2017
Stolnotenisere i trener- 2017 2 008

Гоч змагательна сезона нє так давно закончена, пририхтованя за наиходзацу 2017/18. тих дньох починаю и столнотенисере Столно-тениского клубу (СТК) „Русин” з Руского Керестура. Пондзелок, 24. юлия, тренинґи почала младша ґрупа, а од 1. авґуста тренирац буду и старши столнотенисере.

Успих Русинових столнотенисерох у прешлей сезони бул задоволююци и за похвалу. У планох за наиходзацу та и о условийох у яких робя, тренер Клуба Драґан Ковачевич, гвари же нє будзе вельо пременки. То подрозумює подобни лєбо лєпши резултат у новей сезони.

– Кед попатриме на сезону 2016/17. а Русин ше змага у Заходнобачкей лиґи, од 14 колох мали зме 6 побиди и 8 пораженя. На концу прешлого першенства у лиґи, находзиме ше одприлики на штред таблїчки. Задовольни зме, бо ту бавя млади дзеци, та тота лиґа за нас цалком солидна. Мушим ше похвалїц и же нашо младши Кадети були екипно треци  у Войводини, то вельки успих,  и 10 у Сербиї, и же нам София Ковач, як юниорка на двох бодовних турнирох, освоєла бронзову медалю. То за єден валал и клуб таки як ми вельки резултати – гвари тренер Драґан Ковачевич.

ЛИҐАШКИ И ТУРНИРСКИ ЗМАГАНЯ

Попри змаганя у лиґи дзе участвую старши столнотенисере (гоч за Русин у тей катеґориї наступаю и младши), за младших єст орґанизовани шейсц бодовни турнири хтори ше бави од Суботици, по Ниш. На каждим турнире, у зависносци од пласмана, бавяч достава боди на основи чого ше прави ранґ-лїстину. Попри тих поєдинєчних єст и екипне першенство Войводини и екипне першенство Сербиї за тоти три катеґориї – младших кадетох, кадетох и юниорох.

– Участвовали зме на шицких турнирох, бо у Клубу маме таку политику же доґод маме пенєжи идземе на турнири. Сцем наглашиц же нашо дзеци нє плаца анї котизациї, а нє плаца анї членарину же су у Клубе.  Затераз зме у такей ситуациї же можеме тото „виґурац”, а аж и таке же помагаме дзецом кед потребне же купуєме патики, ґуми, цо лєм можеме же бизме помогли турнир – наглашує Ковачевич, котри з вельку любову и ентузиязмом водзи Столнотенисерски клуб „Русин”, а котри основал пред 22-ма роками.

НА НЇХ РАХУЮ

– Нїґда зме нє мали таке число бавячох як тераз и кед так останє то феноменалнe – задовольни тренер Ковачевич. – Найозбильнєйше рахуєме на младших  хтори даваю перспективу Клубу, а то Матей Макаї (друга класа), Иґор Фейди (треца), Александар Шанта (штварта), Матей Сабадош (пията), Шомодї Желько (пията) а Велько (шеста) и Никола Бульчик (шеста).

У старшей ґрупи буду Михайло Сабадош, Тони Костелник, Иван Чизмар, Стефан Горняк и Деян Надь хтори  ше после 10 рокох врацел до свойого матичного Клубу и бави феноменално. Ту и София Ковач за хтору зме ище нє сиґурни чи будзе бавиц за нас, а наявел ше нам и Сани Бучко з Анґлиї же приходзи на пририхтованя.

Stolnotenisrer1 2017 2 010