Шахисти активни и през лєто

автор злк 14. авґуст 2017
37 Karlo u uhlje z pravoho boku

Першенство у шаховских лиґох предлужує ше початком септембра, та ше и шахисти коцурского Клубу „Омладинєц“ помали пририхтую за єшеньску часц сезони у Бачкей лиґи – ґрупа Суботица.

Омладинєц ше после ярнєй часци находзи на, одличим, другим месце на таблїчки, а з оглядом на розпорядок и квалитет екипох у другей часци сезони шахисти зоз Коцура годни буц  у верху и на концу сезони.

„Омладинєц“ окремни пририхтованя нє мал, алє бавяче поєдинєчно през лєто участвовали на турнирох и зазначовали барз добри резултати.

На турниру у Байши участвовали Ґавра Коларич, Любомир Турович, Владимир Лазор и Стеван Перич, а на турниру у Бачким Петровцу участвовали Ґавра Коларич, Никола Тадич и Споменко Павичевич.

Коцурски „Омладинєц“ мал своїх представнїкох и на отвореним першенству Войводини котре отримане од 16. по 23. юлий у Новим Садзе.

Були приявени 125 шахисти зоз Сербиї и иножемства, а медзи нїма и шахисти Омладинца Карло Бала, Владимир Лазор и Стеван Перич. Карло Бала завжал 16. место зоз истим числом поенох як и осмопласовани шахиста, освоєл 6 од можлївих 9 поенох.

Карло Бала

Карло Бала

Шеснасте место на таким моцним турниру барз добри резултат окреме кед ше вежнє до огляду же Карло Бала найлєпше пласовани шахиста котри нє ма титулу, а за нїм остали дакельо Фиде и Интермайстрове, та аж и єден Велемайстор. Зоз тим резултатом Бала ше приблїжел ґу титули Фидемайстра за котру му хибя ище 10 рейтинґ поени.

Владимир Лазор мал 4,5 поени, а Стеван Перич 4 поени.

По початок другей часци першенства ШК „Омладинєц“ 20. авґуста будзе орґанизовац єден Мемориялни турнир на котрим маю буц коло 40 шахисти зоз Коцура и околїска.

Предсидатель ШК „Омладинєц“ Янко Бесерминї гварел же вон мал дзеку же би  и тот турнир бул у рамикох СБ „Яша Баков“, та же би ше позберали екипи з наших местох, алє понеже турнир у шаху уж бул отримани у Петровцох нє було простору за ище єден.