Злучує их и спорт

автор лик 10. септембер 2017
1

Тайландски бокс, лєбо „Мuay Tai”, Петер Рац тренира уж три роки и преглашени є 2016. року за шампиона у Минхену, катеґория до 63 кґ. Його старши брат Иван Рац, нє вельо менєй успишни од нього, а тренира лєм рок менєй. Рацово хлапци ше винашли, алє и швидко напредую у тим нєзвичайним спорту.

Двоме браца препровадзели дзецинство у Руским Керестуре, познєйше ше преселєли до Канади, а зоз часом им хибела Европа – та ше преселєли до Нємецкей, гоч гваря же им було крашнє и у Канади. Тераз су заняти у Нємецкей, а Керестур любя и часто приходза до старого краю же би нащивели свойо родзини, алє и подружели ше зоз товаришами.

Петер нє так часто ходзи до Керестура, док Иван хаснує кажди шлєбодни час же би пришол, бо ту одроснул и, як гвари – „цага го” дружтво. Хлапци ше длуго и успишно занїмали и зоз фодбалом, а вредно тренирали и тот облюбени хлопски спорт.

Од фодбалу одустали, бо видзели же нє можу буц таки озбильни и успишни як цо су тераз у тайландским боксу.

И КОЛЄНА, И ЛОКЦИ

Тайландски бокс ше трима за национални спорт Тайланду. Тот спорт настал зоз константну зваду народу „Thai” и других народох Индокини. Була потреба за швидким ученьом борительних схопносцох, хтори би ше швидко учело и применьовало на гранїцох. На початку, тайландски бокс бул подучовани як часц ткв. „войнових схопносцох”, дзе спадало мечованє, штреляцтво итд. Медзи найстаршима документами спада и леґенда зоз 1548. року о боксовей борби медзи тайландским кральом Нереусаном и бурманским кральом.

– Вше сом любел борительни схопносци, а тайландски бокс сом вибрал прето же дошлєбодзене хаснованє колєнох и локцох. Публика и людзе скорей осудзовали же то аґресивни спорт, алє тому твердзеню ше нє придава вецей уваги и превозидзене таке роздумованє. Тот спорт постава єден зоз популарнєйших у Нємецкей – гвари Петер.

2

ТРЕНИРАЦ И ПРАВИЛНО ШЕ КОСТИРАЦ

Старши брат Иван ище у стреднєй школи тренирал бокс, потим ше, як и його брат, и вон опредзелєл за тот тайландски. Позитивне роздумованє о тим спорту и сцелосц за тренираньом указала ше и при ньому, праве прето же му ше попачела така файта боксу.

– Идол ми Конор Мекґреґор, прето жe лєгко преходзи през препреченя. Мой особни рекорд то два побиди и єден страцени меч. Наисце ше намагам цо вецей и вреднєйше тренирац, а тиж так, меркуєм и же бим ше здраво и правилно костирал. То подрозумює же конзумуєм вельо овоци и желєняви. Нє досц лєм тренирац, а нє мерковац на костиранє, вечарами тиж меркуєм цо єм – толкує Иван.

Петер тиж меркує на костиранє и намага ше же би нє єдол масне єденє за вечеру. Йому идол Француз Дамиен Аламос, хтори доказал же Тайландянох мож победзиц, гоч то їх национални спорт.

ЗОЗ ТАЙЛАНДУ ШЕ ВРАЦЕЛИ ИЩЕ СХОПНЄЙШИ

Того року браца були тренирац и на Тайланду же би цо вецей научели. Отамаль принєсли вельо упечатки, алє и нови „цаки”, роздумованя и идеї. А як гваря, вельо того понаучовали цо годни хасновито применьовац у наиходзацих мечох. Петер ше наздава же такой у септембру годзен указац свойо схопносци, прето же будзе мац меч хтори ше будзе преношиц и на телевизиї. Иван ше нє дума професийно занїмац зоз тим спортом, бо свою роботу кладзе на перше место, док ше Петер наздава озбильней „профи” кариєри. 

3