Диґитализация школства почина

автор але 17. септембер 2017
11

„Ученє на далєкоˮ и хаснованє апликацийох на мобилних телефонох у ришованю тестох, лєм даєдни зоз сучасних методох хтори ше хаснує у вербаских школох.

Министерство  просвити, науки и технолоґийного розвою уводзи велї пременки до школскей системи од початку того школского року. Медзи новинами ше находза нови, дополнєни и осучаснєни предмети, уводзенє униформи до основних школох, алє и свойофайтова диґитализация водзеня наставного процесу. До пилот проєкту „епросвита” од 1. септембра, та по конєц першого полроча, требали би буц уключени 200 школи, а спочатку електронску евиденцию буду мац лєм директоре и наставнїки, а познєйше и родичи и школяре. При велїх просвитних роботнїкох праве тот сеґмент виволал двойнїсти коментари, алє у вербаскей општини ше од таких новинох нє боя. По остатнєй екстерней контроли аж шейсц од дзевец школох оценєни зоз найвисшу оцену, а Основна школа „Светозар Милетич” єдна зоз найлєпше оценєних школох на териториї Школскей управи Нови Сад. Потераз вецей раз участвовала у рижних проєктох осучасньованя и збогацованя настави. Школа уж ма софтвер за дописну школу прейґ хторого дзеци, хтори нє у можлївосци ходзиц на наставу, лекциї и домашнї задатки можу провадзиц на рахункару у обисцу. Учителька Таня Полдруги гвари же така система дава позитивни резултати.

ПРЕВОЗИСЦ ЗАСТАРЕНИ ШКОЛСКИ СИСТЕМИ

– То предвидзене за старши класи, а я мам школярох по пияту, та сом нє мала директни контакт зоз тим софтвером, алє чуєм лєм позитивни коментари. Мушиме провадзиц сучасни тренди и нови технолоґиї насампредз же бизме себе олєгчали роботу, а вец и превозишли застарени школски системи. Наздавам ше же тото зажиє и нє будзе ми чежко прилагодзиц ше – гвари Полдругийова.

У тей школи пред двома роками поставени фундамент и за електронски дньовнїк, а директорка Ружица Маркович гвари же позитивне же професоре и учительки уж порихтани и упознати зоз таку систему.

– Тот софтвер ше хвильково нє хаснує, бо чекаме ориґинални, универзални софтвер за шицки школи од Министерства просвити. Ми таку систему запровадзели медзи першима и искуствия хтори уж маме нам олєгчаю же бизме цо скорей вошли до процесу, а важне и тото же и векшина дзецох уж упозната зоз тим. Прешвечени зме же то вельо сиґурнєйша и транспарентнєйша система роботи, а кед раз тото постанє каждодньова рутина наставнїки годни вельо лєгчейше и креативнєйше робиц – толкує директорка Маркович.

Кед у питаню стреднї школи, Вербас и ту ма добри приклад уводзеня сучасних технолоґийох до каждодньових, застарених школских програмох. Стредня фахова школа „4. юлий” зоз Вербасу уж скоро два роки ма цалком нови концепт водзеня годзинох „Информатики и рахункарства” хтори преподава Драґана Симич. Вона уведла систем  „вивраценей учальнї” дзе видео знїмок заменює лекцию. Тото цо у тим викруцене же школяре дома зоз помоцу видео лекцийох уча, а на годзинох робя домашнї задатки. Панї Симичова мала моцни мотиви за порушованє такей системи.

ВИДЕО ЗНЇМОК ЗАМЕНЮЄ ГОДЗИНУ

– Наставна програма за даєдни предмети нє меняна дзешатки роки, а за мой предмет то поражуюце. Дзецом ше информатика зведла на бавенє бавискох и дружтвени мрежи, а я им сцем понукнуц вецей. Научела сом их як направиц блоґ, научела их хасновац такволани „клауд платформи” – толкує Симичова.

Наймоцнейши ефект вона посцигла зоз уключованьом мобилних апликацийох до каждодньовей настави през ришованє и правенє тестох.

– Вони нє можу задумац анї пол годзини без мобилних телефонох, та сом праве прето вихасновала апликацию за мобилни же бим правела кратки преверйованя знаня. Школяр ма 20 секунди же би одвитовал, так же нє ма часу за  „ґуґланє”, преписованє… Так зме вєдно почали вежбац и за други предмети, цо ми окреме мило – гвари Драґана Симич.

Приклади за модернизованє наставного процесу у вербаскей општини єст ище вельо. Ище важнєйша порихтаносц руководзацого и наставного кадру, алє и школярох, же би модернизовала функционованє школи и уключела ше до сучасних цекох.

Остатнє зоз чим ше Основна школа у Савиним Селу може похвалїц то комплетно опремени кабинет за информатику у вредносци од милион динари (20 рахункари, 2 проєктори, 2 смарт телевизори, лап топ, 2 проєкторски платна). Тоту донацию школа освоєла лєм зоз помоцу гласаня и бодованя прейґ дружтвених мрежох.

22