За и процив школярских униформох

автор Мар/ОПС 2. октобер 2017
25.09.2017.- Skola-uniformi 001

Уводзенє школярских униформох до школох би могло запровадзиц шор и културне одношенє ґу образовней институциї. Школярска униформа би хасновала и у транспорту на драги од дому по школу, бо би школяре були препознатлївши и обачлївши, а тиж так би ше лєгчейше обачовало и у школских дворох хто школяр, а хто нє, та би ше на тот способ допринєсло и безпечносци.

Нови школски рок за школярох Основней керестурскей школи почал у униформох. Основна школа „Петро Кузмяк” єдна спомедзи 55 одсто школох котри ше прешлого року вияшнєли за униформи, и єдина школа у цалей кулскей општини котра ше опредзелєла и запровадзела таку праксу.

Униформи нє надрилєла школа, алє ше вияшньовали родичи каждого дзецка. З оглядом на тото же ше вецей од половки вияшнєли за униформи, предкладанє розпатране и на Совиту родичох, котри потвердзел тоту одлуку.

Хелена Пашо Павлович

Хелена Пашо Павлович

– На предкладанє Школи, родичом и школяром понукнута можлївосц ношеня униформох. Така одлука то воля родичох и школярох. На Совиту родичох прилапени униформи, а потим дзеци рисовали яки би униформи жадали ношиц. Спатраюци економски бок, з оглядом же школа нє ма власни средства, а єдина зме школа у кулскей општини котра ше опредзелєла за таке, тоту потребу нє препознала локална самоуправа, та остало же родичи буду самостойно финансовац униформи. Прето ше Совит родичох опредзелєл за скромнєйшу форму униформох – маїчки з краткима рукавами и школским лоґом, а цена єдней маїчки 408 динари – дознаваме од директорки Школи Хелени Пашо Павлович.

Министер просвити, науки и технолоґийного розвою поволал рижних спонзорох же би финансовали школярски униформи, потим даскельо раз надпомнуте же би и локални самоуправи требали софинансовац. Затераз финансиєре школярских униформох лєм родичи.

ДИСЦИПЛИНА, ЧИ НЄПОЧИТОВАНЄ ДЗЕЦИНСКЕЙ ИНДИВИДУАЛНОСЦИ

Идея о врацаню школярских униформох ма и добри боки, бо ше жада посцигнуц єдну озбильносц у образовним процесу, як и у самим будинку школи. Униформи ноша школяре у велїх европских державох, та и у найпрестижнєйших школох у швеце. Цо о школярских униформох думаю фаховци, опитали зме ше Стоянки Яноши Зелькович, педаґоґиня у ОШ „Славко Родич” у Бачким Ярку:

– Врацанє школярских униформох априори и нє така подла задумка, бо ше жада же би ше школи „заозбилєли”, а так би ше можебуц ублажели и социялни розлики медзи школярами. Жаданє же би ше фокус помкло на тото же буц у школи то розвива чувство якейшик припадносци, одредзеней социялней ґрупи и институциї. Як и кажда новосц, то порушує числени реакциї, як позитивни, так и неґативни. Гевти котри „ЗА”, здогадую ше прешлих часох, кед школа мала пресудну улогу у формованю подоби у социялистичним дружтве, на котре ше з носталґию здогадуєме же було праведнєйше и же нє було тельо парняцкого насилства.

Гевти котри „ПРОЦИВ” думаю же врацанє униформох то лєм нєуспишне пробованє же би ше школом врацело значенє котрому ше наздаваю. Найдрастичнєйши гевти котри ше закладаю за шлєбодни вибор, без даякого надрильованя – гвари Яноши Зелькович.

Найважнєйше же би школи були место дзе ше розвиваю индивидуални схопносци, мотивує любопитлївосц и сцелосц за ученьом, гвари Яноши Зелькович.

Стоянка Яноши Зелькович

Стоянка Яноши Зелькович

– Особнє нє мам нїч процив школярских униформох. Важне лєм же би школа було место дзе ше пестує праведносц, як у оценьованю и прилапйованю успиху у ученю и можлївосци котри ше школяром отвера. Школа треба же би пестовала социялну преходносц и оможлївела исти шанси за шицких школярох, а тиж так и нашо дружтво би требало и мушело обезпечиц праведнєйше одношенє ґу шицким – гварела Стоянка Яноши Зелькович.  

ЧИ МАЇЦА ПРАВЕ РИШЕНЄ

Реакциї и думаня о униформох подзелєни у зависносци од оддзелєня оформени позитивни або неґативни становиска о маїцох. Так єст школярох котри дзечнє облєкаю маїцу, а з другого боку єст и тих котри ю скриваю попод другу маїцу.

Векшина школярох уж виплацели и достали другу маїцу, цо олєгчує родичом, но єст и оддзелєня чийо школяре нє достали другу маїцу, та водза бриґу лєм з тоту єдну, котру треба и вирайбац.

– Як родитель сом ше опредзелєла за униформу, думам же би крашнє було кед би дзеци були єднак пооблєкани, и тераз позитивно думам о униформох, алє нє у такей форми, думам на маїцу. Же маїца нє практична за цали школски рок, заключели зме на родительскей схадзки. З початку, док було цепло, тота маїца з краткима рукавами одвитовала, тераз уж дзеци ноша маїцу з длугокима рукавами попод, а сиґурно же кед придзе жима и кед дзеци буду на грубше пооблєкани, то нє годно – гварела мац школярки седмей класи Ксения Ходжич.

У школским дворе векшина дзецох облєчени у белавей маїци з лоґом школи, а єст и тих котри без нєй. То дзеци котри тот дзень маю физичне воспитанє, та су пооблєкани до билих маїцох, а єст и дзеци без маїцох котри ище вше маю лєм єдну, та нє маю можлївосц преблєчиц ше до другей кед ше забрудза.

– Ище вше зме нє достали другу маїцу, та можем повесц же єдну стално райбеме, уж страцела и фарбу, а думам же ше дакус и зишла. Мила ми одлука о униформох, а наздавам ше же убудуце будзе лєпши и їх квалитет – додала Ходжичова.

Медзи родичами єст тих котри були за униформи пред тим як цо дознали же то будзе маїца зоз краткима рукавами, а єст и тих котри мали неґативне думанє од початку.

– Маїци, та анї униформи у иншакей форми нє скрию социялни розлики медзи дзецми, алє сиґурно же иста шмата каждого школяра означи припадносц єдней школи и почитованє тей установи цо барз добре. Маїци котри нашо дзеци достали релативно нєквалитетни, уж страцели фарбу, а треба ю райбац скоро кажди дзень. Кед же ше под ню ноши ище єдна маїца зоз длугокима рукавами, вец ше брудза два нараз, та то цалком нє практичне – заключує мац школяра котра жадала остац анонимна.

25.09.2017.- Skola-uniformi 009

 

(Опатрене 118 раз, нєшка 1)