Спортска сала по конєц рока

автор сaс 13. октобер 2017
3

После седморочней паузи у Основней школи „Жарко Зренянин” у Ґосподїнцох, ознова почало ушорйованє спортскей сали зоз трибинами. Косцанїк започати 2010. року, а у нєй и два учальнї. Кед положене закрице, роботи станули, насампредз, потрошени вельо векши средства як цо було предвидзене.

У фебруару того року Покраїнски секретарият за образованє одобрел средства за законченє сали. Роботи почали аж тераз и требали би буц закончена дзешка по конєц рока.

Школяре физичне воспитанє и спортски активносци мали у єдней векшей учальнї велькей коло седемдзешат квадрати. Спортски активносци, окреме пре облаки, барз огранїчени. Од реквизитох постояла лєм напукнута греда. У дворе анї єден спортски терен. Правда, нєдалєкко од школи ше находзи валаски спортски терен, алє є як и шицки явни спортски терени, вон руйновани, а, тиж и одход по тамац нєбезпечни, насампредз пре транспорт, як и одберанє часу за доходзенє по тамац.

Школа ше находзи на поверхносци коло 3 800 квадрати, менши двор на уходзе до школи и векши споза дзе буду ушорени два спортски терени – терен за рукомет и коло нього рефлектори и атлетска дражка, крем того покончени и тендер за оградзованє двора. У сали на єдней поверхносци буду вирисовани и ушорени терен за фодбал, одбойку и кошарку, а ушорени буду и трибина на першим поверху, як два просториї у тим новим будинку.

Стара и нова часц будинка школу, односно сали, злучена зоз длугоким конком дзе ше у єдним куце планує направиц библиотеку и куцик за школярох дзе ше годни учиц. Директор Основней школи „Жарко Зренянин” у Ґосподїнцох Дарко Вранешевич, котри пред осем роками у тей школи почал робиц як наставнїк физичного воспитаня, свидоми кельо тота спортска сала може мац позитивни уплїв на дзеци.

– Спортски активносци позитивно влївую на розвой дзецох и док войдземе до нєй и годни ю хасновац, верим же у нашей школи будзе вельо лєпша дисциплина. Буду здрави, и вжиме буду мац дзе буц активни. Ушоренє тей сали добра драга ґу здравей, културней, диспицплинованей и толерантней школи, односно школярох у нєй. Дзекуюци новим просторийом у спортскей сали постої можлївосц же би ше преподаваня отримовало лєм у дополадньовей змени – гаврел Дарко Вранешевич.

Виводзач роботох „НПН Ґрадня” з Нового Саду котра водзи роботу у сотруднїцтве з фирмами „Електроекономист” доо Нови Сад, „БОБ” доо и „Еркер инжинєринґ” Нови Сад. Главни проєкт поробел „Ателє” доо Темерин, за ньо одвичательни Ержебет Ракочевич дипломовани инжинєр архитектури. Од Покраїнского секретарияту за образованє за ушоренє спортскей сали и теренох у школским дворе одобрени 24 милиони 300 тисячи динари. Роботи би требали буц закончени за дзеведзешат днї, а точни датум 11. децембер.