fbpx

Кристина Афич завжала перше место у соло шпиваню

автор маб 18. децембер 2017

Кристина Афич з Руского Керестура, школярка II класи соло шпиваня Основней музичней школи (МШ) „Петар Коньович” зоз Зомбора, завжала I место у своєй катеґориї и лауреат за Основну школу на 8. Медзинародним змаганю младих талантох „Мита Топалович”, хторе отримане 3. децембра у Панчеве, у МШ „Йован Бандур”.

Кристину за змаганє пририхтала наставнїца Єлена Янїч у чиєй є класи школярка оддзелєня зомборскей МШ „Петар Коньович” у Оджаку, а змагала ше з двома композициями – Ґ. Паисєла и В. А. Моцарта. Кристина вчас одкрила свой талант за шпиванє, одмалючка уживала у музики и указовала то през танєц, або през шпиванє. Шпивала на Червеним пупчецу, лєбо зоз даяку ґрупочку дзецох, та, як росла и розвивала свойо музични способносци, похопела же то будзе часц єй живота, и же треба укладац вельо труду котри ше и виплаци. Люби шпивац по руски, алє и виражовац ше на странским язику, а єдни од шпивачох на котрих ше упатрала то Витни Хюстон, Селин Дион, Марию Кери.

ШПИВА ОДМАЛЮЧКА

Kристина активна у рускей заєднїци, и уж вельо раз наступала, од промоцийох, опущених вечарох и свиркох, та по змаганя и манифестациї. Мали зме ю нагоду видзиц на „Дньовки”, „Акустики Рутеники” прешлого року, а єй визначни награди були за Червену Ружу дзе ше змагала за найкрасши глас, и на 8. Медзинародним змаганю младих талантох „Мита Топалович”, хторе отримане того року у Панчеве, дзе завжала перше место. Окрем як соло шпивачка, часто наступа и зоз своїм бендом дзе ю на инструментох провадза Михаїл Римар, Жарко Остоїч и Павле Рац.

УСПИХ ДАВА ИЩЕ ВЕКШУ МОТИВАЦИЮ

Кристина  школярка II класи соло шпиваня Основней музичней школи (МШ) „Петар Коньович” зоз Зомбора, професорка єй Милица Майсторац, алє у тей хвильки на замени Єлена Янїч Даїч котра ю и пририхтує за змаганя. На 8. Медзинародним змаганю младих талентох „Мита Топалович”, хторе отримане 3. децембра у Панчеве, у МШ „Йован Бандур” Кристина освоєла I награду у своєй катеґориї и лауреат за Основну школу. Змагала ше у конкуренциї штернац шпивачкох з музичних школох зоз Сербиї, Македониї и Румуниї, освоєла 98 боди, а виведла два композициї – Ґ. Паисєла и В. А. Моцарта у провадзеню на клавиру, корепетиторка Ружица Павлович.

– За змаганє сом ше почала рихтац того школского року, обидва професорки ми уж вельо бешедовали о змаганьох на хторих сом ше годна змагац, ище прешлого року. Рахуюци основну и штредню школу, шицко вєдно було коло 90 учашнїкох на змаганю. Професорка ме розшпивала даскельо раз, алє нє було потребне вельо раз понавяц точки хтори ше виведзе, бо вец часто знаю нє випаднуц найлєпше. Цали дзень зме бешедовали о дальших наступох, кариєри и музики, так же сом нє мала трему. Аж и кед сом станула на бину и почала виводзиц композициї почувствовала сом ше ище енерґичнєйше, гоч ми то було перше змаганє зоз такей файти шпиваня. Мнє тота награда барз значи, кед ми ше видзи же нє можем исц далєй, тота награда ме здогаднє же можем ище вецей, лєм кед будзем и далєй укладац труду и моци кельо сом и потераз укладала. Поґурала ме же бим и предлужела розвивац свойо таланти. Потримовку доставам зоз шицких крайох швета, мам полно товаришох, колеґох, та и професийних музичарох хтори ме потримую и совитую, а єдну з найвекших потримовкох доставам од фамелиї – толкує Кристина.

ЛЮБЕЛА БИ ВИХАСНОВАЦ ТАЛАНТ

Окрем шпиваня, Афичова грає и у оркестру ,,Дома Култури’’, дзечнє ґлуми и пише, учи грац на рижних инструментох, а люби послухац странску музику и нашу руску, як народну так и забавну, и уживац у рижнородних аранжманох.

– Шпиванє думам предлужиц и надалєй го розвивац, а тота награда ме прешвечела же сом добра у тим цо робим, и мотивовала ме предлужиц робиц на себе. Любела бим кед би мой талант прероснул до занїманя, тераз робим на тим, та увидзиме, ,,кадзи ме витор однєше”, кед ше укажем як наисце добра – закончує Кристина.

Kristina Afic (3)

(Опатрене 89 раз, нєшка 1)