fbpx

За дзешец роки на Мемориялу у Руским Керестуре  26  драмски  ансамбли виведли 71 представу, т. є. стреднє по дацо вецей як седем представи на каждим. На нїм ше почало  додзельовац награди, отримовало округли столи и совитованя о обставинох и проблемох розвою театралного аматеризма при Руснацох. Скоро каждого року Мемориял мал и провадзаци змисти.

У Народним календаре за 1972. рок, пишуци о културних подїйох у предходним, 1971. року, новинар „Руского слова” Иван Бесерминї, и сам вецейрочни театрални дїяч, на 158. боку призначел же после Трецого меморияла наступац на тей нашей манифестациї аматерскей драмскей уметносци – велька чесц. Чесц нє лєм за нашо драмски аматерски колективи, алє и за други познати аматерски, та и професийни драмски ґрупи. Тота констатация лєм потвердзує же яки  угляд тота наша театрална манифестация посцигла нє лєм у рамикох нашей националней заєднїци, алє и ширше.

У перших дзешец рокох на Драмским мемориялу Петра Ризнича Дядї у Руским Керестуре наступели 14 руски драмски ансамбли, дзевец аматерски госцуюци и три професийни. Аматерски театер Дома култури Руски Керестур (познєйше АРТ „Дядя”, Сцена Руски Керестур) мал 18 представи (рахуюци ту и 7 дзецински), АРТ „Дядя” Сцена Нови Сад наступела 14 раз (рахуюци у тим 3 дзецински), КПД „Дюра Киш” зоз Шиду мал 6  наступи, КМД „Яким Гарди” з Петровцох виведол 9 представи, Дом култури з Коцура мал штири представи, а тельо виведла и українска драмска секция зоз Кули. Єден наступ мала и младежска драмска секция зоз Петровцох, КМД „Яким Ґовля” з Миклошевцох мало 5 наступи, а по 2 наступи мали члени рускей драми при Доме култури з Вербасу и члени КУД „Петро Кузмяк” з Нового Орахова.

Ґу тому треба доложиц и 9 госцуюци аматерски драмски ансамбли, котри виведли 17 представи, и три професийни, котри виведли 11. Аматерски театер зоз Кули мал 5 наступи, Аматерски театер з Вербасу – єден, Аматерски театер „Владимир Гурбан Владимиров” з Бачкого Петровца тиж єден, драмски аматере Дому култури зоз Червинки дали три представи, а аматере КУД „Слобода” зоз Кули  два. КУД „Бриле” зоз Беочину наступел тиж два раз, а по раз наступели:  аматере КУД  „Герой Янко Чмелик” зоз Старей Пазови, Дому култури зоз Сивцу и члени Аматерского театра зоз Николинцох.

За дзешец роки на Мемориялу у Руским Керестуре 26  драмски  ансамбли виведли 71 представу, т. є. стреднє по дацо вецей як 7 представи на каждим.

ПРОВАДЗАЦИ ЗМИСТИ НА ТЕАТРАЛНИМ ШВЕТУ

Скоро каждого року Мемориял мал и провадзаци змисти. На Першим то була вистава малюнкох Петра Ризнича Дядї. Новинарка Ирина Гарди у „Руским слове” , число 15 од 11. априла 1969. року (бок 5), о тей вистави призначела слїдующе:

„У рамикох Дядьового меморияла, у просторийох керестурскей библиотеки и читальнї, внєдзелю вечар предсидатель Совиту Дома култури Єфрем Колєсар, отворел виставу позбераних малюнкох Петра Ризнича – Дядї. Отвераню вистави присуствовали велї госци котри пришли до Руского Керестура на початок шейсцдньовей смотри аматерских колективох з нашей жеми и ЧССР.

Седемнац виложени платна дакедишнього керестурского наставнїка ликовного образованя прицагли красне число заинтересованих. Велї з нїх ше з окремним пиєтетом припатрали на малюнки виробени з тоту руку цо их научовала першим смушком зос щеточку и фарбами на годзинох рисованя у Основней школи „Петро Кузмяк”.

Медзитим, так уж досц оддалєни од того часу, могли обєктивно заключиц же пред нїма роботи аматера котри з окремну любову, а дзекеди и барз успишно прерисовйовал познати малюнки руских реалистох. Окреме ше му пачели прикази природи цо и найуспишнєйше  преношел на платно. У власних инспирацийох очивисне же ше Ризнич тримал „старих добрих часох малярства”. Дзекеди го то одводзело аж по наивносц („Бостан” и „Марадики”) зоз котру ше приблїжел нєшка тельо познатей и з єдного боку хвалєней школи наивних малярох, або по рафинованосц котра цала пахнє на салонско-снобовски часи романтизма (як цо пейзаж на сомоту). Ту ше найдзе и школски приклад перспективи (шини), алє вшадзи очивисни вираз єдней души нєвиправлївого романтичара, котра и у таким фалаце, як цо то була його остатня режийска постановка Горкийовей драми „На дну” знала пренайсц нїтку красного, романтичного.

Чкода же на тей вистави нє були виложени и други платна котри вироятнє стоя обешени у велїх наших обисцох.”

Под час Трецого меморияла була отворена вистава малюнкох новосадского маляра Петра Мояка, а под час Штвартого – вистава малюнкох Любинки Ледєнац зоз Кули, а отримани и семинар за режисерох-аматерох, котри водзел Михайло-Мича Василєвич, режисер з Нового Саду. Штварти мемориял характеристични и по тим же по першираз шицки представи провадзел окремни жири публики и наградзовал найлєпших глумцох у каждей представи и режисерох за найлєпшу режию за старших и  режисерох за найлєпшу режию за дзеци. Вон додзелєл  седем награди. Таки жири бул вибрани и на Пиятим, ювилейним, мемориялу, котри додзелєл 8 награди и аж 26 писмени припознаня ґлумцом и режисером.

На Шестим мемориялу отримане и совитованє о нашей драмскей творчосци и проблемох нашого язика, з яким ше стретаю дружтва у своєй роботи на пририхтованю представох. А, жири на тот завод после виведизених представох за дзеци додзелєл 6 награди  младим  ґлумцом, а старшим аматером 5 награди за  добре одбавени улоги   и 6 специялни награди за успишно одбавени улоги.

Седми и Осми мемориял прешол без додзельованя наградох, вироятно пре нєдостаток финансийних средствох и  одвитуюцих спонзорох. Алє, под час Осмого меморияла отримане совитованє о обставинох и проблемох розвою театралного аматеризма Руснацох у САП Войводини. То лєм потвердзує нашу предпоставку о причинох виоставаня наградох.

И под  час Дзевятого меморияла отримане совитованє у форми Округлого  стола, на котрим було бешеди о условийох за роботу, о посцигнутих успихох, почежкосцох и других обставинох у руским театралним живоце. На тот завод  додзелєни  и штири награди котри обезпечели редакциї „Руского слова”, „МАК”-у, „Шветлосци” и „Пионирскей заградки”.

Ювилейни, Дзешати мемориял отворени з обновену виставу малюнкох Петра Ризнича Дядї и фото-документарну виставу о дзешец Мемориялох и драмскей творчосци Руснацох. А додзелєни и шейсц награди за найлєпши ґлумецки витвореня и три награди аматерским ансамблом за добре виведзену представу, за успишне анґажованє младих и за уложени окремни труд у пририхтованю представи.

АРТ „ДЯДЯ” МАЛ ПОТРИМОВКУ, АЛЄ  И КВАЛИТЕТ

Сумируюци посцигнути резултати у першей децениї отримованя Драмского меморияла Петра Ризнича Дядї, мож констатовац же вони мали барз позитивни вплїв на дальши розвой драмского аматеризма у рамикох нашей националней заєднїци, и попри евидентних материялних почежкосцох з котрима ше нашо културно-уметнїцки дружтва у тим периодзе стретали. Часточни винїмок представял Аматерски руски театер „Дядя” зоз своїма сценами у Руским Керестуре и Новим Садзе, бо у своєй дїялносци мал финансийну потримовку  покраїнского и городского характера, бо му додзелєна така улога у рамикох нашей националней заєднїци, яку мали професийни театри других националних заєднїцох. Йому було оможлївене анґажовац професийних режисерох, сценоґрафох и костимоґрафох, укладац векши финансийни средства до виробку декора,  костимох,  звучних ефектох, шветлосного парку, итд. Розумлїве, вец, же ше уметнїцки квалитет його представох нє могло ровнац зоз квалитетом других руских ансамблох, док други колективи нє мали таки статус  и часто нє мали анї достаточне розуменє у рамикох своїх културно-уметнїцких дружтвох. Бо, добре познате же театрална дїялносц, та и аматерска, найдрагша у поровнаню з другима културнима дїялносцами, алє є зато нєзаменлїва у єй културней мисиї, окреме кед слово о националних меншинох. Алє, там дзе єст мало пенєжи видвоєни за културу вообще, там при дзелїдби велька борба и нїхто нє задовольни з тим цо му ше ушло. Так то було, так то и тераз, а вироятно так будзе и убудуце.

Уж од Єденастого драмского меморияла Петра Ризнича Дядї почина ше чувствовац одредзени усиловносци коло отримованя дальших смотрох наших драмских аматерских дружтвох. Нє нательо пре нєдостаток представох, бо ше їх число почало звекшовац, алє баржей пре уметнїцки уровень на яким су виводзени. Доказую то и намаганя орґанизаторох же би ше таки обставни пременєло на лєпше. Зоз тим цильом почало ше у рамикох Меморияла орґанизовац совитованя и так влани округли столи, на котрих розпатрани обставини у нашим театралним аматеризме и вообще у нашим театралним живоце.

У ДРУГЕЙ ДЕКАДИ БУЛО ВЕЦЕЙ ПРЕДСТАВИ

Поровнуюци першу и другу декаду у отримованю Драмского меморияла, можеме замерковац же ше число учашнїкох  у другей декади, зоз 36 у першей, зменшало на 26. Зоз того числа учасц руских ансамблох зоз 14 звекшана на 15, госцуюцих аматерских зоз 19 на шицкого 9, а професийних зоз 3 зменшана  на 2. Медзитим, за потїху може послужиц факт же число виведзених представох у другей декати обачлїво звекшане зоз 71, у першей, док є у другей декади звекшане на 103. У рамикох того числа по руски виведзени 57 представи за старших и 19  представи за дзеци, а госцуюци ансамбли на других язикох виведли 27 представи.

(Предлужи ше)

(Опатрене 92 раз, нєшка 1)