У другей декади Драмского меморияла Петра Ризнича Дядї провадзаци манифестациї у Руским Керестуре звекшани за ище єдну. Бул то рецитаторски вечар, наволани „Стих за стихом”. Кед слово о представох, уж под час ювилейней, трицетей манифестациї почувствовало ше же наступа кризни период у нашим театралним аматеризме.

Драмски мемориял Петра Ризнича Дядї у Руским Керестуре ошвижени з рецитаторским вечаром, наволаним „Стих за стихом” на котрим здобули право участвовац нашо найлєпши рецитаторе зоз општинских и реґионалних смотрох. Од Тринастого, та по Двацети, з винїмком Петнастого (ювилейного), „Стих за стихом” ше поряднє отримує. Як провадзаци манифестациї на Єденастим драмским мемориялу були два вистави: єдна пошвецена значним датумом з новшей историї нашей жеми, а друга представела малюнки наших малярох-аматерох Меланиї Цаповей, Славка Колошняя, Владимира Гайдука и Дюри Колошняя.

Округли стол пошвецени теми: Мемориял и робота  на театралним полю по наших местох.

На Дванастим мемориялу була вистава таписерийох Агнети Силадьовей з Нового Саду, а Округли стол мал тему: Мемориял и проблеми у нашим театралним аматеризме.

Тринасти и Штернасти мемориял прешол без виставох и Округлого стола, алє отримани виступ рецитаторох у рамикох манифестациї „Стих за стихом”. Петнасти Мемориял (як мали ювилей), послужел за додзельованє припознаньох заслужним дружтвом и поєдинцом ґлумцом и режисером, котри найвецей раз участвовали на Мемориялу, а як провадзаца манифестация була вистава уметнїцких фотоґрафийох Владимира Колєсара з Руского Керестура.

На Шеснастим Мемориялу, попри манифестациї „Стих за стихом”, були виложени портрети и пейзажи Славка Мецека з Руского Керестура, а на Седемнастим – вистава фотоґрафийох членох Фото-кино клуба „Петро Ризнич” при Доме култури у Руским Керестуре и „Стих за стихом”. Орґанизоване, тиж, и совитованє на тему: Театер як интерес медийох масовного комуникованя.

Осемнасти, як провадзаци манифестациї мал „Стих за стихом” и виставу уметнїцких роботох Евґена Кочиша зоз Сомбора. На Дзеветнастим Мемориялу, попри манифестациї „Стих за стихом” отримана и вистава подобових роботох Ванеси Гардийовей зоз Ковачици, народзеней у Руским Керестуре, а совитованє мало тему: Статус, проблеми и дальши розвой театралного аматеризма.

Двацети, ювилейни, Мемориял, окрем манифестациї „Стих за стихом”, мал и два вистави. Були виложени роботи малярох-аматерох з Руского Керестура и фото-документацийна вистава зоз 20 Мемориялох. Додзелєни и окремни припознаня, плакети зоз подобу Петра Ризнича, за нєсебичне доприношенє у твореню и розвою Меморияла. Тоти припознаня достали: Дом култури Руски Керестур, Дюра Папгаргаї, Витомир Бодянєц, Микола Скубан и Мирон Гайдук.

КРИЗНИ ПЕРИОД

Медзитим, треба спомнуц же ше уж под час тей ювилейней манифестациї почувствовало же наступа кризни период у нашим театралним аматеризме. Замерковал то и новинар Владислав Надьмитьо, та у Народним календаре за 1989. рок (на бокох 172-173), констатує:

„Того року, скоро у цалосци, драмска активносц нашей народносци була вязана  за АРТ „Дядя”. Попри представи „Нїґда ше нє зна” Михала Ковача, у режиї Якима Чапка, котру порихтали аматере КУД „Тарас Шевченко” у Дюрдьове, нїч нове зме нє достали од стредкох по других местох. Наисце, озбильне питанє кадзи то водзи.”

А на тим Мемориялу наступели шицкого 9 ансамбли, котри дали по руски три представи за старших (два „Дядьово” и єдна дюрдьовска), три за дзеци (два „Дядьово” и дюрдьовска), єдно слуханє радио-комедиї (Радио Нови Сад), два госцуюци аматерски (Стара Пазова и Сивец) и єдна госцуюца професийна (Сербски народни театер з Нового Саду). На концу Надьмитьо, заш лєм, напомина:

„Цали Мемориял оценєни з високима оценами, алє остало єдно значне питанє: цо з драмскима аматерами у других наших местох? Чи то значи же ше цала драмска дїялносц снує лєм на роботи АРТ „Дядя”, дзе, правда, найвигоднєйши условия за роботу, алє було прешлих рокох замерковани представи и з других реґионох.

Так зме вошли до трецей децениї отримованя Драмского меморияла Петра Ризнича Дядї. ХХІ Драмски мемориял мал чесц отвориц наш просвитни и културни дїяч, миклошевски учитель Дюра Лїкар. У своїм привитним слове наявел наступ 12 театралних ансамблох, а тельо и наступели: по руски було 8 представи (4 за старших и 4 за дзеци), госцуюци аматерски 3 и єдна госцуюца професийна. Попри тим, Драмска програма Радио Нового Саду обезпечела слуханє двох радио-драмох, а наступели и рецитаторе з наших местох у рамикох провадзацей манифестациї „Стих за стихом”, а вистава була пошвецена подобовим роботом Михайла Ляховича зоз Сримскей Митровици.

ХХІІ Драмски мемориял улял дакус оптимизма у поглядзе дальшей перспективи нашого драмского аматеризма. Наступели на нїм  13 театрални ансамбли: на тот завод 10 по руски (5 за старших и 5 за дзеци, по 2 „Дядьово”, а по єдна за старших зоз Петровцох, Дюрдьова и Коцура, а за дзеци єдна з Миклошевцох и 2 з Дюрдьова. Госци були аматере зоз Червинки и Смедеревскей Паланки, а професийни театер госцовал з Нового Саду.

Михайло Зазуляк у Народним календаре за 1991. рок (на 138. боку), под насловом „Єст цо запаметац” так прекоментаровал:

„Тогорочни ХХІІ драмски мемориял Петра Ризнича Дядї, смотра театралних досягох рускей народносци у Югославиї, отримани у Руским Керестуре 17. до 24. марца (1990. року – зам. Дю. Л.),  вшелїяк будзе запаметани и по тим же, за розлику од даскелїх прешлорочних, за собу охабел вельо глїбши коляї у нашим театралним живоце. Як кед би  ше ознова народзел зоз своєй пирнї и того 1990. року, у правим смислу, бул тото цо би и требал буц – швето култури и за театралних дїячох и за публику.”

Медзитим, по квалитету виведзених представох и по континуитету у роботи наших театралних ансамблох оптимизма чежко же єст. Як режисере на Трицетим мемориялу зявюю ше и нови особи, преважно млади. То добре, алє квалитет їх представох ище вше нє бул на задоволююцим уровню. Змена ґенерацийох була наисце потребна, окреме кед маме на розуме же през тоти три децениї цалу орґанизацию Меморияла и пририхтованє представох по наших местох окончовали углавним исти особи, котри тераз, на тим Мемориялу, були уж 30 роки старши и заслужели одпочинуц.

ПРИКЛАД ЯК ТРЕБА РОБИЦ

Фахови приказ виведзених представох  и того цо ше одбувало на ювилейним Трицетим мемориялу  у „Руским слове”  число 19 од 8 мая 1998. року (боки 8 и 9), под насловом „Каруци у угору”, дал наш познати театрални дїяч Дюра Папгаргаї. Тот його приказ може послужиц будуцим критичаром за приклад як треба у наших медийох представяц виведзени театрални представи. Закончуюци тот приказ вон призначел и тото:

„На закончуюцим вечаре спред орґанизацийного одбора Драмского меморияла директор Дома култури Яким Рац найзаслужнєйшим театралним активистом уручел памятни подзекованя. Таки подзекованя достали: Янко Лендєр, Нада Лендєр, Иван Папуґа, Яким Чапко, Яким Гарди, Мирослав Ґубаш, Мирослав Кевежди, Дюра Латяк, Дюра Папгаргаї, Славко Орос, Любица Дудаш, Микола Преґун, Дюра Макаї, Штефан Гудак, Силвестер Ґача, Янко Ґ. Рац, Михайло Варґа, Михайло Зазуляк, Агафия Рамач, Ана Рац, Ана Дудаш, Владимир Бесерминї и Йовґен Медєши. Окрем тих припознаньох Юлинови Стриберови и Владимирови Дудашови додзелєни традицийни награди „Петро Ризнич Дядя”.

Под час Меморияла друковани Билтен (9 числа), а пред завераньом Меморияла отримана промоция кнїжки „Трицец драмски меморияли Петра Ризнича Дядї”.

На святочни способ, зоз прикладну бешеду, ювилейни трицети Драмски мемориял завар Никола Чирович, заменїк покраїнского секретара за витворйованє правох националних меншинох, управу и предписаня.

Так зме ше одпитали од трицетого театралного швета нас южнославянских Руснацох. И могло би ше на законченю повесц: тельо зме жали, кельо зме шали. У часох яки жиєме у култури, та и на театралним полю, нє було лєгко угориц.”

Треба ту спомнуц же у тих 10 рокох одбули и значни политични пременки у нашей жеми, же ше розпадла  бувша  СФР Югославия, же ше у єй реґиону одбували граждански войни и преглашени вецей нєзависни держави. Шицко ше то неґативно одражело и на обставини у нашим културним живоце, та и у театралним аматеризме, окреме кед слово о  финансийней бази, котра ше углавним операла на буджетни средства.

БУЛА ПОТРЕБНА ЗМЕНА ҐЕНЕРАЦИЙОХ 

Патрене по чишлє виведзених представох од 22. по 30. Мемориял, мож повесц же Зазуляков оптимизем бул оправдани. То доказує слїдующи прегляд:

 

Мемо. Рок:         Вкупне число             Од того         Госци         Госци    

                             виведзених пред.     по руски       аматере      профес.   

ХХІІІ  1991              11                                   9                     1                 1              

ХХІV  1992                8                                    7                     1                 –             

ХХV   1993                8                                    7                      1                –           

ХХVІ  1994               9                                    7                      1                 1         

ХХVІІ  1995            14                                 10                      1                 3                             

ХХVІІІ 1996             12                                 7                      3                 2                          

ХХІХ   1997                8                                 6                      1                 1          

ХХХ    1998               11                                8                      2                 1      

 

(Предужи ше)

(Опатрене 66 раз, нєшка 1)