Вишла сом зоз системи котра ме давела

автор Розгварку водзел Борис ВАРҐА 21. марец 2018
BLOGI Vladimira Dorcova valtnerova NOVA

Початком рока, награду за интеркултуралносц Нєзависного дружтва новинарох Войводини достала бувша одвичательна редакторка „Гласа люду”, тераз нєзависна новинарка Владимира Дорчова Валтнерова з Маґличу.

Напущиц нєшка роботу на нєодредзени час у новинарстве и рушиц по драги нєизвесносци и виволаньох шлєбодного новинарства и блоґерства – шмелосц. Дорчова Валтнерова креирала власну онлайн платформу „Storyteller”. Опитали зме ше єй чи награда НДНВ сцигла у правим чаше.

Дорчова Валтнерова: Вшелїяк. На награду НДНВ патрим як одвит универзума на мойо питанє чи сом принєсла добру одлуку кед сом охабяла сиґурну роботу у „Гласу люду”. И наисце, тота одлука добра, прето же є моя, бо нє исную добри, або подли одлуки. Исную одлуки котри ци пременя свидомосц, способ роздумованя и отворя дзвери ґу другим можлївосцом, а исную и тоти цо нє почувствуєш. Дакус сом радикалнєйша у одлучованю, та моя одлука „екстремнєйша”, а така и природна. Чловек приходзи зоз природи, а цо нас учи природа? Ослуховац себе и свойо потреби. Ослухуєм себе и на живот патрим як на мозаїк виволаньох котри мушиме ришиц, превозисц, або прилапиц. Шмело сом и шалєно одлучела висц зоз системи, котра ме на одредзени способ давела, а нє удало ми ше „нагвариц” ю най ше модернизує, диґитализує, отвори ґу швету и най унапредзи роботну и новинарску етику. Така, покус анахрона, система ми особнє нє одвитує, бо любим виволаня, професийни авантури, та сом прето одлучела пойсц. Же бим ше зачувала така яка сом, бо сом длуго робела на прилапйованю самей себе. Тиж так, же бим зачувала колеґох од власних жаданьох унапредзиц ше и модернизовац новини, становиска котри редакция зо мну нє дзелєла, цо нє думам же нє добре. Так було у „Гласу люду” и я ту нє можем нїч. Алє можем зоз собу. Так у септембру 2017. насатала онлайн платформа „Storyteller”, цали рок сом рихтала свой одход зоз „сиґурних” редакцийских водох, односно зоз червених нєпознатих океанох до белавих, дзе виглєдуєм цо шицко можем и мож зробиц.

РС Цо ше случує у „Гласу люду” тераз?

Нє жадала сом ознова буц одвичательна редакторка  у тих новинох. Думам же енерґиї котри чловек ма у себе треба меняц у редакцийох, так же мандат од штири роки цалком достаточни же би ше дацо зробело, пришло до реализациї даякей редакторскей визиї. Кед нє мож вецей од того, прецо ознова исц на исту функцию? Критиковац треба ситуацию же новина од 74 рокох традициї мала два раз окончователя длужносци одвичательного редактора, два раз препаднул конкурс. Тиж так, меншински и векшински политични елити, котри створели нєздрави амбиєнт и атмосферу нє лєм у редакциї, алє и у цалей словацкей заєднїци, а можеме вшелїяк бешедовац и о ширшим контексту шалєнства.

Политични прициски директни, або индиректни, унїжованє редакциї з боку самопреглашених меншинских лидерох, вецейрочне, або вецейдеценийске упрепасцованє новинарства, индиферентносц и пасивносц дзепоєдних новинарох, формално нєдоповедзени одношеня медзи медийом и сновательом – меншинских совитох, релативно мали плаци и велька одвичательносц и ризик, реемиґрация Словацох у фаталних розмиирох. Цо ище додац на лїстину причинох прецо нє було заинтересованих за конкурс за одвичательного редактора „Гласу люду”?

РС Цо то „Storyteller”?

„Storyteller” то онлайн платформа котра промовує диґитални трансмедиялни сторителинґ (приповеданє цикавих приповедкох. – Ред.) у новинарстве. Хаснуюци даскельо медийни формати – од класичних писаних, фотоґрафийох, инфоґрафики, крадких авдио и видео знїмкох, як и других „алатох”, тот сайт обявює репортажи о людзох и збуваньох у автентичним окруженю, указуюци живот зоз правого угла и у правим шветлє.  „Storyteller” нє информативни портал. Почитуюци шицки норми и стандарди, „Storyteller” платформа на котрей у симбиози уметносц, новинарство и живот, цо и иновация у новинарстве (Словацох) у Сербиї. Бо, з малих приповедкох настава вельки живот.

Зоз сотруднїками нє будземе писац лєм о красним, алє будземе рихтац и анализи рижних дружтвених зявеньох, прето же ше нє можеме правиц же ту у Сербиї шицко у шоре. Плани нам меґаломански, алє кед ше зисци голєм малка часц того, будзем щешлїва новинарка и жена. Затераз то лєм онлайн платформа у форми блоґу, алє нєодлуга ше реґиструєм як медий и дам ше до подприємного новинарства.

На питанє цо чека медиї на язикох националних меншинох у року виберанкох за национални совити, Дорчова Валтнерова гвари же обчекує „иґранку”, прето же национални совити ище скорей руцели квачку меншинским медийом, алє нє шицки ище до нєй ”закушели”.

(Опатрене 85 раз, нєшка 1)