fbpx

Язичне и културне богатство у фамелиї

автор маз 13. май 2018

У обисцу Фодорових у Бачкей Тополї бешедує ше аж на трох язикох. Дзивка Лидия з мацеру Вирку одмалючка учела руски язик, з оцом Рудолфом по мадярски, а вєдно з нїма, як и у школи, и сербски язик. Лидия, асистентка и докторантка на новосадским ПМФ-у, чечно приповеда на шицких тих язикох.

Шицки тройо найчастейше приповедаю по сербски, алє ше, як Лидия толкує, розумя на гоч хторим од спомнутих язикох.  През франту гвари и же ше у нїх случує же дакеди у штред бешеди пременя язик, пре контекст теми…  

– Нїґда нє було проблем дома бешедовац на трох язикох, а знац вецей язики то праве богатство. Думам же окреме важне же знам и по руски и по мадярски, бо на тот способ доприношим и очуваню своїх кореньох и идентитету. Родичи од початку мали становиско же ми будзе хасновите знац шицки язики, и я ше зоз тим складам. Прешвечена сом же єдного дня и мойо дзеци буду бешедовац на шицких трох язикох – визначує Лидия, хторей любов ґу свойому пренєсли и баби, и дїдове.

– Баба и дїдо по мацери жили у Новим Орахове, а по оцови на салашу, блїзко при Орахове и Тополї. Велї школски одпочивки сом препровадзела у нїх, а любела сом пойсц и до єдних и до других, и наисце мам вељо мили памятки з того часу. У мацерових родичох сом мала и дружтво, шестринїцу и братняка. Баба и дїдо нам вилагодзели, бавели зме ше по цали дзень,  влєце купали на дворе, бавели ше зоз животинями, „помагали” баби у кухнї. И у другей баби и дїда бул полни двор з рижнима животинями, а любела сом з дїдом ходзиц на польо кед ишол кошиц. Вше сом любела валал, як и нєшка. То ми озда остало зоз дзецинства. Дїдове ми, нажаль, вецей нє жию, а баба, мацерова мац у Керестуре, а оцова у Тополї.

УСПИШНА ДОКТОРАНТКА И АСИСТЕНТКА

Лидия одросла до успишней студентки докторских студийох Информатики (рахункарски науки) на Природно-математичним факултету (ПМФ) у Новим Садзе, дзе роби и як асистентка.

– Закончела сом основни и мастер студиї Информатики (информацийни технолоґиї) тиж на ПМФ-у, а одлучела сом ше за информатику прето же сом вше любела математику и интересовало ме програмованє. Требало уложиц досц часу же бим студиї закончела начас, а то ишло вєдно зоз добрима оценами. На Факултету сом почала робиц такой после закончених мастер студийох, 2013. року. Задовольна сом, бо ми тота робота одвитує и любела бим предужиц робиц у тим фаху. Циль ми закончиц докторски студиї и напредовац. Мала сом и гонорарни роботи, наприклад, у штреднєй школи, зоз дзецми хтори були талантовани за информатику – гвари наша собешеднїца, хтора, кед почала робиц, зоз своїма студентами була скоро парнячка.

– Спочатку ми то було чудне, алє сом ше намагала буц коректна ґу нїм и пренєсц им цо вецей знаня. Тераз уж векша розлика медзи нами, а и звикла сом ше – наглашує Лидия, чий талант, труд и упартосц даскельо раз були препознати и наградзени.

– Доставала сом награди, медзи иншим, факултетски и универзитетски за успишни студиї, як и награду „Александар Саша Попович” за окремни успих за закончени мастер студиї и мастер роботу. Вше кед потребне и кед нагода, ходзим на конференциї и усовершованя же бим преширела свойо знанє и упознала ше зоз актуалносцами у своєй обласци. Була сом и на даскелїх домашнїх конференцийох, алє сом мала нагоду пойсц и, наприклад, до Шпаниї, Швайцарскей и Голандиї – толкує вона.

ЛЮБИ НОШИЦ ТОТО ЦО САМА УШИЄ

Окрем у своїм фаху, Лидия ужива и у читаню, одходу до природи, люби и пестовац квеце, шиц, лєбо вежбац у терховальнї.

– Як дзецко сом ходзела и на фолклор, до сербского и мадярского КУД-у, теди зме нє мали руски КУД. Интересує ме мадярска и руска култура, новосци, литература, и провадзим их кельо ми час допущує – гвари Лидия, а кед бешеда о єй гобийох, додава же окреме люби шиц и облєчиц тото цо сама ушиє.

– Кед треба, дома порубим фиронґи, партки и подобне, або дацо преправим. Зоз тим сом и почала, алє найволїм шиц шмати. Мац ме научела хасновац машину, як и шиц на рукох, а вона барз крашнє гекла и вишива. После сом зоз новинох и интернету учела як ше скрава. Тераз уж углавним сама видумуєм же цо сцем и як ушиц – визначує наша всестрана, успишна млада собешеднїца.

НА РОБОТУ ПУТУЄ

Гоч єй роботне место у Новим Садзе, Лидия ше опредзелєла за живот у своїм родним месце, та кажди дзень путує на роботу.

– Волїм шлєбодни час препровадзиц дома, як у даяким малим квартелю у варошу. Чежко повесц напредок цо будзе далєй. Можем себе задумац и у Новим Садзе и у Тополї, алє и даґдзе помедзи. Нїґда ше нє зна яки ше можлївосци познєйше отворя. Затераз нє плануєм пойсц анї до иножемства, алє остац ту – гвари Лидия.

(Опатрене 113 раз, нєшка 1)