fbpx

Ковалє власного щесца

автор мария перкович 18. май 2018

Пияток, 18. мая, першираз у Сербиї ше означи Дзень здогадованя на жени жертви насилства. По податкох котри збера Мрежа женох процив насилства, од початку януара по 8. май того року забити 20 жени. У периодзе од 2010. по 2017. найменєй 251 жену забили партнере, або члени фамелиї. Обисце найнєбезпечнєйше место за жени.

Тото цо з обисца додатно прави нєбезпечне место за жену, то факт же у Сербиї у приватних рукох исную вецей як 960 000 єдинки леґалного оружия. Скоро иста прецена и за число нєлеґалного штреляцкого оружия (од 200 000  до 900 000). Кажда треца жена у Сербиї забита зоз оружийом з котрого ше штреля, найчастейше з пиштольом.

Насилство котре дзеведзешатих рокох у своєй найгоршей форми знїщовало людзох, було нєобходне же би нєстала система вибудована на солидарносци. После войнох ше насилство лєм „преблєкло” до словох приватизация, тарґовецке змаганє, компетенция, транзиция, приватна инициятива/поднїмательство, проєкти, проєкти… И дацо дескриптивнєйше през психолоґию „самопомоци”, а цо нєобходна самоспреводзка знука общей природи насилства капитализма: „водз рахунку о себе…”, „роб на себе…”, „думай позитивно…”.

Же би тарґовище обстало, же би ше капитал вше и ознова могол акумуловац потребна война шицки процив шицких. Треба же би ше фурт продуковало нєприятельох, страх и мержню, же би ше потаргало кажду можлївосц солидарносци и же би ше безочно повторойовало спреводзку же „кажде свойо щесце кує”, стваряюци нам глїбоке чувство виноватосци и животней нєдозретосци.  

И перша адреса шицких тих илузийох, шицких формох насилства, упуцена женом. Жертви войни цивилє, насампредз жени. Перши жертви тарґовища жени, чи то пре нїзши плаци, чи пре списки за одпущованє, чи пре чеканє у шоре за роботу… Жени жертви фамелийного насилства, бо фамелия нє може вимкнуц насилству котре поставене як дружтвена вредносц.

И попри тим, вшелїяк же нїхто нє реаґує на прияви женох котри церпя насилство. Жиєме насилство як леґитимни и леґални дружтвени рамик, крашнє пише у Уставе, и то у пар перших словох. Зоз другима словами. И вшелїяк же зме сами виновати, бо, гат, кажде свойо щесце кує; кого зме себе вибрали, цо зме облєкли, прецо зме нє скорей, цо зме чекали, лєпше же бизме були цихо бо єст и горших, га озда нє будземе розпусни, а зоз чого будземе жиц?.. Така модерна епоха (и) з традицию патриярхату забива жени, допущуюци хлопом, котри тиж жертви системи, тот нєлюдски вентил – покалїч, зґаж, забий жену же биш себе олєгчал власну нєщешлїву психу и цело вистате на тарґовищу. И тота иста матрица котра наруцена женом преноши ше на шицких тих цо дружтвено слабши – на кажду меншину.

Ковалє свойого щесца, перше сами виковани у дружтвеним котлє насилства, поставени на свойо уж дефиновани места, шицко цо зоз щесца можу виковац зведзене на понїжованє и увредзованє тих цо слабши. Алтернатива – врациц ше ґу идеї солидарносци.

(Опатрене 52 раз, нєшка 1)