Рочнїци Сайма за оптимизем

автор мирон горняк кухар 21. май 2018

У 2018. року Новосадски саям означує вецей значни ювилеї, хтори на одредзени способ бешедую и о нашей дружтвено-економскей ситуациї у прешлосци, терашньосци и будучносци.

За розвой потребни стабилни и кельо-тельо предвидлїви условия роботи, як и механїзми обезпечованя „фер-плея” на тарґовищу, точнєйше, дахто ше муши нєпреривно старац о етики, моралу єдней заєднїци (проблем корупциї, монопола, шивей економиї, плаценя роботнїкох…). През коло сто роки, Новосадски саям прешол рижни дружтвено-економски форми шицких тих проблемох.

Од ювилейох, видвоюю ше 95 роки иснованя Новосадского сайму, ювилей Медзинародного польопривредного сайма 85. раз и 130 роки од кеди орґанизоване перше оценьованє квалиттета и од кеди першираз отримана вистава польопривредних продуктох.

Спатранє резултатох на Польопривредним сайме влонї, указує же за 10 одсто звекшани анґажовани простор за викладанє, як пошлїдок вименєней структури викладачох, односно було вецей тих хтори пришли з иножемства.

Того року, на отвераню Сайма, министер польопривреди и защити животного штредку Бранислав Недимович гварел же тераз час за ушоренє стану у польопривреди, после финансийней консолидациї у дружтве, же би людзе у аґрару достали вецей средства за свой труд.

У витворйованю цильох, медзи иншим, значне же на Сайме меморандум о сотруднїцтве у обласци польопривреди медзи Сербию и Зєдинєнима Арабскима Емиратами подписали министер Недимович и министер климатских пременкох и животного штредку ЗАЕ Тини Ел Зубеиди. Зоз спорозуменьом реґулована обласц безпечносци поживи, цо важне за вивоз сербских продуктох на тарґовище ЗАЕ.

– Треба повесц же слово о тарґовищу хторе може добре плациц и хторе глєда квалитетну робу, а по словох мойого колеґи Зубеиди, ми то маме – акцентовал Недимович.

Наздавайме ше же добре вихаснуєме тоту нагоду на тим познатим тарґовищу, цо нам значне за присутво и на других тарґовищох, окреме кед знаме як то чежко врациц ше и обновиц дїловни сотруднїцтва.

(Опатрене 35 раз, нєшка 1)