Найволї мальовац дацо маґичне

автор мзг 3. юний 2018

Елена Шомодї з Руского Керестура талантована за велї ствари, алє ше окреме визначує у подобовей уметносци. Гоч є тераз лєм штварта класа Основней школи, Еца, як ю волаю, малює и рисує уж „як велька”.

Єй талант було видно ище кед була мала, а нєдавно го препознал и маляр-аматер Янко Бики з Керестура, ґу хторому Елена ходзи на роботнї.

– Того року сом почала мальовац и на платну, зоз правима фарбами,  щеточками, шпахлу… Вельо сом од нього научела. Учи ме основи, як тримац щеточку, хасновац фарби, наприклад, же до трави мож положиц и жовту, червену, лєбо кафову фарбу, як и тото же барз важне одредзиц дзе слунко швици и цинї. Зоз длугоку, червену палїчку, лєбо як ю вон вола – дириґентску палїчку, указує ми цо добре, а дзе гришим – гвари Елена, хтора найволї мальовац и рисовац дацо интересантне и маґичне.

– Любим єднорогох, а и кед видзим красне нєбо предвечаром зоз шицкима своїма фарбами. Пред двома роками сом дома на мур нарисовала „Frozen”. Найволїм робиц зоз клайбасом. Припатрам ше на даяки слики, алє найчастейше опатрам на Ютюбу же як дацо нарисовац. Кед видзим цошка цо ше ми барз пачи, нє да ми мира, мушим тото и сама нарисовац – толкує талантована, млада уметнїца Еца.

И у школи Елена найволї подобове, алє док вирошнє, заш лєм би нє сцела буц уметнїца.

– Сцем же би ми то бул лєм гоби, а любела бим буц учителька анґлийского, можебуц воспитачка, лєбо, як мой тато, наставнїк технїчного, од хторого сом и нашлїдзела талант за подобову уметносц. Дакус ми уж допило же ше шицки чудую, випитую ше же як знам и можем так, а я нє мам одвит на тото питанє – припознава нам Елена.

Мушиме спомнуц и тото же Елена схопна и надарена и за велї други ствари. Зна грац на клавиру, ходзи на фолклор, на карате, на плїванє до Вербасу, на анґлийски язик, шпива, люби ґимнастику, правиц дацо креативне, алє ше нє може одлучиц же цо од того шицкого найволї…

Елена зоз шестру и шестринїцами

(Опатрене 190 раз, нєшка 1)