fbpx

Каждодньово з нєкаждодньовим

автор Цецилия Надь 7. юний 2018

Фриштик у Паризу, вечера у Дубаию и полудзенок у Москви? Гей, наисце можлїве. Путовац, видзиц швет, нащивйовац городи… Живот стюардеси очи припатрача видза як живот зоз снох. А як випатра швет, людзе, розлични култури, алє и нєкаждодньово єдла и обичаї, виприповедала нам Николина Бабич з Руского Керестура, котра ше каждодньово дотика зоз нєкаждодньовосцу.

Николина гвари же тоту роботу волї наволац животни стил як роботу, прето же ше од вельо койчого одрека же би ище вецей дожила и видзела.

– Нє мож почитац нєпреспани ноци, прескочени єдзеня, вистатосц, осаменосц, прескакованє мацерового родзеного дня, товаришковей свадзби и велїх шветох… а то лєм даскельо фактори зоз котрима ше стретам на драги зоз єдного континента на други. Вшелїяк, кед ше огляднєм же сом за остатнї два роки нащивела вецей як 50 вароши, у 40 розличних жемох на пейц розличних континентох, чувствуєм ше як найщешлївша особа на швеце – гвари Николина.

Здобути памятки оставаю вично у паметаню и збогацую особу, так же мож повесц же єст вецей позитивни, як неґативни боки того стилу живота.

– Кед бешедуєме о позитивних бокох, найвекши упечатки на мнє  охабяю розличносци зоз котрима ше стретам на каждодньовей драги през хмари. Кажда нова култура научи чловека же би насампредз ценєл свою културу, а вец и цудзу. Кельо ґод путуєм и нащивюєм жеми, нєпреривно ме дацо нове фасцинує. Поведзме, на Тайланду ше кажде поклонї и привита вас зоз найвекшим почитованьом, гоч нє знаю анї як вам мено, анї одкадз приходзице. А у тей истей жеми можеце на улїчки цалком найнормалнєйше поєсц пражену шкорпию, паука або боґара и повесц же сце пробовали тайландски специялитет – толкує Николина.

О ЛЮДЗОХ, РОЗЛИКОХ, АЛЄ И ПОДОБНОСЦОХ

Кажда жем по дачим окремна и ма свойо характеристики. Як гвари Николина, людзе зоз азийских жемох заварти и поцагнути, алє су барз госцолюбиви, почитую и каждого сердечнє привитаю. Вельки упечаток на ню охабели и людзе зоз Австралиї и Нового Зеланду. Людзе змирени, жию здрави животи, уживаю у живоце – гоч нє треба занєдзбац фактор високого стандарду живота и квалитетно розвитей жеми.

– Цо ше менталитету самих людзох дотика, я робим зоз вецей як 100 националносцами, так же сом уж у Дубаию обачела културолоґийни розлики, алє права култура народу ше дожиє аж кед ше нащиви даєдну жем. Тераз кед ше врацим до гоч котрей европскей жеми, чувствуєм ше як дома. Найцикавша и найинтересантнєйша култура праве тота котра ше розликує од нашей. Ту бим начишлєла даскельо азийски жеми, як цо то Виєтнам, Япон, Индия, и пар африцки жеми, як цо то Кения, Сенеґал, Ґвинея и други – толкує млада стюардеса и додава же дараз думаме же жиєме у худоби и заоставаме за шветом, алє аж кед на свойо очи видзиме же даєдни людзе ходза боси, же нє знаю цо то мобилни телефон и же єдза тото цо маю у своїм окруженю, похопиме же зме богатши як цо думаме. Америка ше нє нательо розликує од того цо нам познате, праве прето же зме прилапели часц заходного способу живота, єдзеня, анґлийского язика, и то прейґ сучасного способу живота котри жиєме.

– Як вельки любитель розличних кухньох, специфични єдла котри сом пробовала и котри ми ше наисце спачели то тайландски пад тхаи, японски суши, мисо юшка, южноафрицки бифтек, русийски борщ и ище велї рижнородни деликатеси. Єст ту и даяки котри цалком вонка зоз моєй конфорт зони, и котри сом уж скорей спомла, а то пражена шкорпия на палїчки и поховани хробаки сервирани у фишеку, место чипсу и ґрисинох – гвари Николина.

У ДУХУ БУДУЧНОСЦИ

Дубаи ма коло три милиони людзох, од чого лєм дзешец одсто локални жителє, а шицки други жителє приходза зоз розличних жемох зоз цалого швета. Людзе индийскей националносци забераю вецей як штерацец одсто жительох Дубаию, за нїма ше находза Пакистанци, Филипинци, Тайландянє и други.

– Дубаи ше почал розвивац ’70-их рокох зоз пренаходком нафти на тим подручю. Так город почина роснуц, од пустинї до метрополи, шириц ше и доставац футуристичну перспективу. Велїчезносц будинкох, драгох и швидкого способу живота основа городу. Поведзме, нїґдзе нє мож сцигнуц пешо, прето же город повязую авто-драги. Попри самей архитектури котра иншакей димензиї, ту и културолоґийни розлики. Алє без огляду на тото же ше почитує ислам як релиґию, барз су прилагодзени и ґу другим културом. Людзе думаю же ше странци цалком муша прилагодзиц ґу їх култури, цо нє точне – толкує Николина.

Метропола дава шицки можлївосци – плажи, рекреацию, виглєдованя дзивей пустинї, сафари, кина, театри, як и ноцни живот, котри цалком прилагодзени ґу заходному способу живота. Од блїзковиходних жемох, Дубаи то найлибералнєйши город.

– Єдини период у року кеди ше треба прилагодзиц ґу култури и релиґиї тей арабскей жеми, то праве мешац рамазану. Теди ресторани, кафичи, и векшина явних местох траца свою шлєбоду през дзень и город цалком уцихнє. Рамазан у периодзе кед найвекши горучави, и до 50 Целзиюсових, так же з тим и горучава гаши хвильку шлєбодного рушаня по городу. „Public affection” и виголєне облєканє нє дошлєбодзене, ґенерално, у Дубаию. Цо ше облєчива дотика, локалци ноша углавним їх традицийни облєчива. Кандора за хлопох (била сукня) и абая за жени (чарна сукня). Абая подрозумює прекрити власи, алє нє и твар. Бурка, котру слабо хто ноши, подрозумює прекриту твар дзе лєм очи одкрити. Можем заключиц же Дубаи перспективна жем за заробок и напредованє у кариєри. Наисце мож розвиц вельке животне искуствиє, патраци зоз перспективи єдней особи котра походзи з малого валалу. З другого боку, Дубаи млади варош и нє ма историю, нє ма културу, музеї, дух прешлосци, шицко у духу будучносци – заключує Николина.

 

Николина нащивела велї жеми, а даскельо места и будинки єй зисцели животни сни. То Биґ Бен у Лондону, Тaймс Сквер у Нюйорку, Китайски мур у Пекинґу, Голивуд у Лос Андєлесу, Айфелова турня у Паризу, Опера у Сиднею и ище велї други фасцинантни историйни памятнїки и будинки.

– Од шицких жемох котри сом нащивела, єст даскельо африцки жеми до котрих бим ше гоч кеди дзечнє врацела. Еґзотичносц Кениї, дзивина Зимбабва и райска природа Южноафрицкей Републики визначую ше од шицких конвенционалних жемох. Перше путованє ми було праве до Зимбабва. Сафари у Харареу то єдно з моїх найупечатлївших искуствийох котре сам дожила. Директне стретнуце зоз загрожену файту билих носороґох, лєвами котри ше шлєбодно рушаю по своїм пребувалїщу и беби жирафи котри збунєто и нєвино патра на вас же цо ше шлїдуюце будзе збувац, прето же нє звикли на цивилизацию, отвера вельо нови горизонти – гвари Николина.

(Опатрене 203 раз, нєшка 1)