fbpx

И нови и стари мена, а шицки добри

автор Иван Сабадош 8. юний 2018

Фото: Андреа Новак

Тогорочни фестивал „Еґзит” будзе отримани од 12. по 15. юлий на Петроварадинскей твердинї, а главне порученє манифестациї хтора и того року ноши епитет найлєпшого европского велького фестивалу – Шлєбода, односно „Пренайдзце Еґзит у себе”

 Паралелно з тим як ше помали розпредаваю атрактивни пакети уходнїцох по промотивних ценох (на дньових картох ище мож зашпоровац 60 одсто,  на комплету 55 одсто, а ище тирва акция 4+1), орґанизаторе сообщую и вше прецизнєйши лїстини учашнїкох и розпорядки наступох през штири фестивалски днї.

Розумлїве, найвецей уваги прицагую гвизди хтори наступя на двох найпопуларнєйших фестивалских бинох – Мейн стейджу и Денс арени.

На Мейн стейджу того року примат будзе тримац електроника – шветово популарни ди джей и продуцент Давид Ґета и гвизда новей ґенерациї Мартин Ґарикс ту буду пущац свойо сети. Чесц актуалним гвиздом и гвиздочком, алє през роки ше указало же на Мейну найлєпши концерти тримаю ветеранє: tераз ше то очекує од икони осемдзешатих Ґрейс Джонс, а потенциял ма и Зиґи Марли, музичар хтори реґе уведол до 21. вику. Просто з верху топ-лїстинох, на Еґзит приходзи и Алис Мертон, а приємне нєсподзиванє могол би буц и наступ Фивер Рей.

На Денс арени и того року музику буду пущац водзаци мена електронскей сцени. Техно минималиста Ричи Хаутин, пионир техно звуку Карл Крейґ, актуална гит сензация Офенбах, як и ди джей героїна Нина Кравиц. Вшелїяк, ту ище дзешатки интересантни мена, а мож обчековац же на Арени журка штири днї будзе тирвац од змерку по швитанє. Интересантне же велї з лайн-апу тогорочней Денс арени нє буду наступац першираз у Новим Садзе, алє ше дзечнє врацаю на Петроварадинску твердиню.

Широкей Еґзитовей публики найинтересантнєйши спомнути стейджи, алє на Твердинї єст и други скрити оази дзе фестивалски дух затримал автентични шмек. Фюжн бина, звичайно наменєна алтернативи и реґионалним гвиздом, того року будзе неопанкерска. Окрем Ейжн Даб Фондейшн, ту наступя бенди Слейвс, Айдлс. З другого боку, бина Експлозив, дзе ше грає и слуха твардейши звук, того року удоми ветеранох – гардкорашох Медбол, калифорнийских гардкор-панк пионирох Адолесцентс, и родоначалнїкох Ои! Панк жанру, лондонски бенд Кокни Риджектс. Вшелїяк, ту „пражиц” будзе и ґалерия метал составох рижних жанрох и напрямох.

То затераз лєм часц понукнуца тогорочного Еґзиту. Ище ше пополнюю програми на менших бинох, дзе наступаю локални мена и виводзаче хтори комуникую зоз специфичну публику, а орґанизаторе обецую же приповедка нє закончена анї кед слово о „вельких” бинох, дзе тиж будзе ище нєсподзиваня.

Вичерпни и швижи  информациї  о наиходзацим Еґзиту кажди дзень мож опатриц на урядовим сайту фестивала: exitfest.org/sr.

(Опатрене 107 раз, нєшка 1)