fbpx

Увидзице го нєшка на „Еґзиту”

автор апм 13. юлий 2018

Федю волаю и „сербски Джим Морисон”, найбаржей пре його випатрунок, а гваря и же є музична реинкарнация тей гвизди, т. є. вокали им скоро подполно исти… Праве прето The Doors, Lost Paris Tapes, єден з „най” домашнїх составох медзи любителями року позних шейдзешатих.

Федя Полдруги у Вербаше закончел основну школу, а вец и вербаску Ґимназию. Кед слово о студийох, його перше опредзелєнє була джез академия у Амстердаму, на одсеку – джез клавир.

– У медзичаше, док сом ше рихтал за таку файту примацого испиту, на телевизиї сом патрел емисию у хторей була госц Мадам Пиано. Теди сом ришел пойсц до нєй на даскельо годзини шпиваня, понеже сом уж теди шпивал по бендох. Барз ше ми попачело, та першобутна одлука же упишем джез клавир була заменєна зоз джез шпиваньом. Тото сом и уписал на Новей Академиї у Беоґрадзе – приповеда Федя хтори ше на трецим року джез шпиваня уписал ше и на Висшу електротехнїчну школу, напрям за авдио и видео технолоґиї. Теди источасно ходзел до двох школох. 

– Уписал сом авдио и видео технолоґиї, бо сом сцел злучиц музичну слику, упознац и єй технїчни бок (знїманє, продукцию, микс, мастер…). Музичну академию сом закончел на ВИСЕР-у, здобул воланє фахового инжинєра електротехнїки и рахункарства (после закончених основних студийох) и остава ми ище лєм закончиц други рок мастеру мултимедиялного инженєрства – гвари Федя хтори нєшка фаховец у двох обласцох.

ОДМАЛЮЧКА МАЛ ПОТРИМОВКУ

Єдна з перших Федьових меморийох вязаних за музику була кед му мацеров брат указал як ше грає часц „Турского маршу” на синтисайзеру.

– Познєйше мой власни брат Ваня мал приватни годзини на клавиру дома, та сом ше часто припатрал. Мал сом теди 6 роки, и на гранє сом патрел як на бависко, а нє як на дацо цо мушиш вежбац – гвари наш собешеднїк хтори ходзел и до Основней музичней школи у Вербаше, на напряме за клавир. 

Як гвари, фамелия одбавела значну улогу у його занїманю з музику. Кед родичи похопели же од музики нє одустанє так лєгко, купели му електрични клавир.

– Упознал сом ше и зоз акустичну ґитару, и на нєй сом през лєто нєпреривно грал. Каждодоньово сом ходзел до пайташа хтори мал ґитару и вежбали зме по цали дзень. Одтеди сом кажди заробок наменєл за купованє другей клавиятури, ище дзепоєдней ґитари, микрофону, звучнїкох, опреми за знїманє… – задовольно приповеда Федя и гвари же одход на студиї бул виход зоз комфорней зони, упознаванє нового велького городу, велїх людзох зоз швета музики.

 

ЗНЇМАЛ ПИСНЇ И ЗА ПОЗНАТИ РАЙЗОВАНИ ФИЛМИ

– На другим року авдио и видео технолоґийох указала ше ми нагода пойсц до Америки на 5 мешаци, а найвекши упечаток на мнє охабели Tia Sillers (добитнїца Grammy-я за тексти хтори писала за бенд Dixie Chicks) и Mark Selby (наступал зоз B.B.Kingom, Jeff Beckom, Lynard Skynard), з хторима сом грал. Шпивач сом The Lost Paris Tapes doors tribute бенду, мам албум зоз Project Oddist и у тей хвильки робим на проєкту Федя – приповеда нам Полдруги, а интересантне тото же знїмал писнї за райзовани филми „Бадемани” и „Маша и медведз”.

Инспирацию достава зоз рижних бокох.

– Дацо чуєм на драже, дацо з кнїжкох хтори читам, дакеди зоз интересантних приповедкох, а дакеди ше инспирация случи сама од себе… Шицки писнї хтори сом компоновал настали на тот способ. Даєден мотив ше ми длуго мота по глави, же би на концу у єдней хвильки цошка „кликло” и шицко ше поскладало на свойо место – гвари вон и додава же би музику хтору твори наволал як файту алтернативного року.

А наступал у Беоґрадзе, Новим Садзе, Суботици, Крушевцу, Нишу…

– Найвецей наступам зоз Doors tribute бендом, „свирки” маме у Беоґрадзе и Новим Садзе, а однєдавна и у Заґребу, Веленю, Риєки… Грали зме и на фестивалу у Маґдебурґу, у Нємецкей – приповеда наш собешеднїк хтори соло наступи мал по клубох у Беоґрадзе и на „Ґрадич фесту” у Новим Садзе прешлого року („Festival uličnih svirača”). Джез музику, хтору грає у сотруднїцтве з Милану Попович, углавним, познаю Беоґрадянє.

ПЕРШИ КОНЦЕРТ ЗОЗ ДОРСАМИ

Кед слово о наступох, постоя концерти хтори на ньго охабели окремни упечаток.

– Перши концерт зоз Doors-ами звонка Вербасу бул у Нишу, кед сом починал сотрудзовац  зоз бендом,  нє знал сом цо обчековац. Концерт у Колораду зоз Tiu Sillers и Mark Selby-oм бул сиґурно єден з вельких искуствох. Перши концерт у иножемстве, тиж зоз Doors tribute бендом, у Маґдебурґу…. А найновше цо ше ми случело, то же сом шпивал провадзаци вокали зоз Gramophonedzie Live Experience у BelExpo центру опрез 3 тисячи особох – приповеда Федя хтори ма ище єдну, як гвари, скриту любов и гоби, а то мадїоничарство. Могол би годзинами патриц и одлучовац хтори карти купиц…

На концу, наш млади, успишни, и уж нательо витворени собешеднїк, хтори ше цалком пренашол у музики, младим людзом хтори би евентуално рушели по подобней дражки поручує же найзначнєйше висц зоз зони комфору и страсно провадзиц драгу за хтору ше дума же є тота права.

НОВИ ПИСНЇ, НОВИ НАСТУПИ

Федя тераз „фриленсує” на даскельо платформох дзе ше занїма зоз авдио репарацию, дизайном звучней слики, знїманьом рижних инструментох… 

Першираз того року зоз Doors tribute бендом будзе наступац и на Exit фестивалу, на Craft Street стейджу, нєшка 13. юлия, од 22 годзин. Хто ше там найдзе най го идзе послухац…

А гевти хтори би ше упутиц до Федьовей творчосци, його прекрасну найновшу писню „Souls on Fire” можу послухац на YouTube…

(Опатрене 111 раз, нєшка 1)