fbpx

Народи през фотоґрафиї

автор влдї 22. авґуст 2018

Петар Дешич зоз Челарева нєдавно пребувал у Сриме, точнєйше у Бикичу, пре пририхтованє фото-моноґрафиї о Руснацох. Закончел технїчни Факултет, нє роби у своїм фаху, алє ше занїма зоз фотоґрафию през  хтору жада приказац национални заєднїци у Войводини.

Як нам гварел, до Шиду и Сриму пришол треци раз, бо пред тим пририхтовал фото-моноґрафию о Словацох хтору успишно закончел. На питанє же цо го мотивовало же би на таки способ приказовал национални заєднїци у Войводини, одвитовал:

– Фотоґрафия моя велька любов, а думам же дахто хто звонка заєднїци хтору приказує тото зроби обєктивнєйше як дахто хто єй припада. Намира ми, насампредз, приказац обичаї вязани за пририхтованє млодей за винчанє у шицких националних заєднїцох, алє и дзепоєдни други обичаї и традицию хтору зачували по нєшка. Тота робота вимага досц пририхтованя, контактованя з людзми на терену… Перше обиходзим жадане место, приповедам з людзми, а вец шицко тото и призначим – гвари Дешич.

У поради зоз КПД „Иван Котляревски” з Бикичу, вон призначел рихтанє рускей млоди у тим валалє, як и други сеґменти вязани за живот Руснацох у тим валалє. Жаданє му було приказац каждодньовосц хтора преткана зоз прешлосцу у автентичним амбиєнту.

Наш собешеднїк нам надпомина же тота робота длуго тирва и можебуц будзе тирвац и цали рок. Ма намиру нащивиц и дзепоєдни други руски валали у Войводини,  призначиц обичаї, окреме означованє найвекших християнских шветох як цо то Крачун и Велька ноц. Додава и же за виробок фото-моноґрафиї о Словацох мал потримовку од тей националней заєднїци, як и од Министерства за дияспору у влади Републики Словацкей, а тиж и амбасадорки Републики Словацкей у Беоґрадзе. Вистава фотоґрафийох була виложена у даскельо городох, а на єшень ма буц у Братислави.

– Пририхтованє млодей за свадзбу през фотоґрафию мам намиру приказац и при Мадярох, Шокцох, Бунєвцох и Румунох. Любел бим пойсц и до Чарней Гори и дац приказ чарногорскей млодей, як и до Босни и Герцеґовини. Будзе то праве богаство розличносцох – гварел Дешич, хтори по походзеню зоз Далмациї, а на тоти простори пришол 1995. року. Гвари же потераз упознал и надосц Руснацох у Войводини.

(Опатрене 40 раз, нєшка 1)