fbpx

Наймладши столнотенисер

автор мзг 27. авґуст 2018

Скорей сцел буц музичар, а тераз жада же би єдного дня бул „прави” столнотенисер.

– Сцели зме купиц микрофон, а до конца зме купели рекети и дома на стол намонтирали мрежочку. Потим сом почал тренирац у „Русину”. Тренираю ме Стефан Горняк, лєбо Драґан Ковачевич – гвари Мартин.

Наймладши столнотенисер у „Русину”, Мартин, виприповедал нам и цо потераз научел.

– Правила хтори сом потераз научел то же треба заврец рекет кед ше биє, научел сом форхенд, бекенд, спин. Нє треба барз вельо бегац, лєм тамаль кадзи придзе лабдочка, а мож и вискочиц, та вец треба вдериц лабдочку и швидко ше врациц ґу столу – потолковал нам Мартин. 

Тренинґи ма вечар, а вони тирваю годзину, гоч би Мартин любел кед би були и длужей. Тиж так, любел би почац тренирац и фодбал.

 

– Вше сцем ище остац на тренинґу. Починаю од осем вечар, а пред тим бим требал дакус одспац, лєбо ше лєм одпочинуц, же бим мал вецей моци и енерґиї – гвари вон. 

Гоч ма лєм шейсц роки, Мартин уж бул и на двох змаганьох. Перше у Новим Садзе, а потим у юнию и у Бачу, дзе ше му удало освоїц друге место.

– Победзел сом младшого од себе, а старшого нє. Кед сом достал медалю бул сом радосни, а кед сом нє достал, нє бул сом жалосни. Тераз сом на розпусту, алє починам тренирац концом авґуста. Любел бим достац ище медалї, шицко ми єдно хтору, лєм нє бронзову. Чом? Так… Лєм треце место нє сцем – гварел нам одлучно тот мали столнотенисер. 

(Опатрене 137 раз, нєшка 1)