fbpx

Дзецом и аматером швидше на колєсох

автор влдї 31. авґуст 2018

Комби хтори Национални совит Руснацох дал на хаснованє до Сриму од велького хасну. Потераз є вожени коло 150 раз, а направени коло 20 000 километри. Поряднє отримованє комбия як и реґистрация иду на трошок Националного совиту.

Од юния 2016. року Национални совит Руснацох дал на хаснованє комби превозку за дзеци, хтори факултативно уча руски язик, виронауку и за потреби аматерох руских дружтвох зоз Шиду, Бикичу, Бачинцох и Беркасова Основна намена хаснованя комбия праве за потреби лєпшей рухомосци и повязованю школярох котри уча мацерински язик и виронауку у шидскей општини.

– Циль же би ше зазберовало дзеци по наших местох и их одвоженє на место дзе ше отримує руски язик и виронауку же би ше олєгчала роботу учительки и паноцови, указало ше як барз добре. Дзеци ше медзи собу упознали и розвили свидомосц о тим же таких Руснацох хтори уча по руски єст и у других местох и заинтересовало их за глїбшу учасц у рускей култури. Зоз того ше кус познєйше формовала и дзецинска драмска секция, хтора роби як надбудов виучованя руского язика и хтора мала вецей успишни наступи по наших местох. Мож повесц же континуована робота зоз дзецми дава резултати, а тото би без комби превозки нє могло буц витворене – гвари Наташа Еделински Миколка, подпредсидателька Националного совиту Руснацох и координаторка Подручней канцелариї Националного совиту Руснацох у Шидзе.

Як гвари наша собешеднїца, гориво за примарну намену комбия  зоз найвекшей часци обезпечел Национални совит Руснацох. Часц средствох, хтори покриваю трошки превозу за проби и наступи дзецинскей драмскей секциї, достати од КПД „Дюра Киш” зоз Шиду, а часц од компензациї за амортизацию, котру ше достава през гориво од пожичованя комбия за намени хтори нє спадаю под примарне хаснованє.

Комби дочасово хасную КПД „Иван Котляревски“ зоз Бикичу и КПД „Дюра Киш” зоз Шиду, за потреби одходу на наступи, або за орґанизованє пробох. У тим случаю трошки горива зноши Дружтво хторе хаснує комби. Же би примарне хаснованє комбия, як и його пожичованє було як спада, постої Правилнїк, а о пожичованю за нєпримарни наменни на териториї Сербиї одлучує трочлена комисия. Согласносц за пожичованє комбия за длугши драги и драги до иножемства дава Вивершни одбор Националного совиту под условийом же ше комби у глєданим термину нє хаснує за примарни намени. Комби ма даскельо шоферох, хтори маю согласносц од Националного совиту же би го вожели, а хтори по потреби вожа комби и за примарни и за нєпримарни потреби.

– Потераз комби вожени коло 150 раз, а направени коло 20 000 километри. Попри назначених наменох, комби ше вецей раз хасновал и звонка примарней намени, та и звонка рускей заєднїци, як и за потреби Националного совиту, або других руских институцийох. За потреби рускей заєднїци комби вожел и рижни ґрупи до иножемства. Поряднє отримованє комбия, як и реґистрация, иду на трошок Националного совиту Руснацох, а менши укладаня до превозки мало и КПД „Дюра Киш”. Умиванє комбия идзе на трошок хасновательох як зоз Правилнїком и предвидзене – гвари Наташа Еделински Миколка.

ЗАДОВОЛЬНИ У КПД „ДЮРА КИШ”

У КПД „Дюра Киш” у Шидзе гваря же су барз задовольни же достали комби на хаснованє.

– Барз нам помага у роботи, бо то олєгчало превоженє дзецох, окреме зоз валалох, кед приходза до Шиду на проби драмскей секциї. Тиж и кед треба пойсц на наступ. Нє мушиме волац родичох же би на особних автох превожели дзеци. Думам же задовольни и дзеци и родичи, а зоз догварку хснованє комбия барз добре – гвари Златко Манько, предсидатель КПД „Дюра Киш”.

ПРАВИЛНЇК

Же би примарне хаснованє комбия, як и його пожичованє, було як спада постої Правилнїк, а о пожичованю за нєпримарни намени на териториї Сербиї одлучує

трочлена комисия. Согласносц за пожичованє комбия за длугши драги и драги до иножемства дава Вивершни одбор Националного совиту под условийом же ше комби у глєданим термину нє хаснує за примарни намени.

(Опатрене 164 раз, нєшка 1)