РАЄВО СЕЛО (ГОРВАТСКА) – У Раєвим Селу 12. новембра, кед ше по новим календаре означує швето св. Йосафата, означени Кирбай зоз вельочисленима священїками обидвох обрядох, та аж и зоз ефендийом Идризом Бешич зоз сушедного валалу Ґуня.

Святочну св. Литурґию предводзел о. Владимир Седлак, парох зоз Петровцох и заменїк славонско-сримского викара, а сослужели зоз нїм ище грекокатолїцки паноцове зоз Митровици, Миклошевцох, Вуковару, Славонского Броду, Прнявора и Канижи, як и седемцме римокатолїцки священїки, медзи котрима и єден зоз Бенину, зоз Африки котри на служби у Жупанї.

Цалу Службу шпивали сами вирни, предводзени зоз дзиячку Єлку Джуня, апостол по руски читала дзивка Меланка Грубеньова, а євангелию по руски паноцец Роман Ступяк зоз Миклошевцох. Його оцец, Микола Ступяк, парох зоз Канижи наказовал по руски и горватски о екуменским значеню нашого грекокатолїцкого мученїка и владики Йосафата.

У парохиї єст коло двацец руски грекокатолїцки обисца. После святочней Служби, числени паноцове, державни представнїки Жупаниї и места Раєво Села, числени госци, зишли ше у державней сали коло католїцкей церкви дзе ше и надалєй дружели.