fbpx

Ужива бавиц процив моцнєйших екипох

автор сас 8. децембер 2018

И наша собешеднїца Анамария Бабич з Дюрдьова припознава же фодбал баржей хлопски спорт, алє  то нє значи же го жени, дзивки и дзивчата нє можу бавиц. Єй потерашня кариєра нагадує же го можу бавиц на истим уровню и єднак борбено як и хлапци.

Анамария ма 15 роки и тей єшенї уписала ше до першей класи Транспортней школи у Новим Садзе, на напрям технїчара драгового транспорту. През тидзень, док ма школу, жиє у Доме за школярох, а кед ше рихтала до интернату, перше цо спаковала до своєй торби була лабда за фодбал. З ню ше вше любела бавиц, а  найволєла биц на ґол док бавела фодбал з хлапцами опрез бабовей хижи. Єй товаришка тренирала фодбал, пожадала и вона, та пошла з пайташку на тренинґ. Була у другей класи основней школи, и од теди нє престала бавиц фодбал. После матичного Женского фодбалского клуба „Бачка” Жабель, за хтори наступала три роки, фодбал почала бавиц у Спортским здруженю женского фодбалу „Стаїчево 2017” у Стаїчеве при Зренянину. Наисце нєзвичайна подїя допринєсла тому трансферу:

– Мали зме порядне змаганє, а мнє тренер положел же бим бавела процив своєй екипи, у процивнїцкей. Бавела сом за СУЖФ „Стаїчево 2017” зоз Стаїчева. Перше ми було барз нєзвичайно бавиц процив своїх, алє сом свойо задатки на терену сполнєла. Змаганє ше закончело, у „Стаїчеве” озда були задовольни, пошвидко ме поволали и почала сом бавиц за нїх – толкує Анамария, и гвари же ше указало як добре же прешла бавиц до Стаїчева, бо єй матични клуб пошвидко престал робиц. З другого боку, Стаїчево центер женского фодбалу у штреднїм Банату. Сениорки бавя у Другей лиґи Сербиї ґрупа сивер, док кадеткинї наступаю у Розвойней лиґи Сербиї ґрупа сивер. У остатнєй сезони бавела у сениорскей ґрупи, алє кеди-нєкеди и за кадеткинї.

НУЖНИ И ТАЛАНТ И ТРЕНИНҐ

Понеже ше нєдавно уписала до штреднєй школи и же ма нови обавязки, нє зна же чи попри шицкого нового цо ше єй случує, годна шицко постарчиц, и ґу тому и далєй бавиц фодбал. Дзеку ма, бо люби спорт, люби адреналин и люби ше змагац, алє ище увидзи цо будзе далєй док почнє ярня часц сезони. З оглядом же почала жиц у Новим Садзе було би єй єдноставнєйше бавиц за даєден клуб у тим варошу, як путовац до Стаїчева. Медзитим, пре спомнути причини, затераз ше обава од такей пременки. Конкуренция у векших клубох моцна, драга по перши тим длугока и фодбалу би ше мушела цалком пошвециц, кед нє сце шедзиц на лавочки. У Стаїчеве є добре позиционована и затераз тото нє сце меняц.  

– Хто сце буц добри спортиста, муши буц пошвецени тренинґом и змаганьом. Муши ше одрекац свойого шлєбодного часу, окреме „ноцного живота” под час сезони. Прето сом препущовала велї и рижни друженя. Нє мож постарчиц и єдно и друге. У ствари мож, алє ше вец дацо нє пороби як треба, бо робиц и єдно и друге у исти час барз вичерпа – гвари фодбалерка Анамария.

ЛЮБИ ВИВОЛАНЯ

Анамария длуго бавела на позициї бека, алє ю нови тренер положел же би бавела на позициї штопера у остатнєй линиї. З тей позициї цага и надпатра цалу екипу, а найволї прервец процивнїцки напад и одняц им лабду:

– Любим спортски виволаня. Слабших и нєзаинтересованих нє любим мац анї у екипи, а ище менєй бавиц процив нїх. Бо, вец допито и нєт виволаня. Любим бавиц процив моцних екипох, як цо фодбалерки ФК „Войводина”. Велї ше з мойого тима боя бавиц процив нїх, а я ше праве теди  найбаржей радуєм. Змаганє возбудлївше и вельке виволанє одняц им лабду – гвари Анамария.

– Фодбал хлопски спорт, бо физично вельо вимага, алє го може тренирац кажде хто жада. Хлапци маю моцнєйши и интензивнєйши тренинґи и прето з нїма любим мац кондицийни тренинґи. Вец без проблема вибегам шицки 90 минути. Дзивки котри бавя фодбал муша буц борбени, нє бац ше од контакту и процивнїка на терену, а збелавена рука або нога за мнє нїч нє нове бо кед ше бави з моцну екипу, то цалком нормалне – толкує  Анамария. Гвари же треба знац добре вдериц лабду з ногу, алє и з главу – а нє же би лабда вдерела тебе. У фодбалу треба мац добру технїку, алє и физичну и психичну порихтаносц. Припознава же єй моцнєйши бок психична и физична порихтаносц, а єй тренер вецей раз гварел же ше добре знаходзи у простору, зна ше позиционирац у цеку бависка, як и тримац под контролу шицких бавячох. Тримац им увагу и позитивни амбиєнт у бависку, прето на вецей заводи була капитен тима.  

– Позарядово є талантована, а ґу тому є добра, млада особа. Пред ню добра и красна будучносц у фодбалу. Поволана є до  репрезентациї Войводини, а далєй на Анамариї же би одлучела кельо ше да до того – похвалєл нам ю Момчило Сучевич, Анамарийов тренер у Стаїчеве.

ВОНА ЗА ЧЕРВЕНИХ, А БРАТ ЗА ЧАРНИХ

У Бабичовей фамелиї, фодбал любя бавиц и патриц лєм двойо младши члени, Анамария котра люби  „Червену гвизду”, и єй власни брат Йован котри волї „Партизан”. Од такей комбинациї, як Анамария гвари, часто болї глава. Вєдно патра фодбал лєм кед бави державна репрезентация, кед ше ґу нїм правда, лєм дараз, приключи и шестра Єлена.

(Опатрене 105 раз, нєшка 1)