fbpx

Резултати добри – Искра перша, Русин други, а Бачка шеста

автор редакция и мрежа дописовательох 12. децембер 2018

После одбавених стретнуцох у єшеньскей часци першенства, нашо фодбалски Клуби можу буц задовольни з посцигнутим резултатом. Искра, як и прешлого року, перша на таблїчки, Русин други, а Бачка шеста. Бачка добре добре бавела и у Куп змаганю. Предстої пауза, а ярня часц пешенства почина на половки марца.

Фодбалере ФК „Бачка 1923” зоз Дюрдьова после одбавених 14 колох у своєй Подручней фодбалскей лиґи Нови Сад у першей часци першенства дзеля 5 и 6. место на таблїчки. Призначели шейсц побиди, пейц стретнуца були закончени зоз нєришеним резултатом, а три старцели. Дали 16 , а прияли 14 ґоли, та су „у плус скору” 2 ґоли.

БАЧКА МОГЛА МАЦ И ВЕЦЕЙ БОДИ

– Могли зме освоїц голєм 5–6 боди вецей, алє нє треба буц нєзадовольни. Окреме тот наш успих векши и з добрим резултатом хтори зме направели на Куп змаганю. Одбавели зме седем стретнуца и виборели зме ше за финале Купа Фудбалского союзу Сербиї, подруче Фудбалского союзу Городу Нови Сад. Окреме кладзем акцент на три стретнуца на Куп змаганю зоз екипами хтори у висшим ранґу змаганя. На тих стретнуцох зме доказали и потвердзели квалитет хтори наша екипа ма. Велї старши члени Клуба, а тиж так и навияче, нє паметаю таки успих Бачкей – гварел тренер ФК „Бачка 1923”, Раденко Шарович.

Кед слово о бавячох зоз Бачкей, безсумнїву на потераз одбавених стретнуцох  указали одличну форму и квалитет. Насампредз же у їх лиґи екипи вельо моцнєйши як наприклад у Русиновей и Искровей лиґи.

– У цеку тей полусезони на розполаганю сом мал 25 бавячох, та сом у каждей хвильки могол составиц екипу хтора би у каждим сеґменту бависка мала одвит за процивнїцку екипу. Нєщесце лєм у тим же зме мали вельке число стретнуцох хтори зме нє одбавели як требало, цо на концу дало таки конєчни резултат. То були подлєйши екипи од нашей и вшелїяк же резултат могол буц лєпши. Но, треба припознац же лабда округла и вельо того ма уплїв на резултат. У тим смислу нє можеме буц нєзадовольни – надпомнул тренер Шарович.

Фодбалер Бачкей зоз Дюрдьова на паузи. На шоре пририхтованя за предлуженє першенства хторе би требало почац на половки марца. Затераз ше ище нє може точно повесц чи буду даяки пременки у Клубе. Тренер Раденко Шарович же и у предлуженя першенства годзен раховац на истих бавячох.

– У предлуженю першенства очекуєм лєпши резултати. Наздавам ше же предстояци пририхтованя буду вихасновани так як заплановане и же по предстояци стретнуца форма бавячох будзе ище лєпша. Обєктиво поведзене, по квалитету екипи, припадаме верху на таблїчки, голєм треце место. Окрем того, вельки амбициї маме и кед слово о финалним стретнуцу Куп змаганьох – гварел тренер Шарович.

ТАКИ УСПИХ БАЧКИ ШЕ НЄ ПАМЕТА

Паралелно з тим першенством дюрдьовски фодбалере бавели и КУП змаганя, цо им була додатна терха, бо бавели вецей змаганя з моцнима екипами, алє зазначели барз добри резултат. На остатнїм, полуфиналним змаганю победзели ФК „Цемент” з Беочину и наяр буду бавиц финале КУП фодбалского союзу Нови Сад процив ФК „Кабел” з Нового Саду. У КУП-у бавели седем змаганя, три зоз клубами з висшого ранґу, з Войводянскей лиґи – юг з двома клубами, а зоз Войводянскей лиґи з єдним клубом. 

УСПИШНА ПОЛУСЕЗОНА

Искра як и прешлого року, на одпочивок пошла як перша на таблїчки. Главни конкуренти за перше место и пласман до Войводян скей лиґи на яр, Искри буду Войводина зоз Бачкого Ґрадишта и Пролетер зоз Равного Села. Войводина за Искру заостава єден, а Пролетер два боди.

После успиху у прешлей сезони котри наисце бул нєсподзиванє, на початку тей сезони нїхто нє думал же би Искра и того року могла повториц успих, окреме кед ше вежнє до огляду же на концу прешлей сезони зоз Клуба пошли даскельо стандардни и значни бавяче. Медзитим, руководство Искри ознова на їх места приведло бавячох котри ше указали можебуц ище лєпше, а и атмосфера у екипи одлична. На початку сезони було бешеди же би шлїдуюцого року требала буц реорґанизация лиґи та циль бул, а и остал, буц у верху таблїчки, алє за розлику же од початку сезони тераз поставени ище єден циль, а то знова пробовац нападнуц Войводянску лиґу.

– После першого страценого змаганя бавяче похопели же муша почац бавиц вельо озбильнєйше и почали зазначовац вше лєпши резултати, а нє страцели зме на остатнїх 10 змаганьох. Освоєли зме перше место у єшеньскей часци сезони, та сом барз задовольни, медзитим нє сцеме обтерховйовац бавячох зоз императивом першого места и на концу. Мойо жаданє лєм же би бавяче на каждим змаганю дали шицко од себе, а увидзиме же чи то будзе досц за перше место. Пред початком сезони нам бул циль же бизме були медзи першима трома, штирома екипами и я ше наздавам же тот циль сполнїме, а кед нам ше укаже нагода пласовац ше и до Войводянскей лиґи потрудзиме ше же бизме то и витворели – гварел предсидатель ФК „Искра”, Радислав Сталевич.

По законченю полусезони шлїдзи пауза у котрей ше зведзе рахунки и упечатки у прешлим року, а место на таблїчки вимага озбильни пририхтованя и змоцньованє бавяцкого кадру.

– Приємно сом нєсподзивани же зме єшеньску часц сезони закончели на першим месце, понеже сом на початку нє думал же зме годни зазначиц таки добри резултат. Медзитим, зоз кола до кола Искра бавела вше лєпше и амбициї и нам, навиячом росли. Як сом чул, бавяче слабо тренираю и думам же би резултати були ище лєпши кед би тренинґи були нащивенши. Тиж так ме приємно нєсподзивали и двоме нови бавяче котри влєце пришли до Искри, а то Милан Пєшивац и Радован Ґаґович котри ше барз добре уклопели до екипи и то видно по резултатох – гвари дакедишнї ґолман Искри, а тераз єден од найвирнєйших Искрових навиячох Силвестер Хромиш Стариґа.

ҐАҐОВИЧ ДАЛ НАЙВЕЦЕЙ ҐОЛИ

Искра у єшеньскей часци сезони одбавела 15 кола, зазначела 12 побиди, 1 нєришене змаганє и 2 пораженя, а освоєла вкупно 37 боди. Ґол розлика +15, 34 дати ґоли и 19 прияти. Найвецей ґоли у єшеньскей часци дал Радован Ґаґович аж 10 ґоли, Дамян Ґубаш дал 9, Марян Малацко 3, Данило Янкович 3 ґоли,  а Зоран Сердар, Боґдан Сталевич, Слободан Златич, Жарко Родич, Ненад Шанта, Здравко Живкович, Милан Пєшивац, Михайло Юрчук и Тони Иван дали по 1 ґол.

НАВИЯЧОХ ЗВИКЛИ НА ПОБИДИ

Фодбалере Искри остатнї даскельо сезони и своїх навиячох звикли на побиди и добри резултати. Искра и тей сезони мала добру потримовку и на госцуюцих теренох, цо ше одражело же од можлївих 24, освоєла 22 боди. Нє победзела лєм у Фекетичу дзе зоз домашнїм Ядраном одбавела 0:0, а и на тим змаганю бавяче Искри премахли велї стопроцентни шанси.

УСПИХ ВЕКШИ ЯК ЦО ШЕ ПЛАНОВАЛ

После кризних двох, трох рокох у керестурским Фодбалским клубе „Русин”, єшеньска полусезона закончена зоз вельким успихом, яки давно нє запаметани у Клубу.

Плани були амбицийни, алє анї блїзко таки як цо витворени, а то  потвердзує и член Управи и фодбалер клубу Желько Орос, а як гвари тераз уж и цилї вельо векши.

– Циль нам висша Войводянска лиґа, гоч то на початку нє було так.  Кед зме почали бавиц план бул пласовац ше ту коло шестого, седмого места, медзитим цо далєй, а нам ишло вше лєпше. З таким бависком нам и апетити постали векши. Тераз зме твардо ришели остац медзи першима трома екипами, же би зме мали нагоду бавиц голєм бараж за висшу лиґу – толкує Орос.

После 15 одбавених колох, ФК „Русин” ше находзи на   другим месце на таблїчки Подручней фодбалскей лиґи Зомбор, ма аж 30 боди, цо лєм за єден менєй од першопласованого ФК „Стари ґрад” зоз Бачкей Паланки.                       

– Дома зме прияли лєм єден ґол, ту маме шицки осем побиди, на „страни” нам дакус слабши биланс, та на тим будземе робиц у ярнєй часци сезони. Кед ше порихтаме за ярню часц будземе мац озда и нагоду за перше место – гвари Желько Орос.

Состав першого тиму у Русину наисце обецує. У екипи преважно хлапци котри маю коло 20 роки чий темпо бависка процивнїком нє лєгко провадзиц. Правда, ту и двоме старши, алє так повесц искусни, Гарди зоз Керестура и Дюканович зоз Кули, котри дакедишнї професийни бавяч и стрилєц наисце красних осем ґолох у тей полусезони, тиж осем ґоли дал и млади Веселинович зоз Лалитю. У екипи бавя преважно Керестурци, зоз Кули бавя ище Маркович и Ланчужанин, а зоз Лалитю Грнчяр, котри уж як домашнї после телїх рокох у Русину.

– Треба спомнуц и наших керестурских бавячох, понеже медзи нїма векшина занята, а з вельку дзеку сцигую на тренинґи и теди кед им нє лєгко. Уж сезону и пол зоз нами наступаю млади Стефан Кочиш и Саянкович. Зоз подростку даскельо змаганя з нами бавел и Маньош, а ту и Алекса Шайтош и Сашо Гарди котри ище вше нє маю роки за змаганя, алє тренираю з першим тимом – наглашує Орос.

Зоз числом бавячох нє маю бриґи, на каждим змагню их єст по 18 присутних, а нє раз ше случи же аж и вецей, та ше дахто виступи до публики. Скоро половка бавячох нє препущели анї єден тренинґ, а тиж так и змаганя. Тераз пред бавячами жимски одпочивок, а тренинґи им почню концом януара, початком фебруара.

На виберанковей Скупштини ФК „Русин” котра отримана зоз запожнєньом, вибране нове руководство Клубу, а поставени єден як найважнєйши циль – остац у лиґи. Дефинитивно же є сполнєти, та аж и превершени. За предсидателя єдногласно вибрани Тихомир Медич, а у составе Управи звекшого меновани младши особи, а оформена и Роботна ґрупа ширших сотруднїкох.

 

(Опатрене 35 раз, нєшка 1)