fbpx

Пласман РК „Русин” лєпши як обчековане

автор мар 26. децембер 2018

Спортисти Рукометного клубу „Русин” закончели єшеньску часц сезони 2018/2019. року на другим месце на таблїчки у Трецей рукометней лиґи „Сивер”, зоз бависком котре було чежко звладац шицким процивнїком.

Зоз посцигнутима резултатами у прешлих седем колох, рукометаше направели прави викрок за свою екипу и Клуб у позитивним смислу. На початку сезони вшелїяк же сиґурно ришели буц добри, алє чи було у планє така позиция на таблїчки, нїхто нам нє могол потвердзиц.

Шоруюци побиду за побиду, сцигли до маґичного числа од шейсц побидох и єдного пораженя у ґрупи. Поражени були лєм од першопласованей екипи РК „Зомбор”, на домашнїм терену, зоз барз малу розлику 22:24, a за щиру публику и тота побида була спорна, понеже як гваря найвирнєйши, яґда же и одлуки судийох могло ище раз розпатриц.

ДОБРИ У НАПАДУ, ИЩЕ ЛЄПШИ У ОДБРАНИ

Но, вшелїяк резултати вецей як фантастични, дали 204, а прияли 152 ґоли, и освоєли 12 боди, цо лєм за єден бод менєй од першопласованих, аж треба наглашиц же ше їх мрежа затресла 15 раз менєй як РК „Зомбор”.

Успиху сиґурно же допринєсол квалитетни состав екипи, до котрого уложени вельки труд руководзацих, односно страших рукометашох котри мали дзеку робиц зоз младшима, а котри тераз уж наступали за перши тим. Попри подмладку котри приступел, ту остали и старши искусни бавяче без котрих би анї єдно змаганє нє було таке добре, и єдноставно, злучели ше млади, вредни и сцели хлапци, зоз старшима и искуснима.

Млади Югик, Тома, Варґа и Микита першираз ше опробовали тей сезони у першим тиму.

− Постава старших бавячох, гоч наисце убавена, мала заш лєм и слабши точки котри процивнїки знали вихасновац, и праве тоти млади хлапци ускочели до бависка, дзе зме комплетовали квалитет бависка и постали екипа на яку нє звикли процивнїки у лиґи. Дзекуюци тому зме на шицких змаганьох давали ґоли зоз шицких позицийох, були зме убавени, моцни у нападу, а ище лєпши у одбрани − толкує у мено Русина Звоно Планчак.

СРЕДСТВА МИНИМАЛНИ,  А ПЛАСМАН ФЕНОМЕНАЛНИ

Плани за успих нє оставаю на тим, и надалєй буду робиц на формованю квалитетних младих бавячох, з котрима ше екипа будзе константно подмладзовац.

− Чи запровадзованє професийносци и у тей сфери спорта будзе резултовац позитивно, то уж укаже час. Роздумуєме о тим же як розвивац наш Клуб, алє ту и страх же Рукометни союз Войводини (РСВ) роби на запровадзованю професионализма, цо приводзи под знак питаня рукомет у нашим аматерским Клубу, понеже нашо хлапци бавя у Трецей лиґи, котра єдина нєпрофесийна лиґа − толкує Планчак.

Зоз таким успихом, потребне роздумац и о тим цо понука висша лиґа, а то такой поцагує и обовязку транзициї Клуба, односно з єдним словом, вельо вецей средства и озбильни пременки Клуба и його орґанизациї.

Висша, односно професийна лиґа вимага векши критериюм цалей орґанизациї, ту домашнї терен у Спортскей гали котри сполнює предписаня, алє найбаржей будзе требац робиц на винаходзеню ришеня же як и одкаль обезпечиц средства за котизациї, лиценци и др. У тих лиґох ше змаганя бавя и през тидзень, а то значи же будзе потребне бавиц за пенєжи, а нє лєм за любов ґу рукомету.

ОЗНОВА ШЕ БУДУ ЗМАГАЦ И ДЗЕЦИ ДО 14 РОКОХ

У катеґориї М 14 прешлей сезони ше озбильно змагали и участвовали млади Русиновци, одкаль ше вибрало нових бавячох першого тиму. Нажаль, пре проблеми коло виплацованя средствох зоз буджету Општини Кула котри були наменєни за спортски клуби, спомнути средства виплацени аж у октобру, цо було позно же би ше змагали рукометаше тей катеґориї. За тот проблем виостало порозуменє и РСВ, а то була и причина за  нєзаинтересованосц дзецох за бависко. На початку идуцого року ше почнє формовац екипи котра ше такой почню и змагац.

(Опатрене 46 раз, нєшка 1)