fbpx

Шицко му идзе од рук

автор Сенка Иван 4. януар 2019

Добре буц пошвецени єдней науки, єдней роботи и добре кед зме на єдну ствар фокусовани, прето же ю вец, требало би, одробиме як треба. Медзитим, можлїве буц заинтересовани за вецей ствари и шицки добре робиц, а приклад за таке дацо то Никола Сивч зоз Крущичу, хтори попри тим же є студент мехатоники, роботики и аутоматизациї на Факултету технїчних наукох, роби и на Naxi радию як водитель, як технїчни и тонски реализатор, а як фриленсер роби як ґрафични дизайнер, веб дизайнер, програмер, видео монтажер.

Очиглядно же це интересую барз вельо ствари, поготов технїчни. Од кеди?

Никола Сивч: Мушим повесц же док сом бул у основней школи мал сом досц шлєбодного часу же бим виглєдовал, бо ме досц того интересовало. Поготов ми хемия, биолоґия и физика були предмет интересованя. Медзитим, тиж так ме и медиї вше интересовали, та сом сам научел робиц у фотошопу, илустратору, премиєру, кед слово о видео продукциї,  вец сом почал и програмовац, перше лєм так за себе, и ниа, я тоти шицки мойо гобиї претворел до роботох, сам, без школованя. Учел сом, спочатку и гришел, алє вельо сом виглєдовал и нє одуставал од того цо ме интересовало.

Як ши пришол на идею робиц як радийски водитель?

НС: То приповедка хтора руша од дзецинства. Барз сом любел рисовани филми и кед сом патрел филм по анґлийски, а бул титл на нїм, сцихшал сом и тото цо подоба гутори на телевизиї я читал и давал глас тей подоби у рисованим филму. Простейше поведзено, синхронизовал сом го. Нормално, то було нєпрофесийне спочатку и аматерски поробене, алє теди сом одкрил же мам тоту моц меняня гласа, же можем звучац як монструм, мала дзивочка, лєбо, наприклад, як стари чловек… Видзел сом конкурс на радию Сиґнал. Приявел сом ше и достал место радийского водителя. Барз им ше пачела моя можлївосц трансформованя гласа, а шицки технїчни ствари хтори сом нє знал и дикцию сом научел. Познєйше сом мушел направиц паузу од радия пре даяки приватни причини, алє знанє остало, хторе ми тераз помогло же бим достал роботу на Naxi радию.

Кеди ґрафични дизайн пренашол драгу ґу це?

НС: Кед сом як дзецко достал свой перши рахункар, спадло ми на розум бавиц ше „на телевизиї”. Видумовал сом телевизиї, давал им мена и правел лоґо за нїх, наприклад, мал сом Екстра телевизию, Флеш телевизию… J И так лоґо по лоґо, кажди бул професионалнєйши од другого и мнє то у єдней хвильки постала ище єдна од роботох. Тиж так, од помоци ми було и тото же сом у стреднєй школи бул у новинарскей секциї, дзе сом помогнул у ушорйованю часопису Таймаут. Вше сом бул задлужени и за насловни бок, цо за мнє була велька одвичательносц направиц дацо цо ше шицким будзе пачиц, алє удало ше ми. То випатрало барз добре и шицким ше пачело. Шицко я то почал робиц як гоби, бо ме, єдноставно, интересовало и ниа тераз ми то и єдна од роботох. Наприклад, власнїца радия за хтору тераз робим трима и приватну школу, та єй робим дружтвени мрежи, визуални идентитет… До нєдавна сом робел досц за странцох, наприклад, комплетни брендинґ за златару у Зєдинєних Арабских Емиратох, робел сом флаєри за представу у театру у Сиднею, лоґо за ресторан у Америки, лоґои и дизайн дружтвених мрежох за фотоґрафа у Индиї… То сом шицко робел док сом нє почал робиц на радию.

Студираш роботику. Кельо тота наука заступена у нас?

НС: Док закончим студиї, моя робота будзе програмовац робота, так же би  функционовал автономно, односно без чловековей контроли, значи мойо будзе же бим го програмовал и лєм уключел же би робел. У Сербиї, нажаль, тота обласц ище нє барз зажила, та ми после тих закончених студийох можеме робиц як програмере, або машински инженєре, та за нас хтори ше сцеме занїмац зоз роботику єдина опция пойсц до иножемства. Мойо жаданє пойсц до Япону, дзе маю барз моцну и розвиту технолоґию, цали тот сайбер швет то Япон.

Сотрудзуєш можебуц и зоз нашима медиями, або ши активни у даєдним културним дружтве?

 НС: Щиро, тераз нє. Мило ми же сом научел приповедац по руски, дзекуюци школованю у керестурскей Ґимназиї, а тото з чим ше цешим то же, можем шлєбодно повесц, успишно промовуєм Руснацох на Твитеру. Барз любим вариц и, наприклад, на своїм Твитер профилу сом потолковал людзом, през цали поступок, як ше прави пироги. Направел сом перше увод цо шицко треба, а вец крочай по крочай, сликовито и на духовити способ приказал сом як направиц смачне, руске єдло. Можем повесц же барз велї людзе першираз чули за Руснацох, а най нє приповедам за пироги. После того ме людзе нагваряли же бим заш дацо писал о Руснацох и рускей кухнї, очиглядно им ше пачело. Так же плануєм и то предлужиц робиц, а нови руски єдла буду обявени пред Крачуном.

Кед положиме на бок шицки твойо роботи хтори настали зоз гобийох, цо биш любел витвориц у обласци хтору студираш?

НС: Гммм… мойо найвекше жаданє кус чудне и людзе углавним на ньго чудно реаґую, прето же то за векшину ище табу тема. Моя обсесия и любов то роботика и жадам постац робот, нє важне чи киборґ, чи андроид. J Вше сом жадал буц таки мудри же бим могол шицку свою меморию преруциц на даяку флеш меморию, же бим себе направел як, наприклад, андроида и предлужел робиц як инженєр, алє робот инженєр. То ище нє скроз розробена задумка, алє будзе, мам часу.

(Опатрене 210 раз, нєшка 1)