fbpx

Бум, бум, по кишенки!

автор каролина папуґа 13. януар 2019

У  шветочней зме часци рока, хтора на тих просторох и у нашим дружтве тирва скоро цали мешац. Гоч то период вешеля, воно ше у хвильки може претвориц до ноцней „мори”. Понеже же хаснованє пиротехнїчних средствох постало узвичаєна часц новорочних и других преславох у тим периодзе, часто ше случую нєщесца дзе ше найчастейше  покалїча дзеци и млади. Попри тим, з тим трещаньом, прасканьом и правима детонациями губи ше явни шор и мир, знємирює гражданох, та вешелє видзе наозай. Як и каждого року по тераз, так и тераз слухаме исти спозореня фаховцох и компетентних за отримованє явного порядку и мира – руцанє петардох може буц опасна забава. Прето, уж кед ше слави, требало би то буц так, же би ше нє покалїчело анї єдно живе єство на тим швеце.

Пиротехнїка нє звадза лєм людзом. Преценює ше же од инфаркту котри спричинєл стрес и страх пре петарди, загиню коло 5 000 пси до рока. Псом и мачком слух далєко розвитши як людзом, та су автоматски вельо чувствительнєйши на гласни звуки, окреме кед су интензивни и нєсподзиваюци. При нїх то виволує вельки стрес и огромне чувство страху. Без огляду чи дахто ма любимца, чи нє, чи люби животинї, чи нє, требал би почитовац їх право на живот. Людзе, голєм ше  наздавам, требали би буц цалком способни одлучовац сами за себе. Пси, мачки, а и шицки други животинї тото нє можу.

Припатраюци ше уж велї роки на младеж, вше ме розчарує тот факт же велїм чувство емпатиї слабе, або є вообще анї нє розвите. Еґоцентризем таких особох през швета приходзи до кулминациї. Кому то шмишне кед ше дахто злєкнє? Кед ше дакому руци петарду до капулячи, або до чижми? Кед ше зоз уживаньом малтретира других коло себе? Знам, даєдни поведза же и ми були дзеци, робели зме вшелїячини, виводзели зме керефеки… По велїх, а у ствари по каждим критериюме, руцанє петардох нє спада до того. Питам ше же кед тоти исти тераз, у вчасних рокох, так уживаю у тим малтретированю других, яки то особи буду док вирошню? Яки людзе зоз нїх буду?

Як и у шицким, так и у тим постої други бок приповедки. Як єдну файту охрани од петардох, принєшени закон дзе ше пенєжно каре людзох кед руцаю петарди, а заш, тоти исти петарди мож купиц цалком леґално, у предавальньох котри предвидзени за таке.  Сам закон, як и велї други ствари у тей держави наисце нєлоґични. Нач би постояла предавальня за пиротехнїчни средства, кед би ше их нє куповало?

Любела бим видзиц кед би ше голєм єден закон дошлїдно применєло у пракси, же би нє остал лєм мертве слово на паперу. Та най би то з тей нагоди бул тот. Кед нє, заш ше лєм зведзе на гевту присловку: жедол вовк маґарца! Шицки закони маме, а кед их треба применїц… Або точнєйше, маґарец вовка.

Становиска висловени у тим тексту виключно авторово и нє вше одражую ушорйовацку политику новинох „Руске слово”.

(Опатрене 58 раз, нєшка 1)