fbpx

Достава шампионски припознаня на виставох

автор влдї 16. януар 2019

Штири децениї Драґан Чавич, познати голубар зоз Шиду допатра голуби файти померански надуваци голуб и єден є з найпознатших голубарох нє лєм у Сербиї алє и ширше. На концу прешлого року, алє и виставох по рижних городох, Чавич задовольни зоз посцигнутим успихом. Барз є задовольни кед слово о продукциї голубчатох, хторих у прешлим року мал 136, подобно як и залоньским.

– З тих 136 младих голубкох, за дальше хованє, зоз строгу селекцию охабим лєм 12 млади. Прешлорочни квалитет младих бул лєпши як рок пред тим и прето сом задовольни. Аж тельо, 136  млади ше вилягло од 44 пари голубох за лягло и то у вецей фарбох, по чим сом познати – гвари Чавич.

Свойо голуби виклада на виставох, а на Медзинародней вистави у Вершцу дзе було виложене 1 600 фалати голубох,  достал припознанє абсолутного шампиона. Потим викладал у Сримскей Митровици дзе його голубица достала шампионске припознанє зоз 97 бодами. На вистави у Зренянину тиж його голубица освоєла 96 боди, а у Обреновцу  97 боди и шампионску титулу. И на вистави у Новим Садзе два голубици достали шампионски припознаня. Чавич познати и по припознаньох хтори його голуби доставали на виставох у вецей европских городох, прето звишок голубох лєгко попреда. Провадзи шицко тото цо нєшка у голубарстве актуалне, а свою продукцию и припознаня представя на фейсбук профилу. На тот способ є присутни у цалим швеце. Вец нє чудне же до ньго приходза и голубаре зоз Нємецкей або Греческей купиц голуби, а тиж и зоз околних сушедних державох. Приповеда нам же його голуби закончели аж и у далєким Пакистану и Индиї пре добри квалитет.

– И у голубарстве вше треба учиц, та так и я за телї роки здобул вельке искуствиє и з голубами хтори и я куповал од других, теди познатих голубарох, и зоз добру селекцию сом посцигнул квалитет яки мам нєшка. Алє и голубарство спорт, бо ше голубар змага зоз голубами и нєпреривно муши отримовац їх квалитет. Кед би то нє робел, швидко би квалитет скапал – гваро Драґан Чавич. Гоч ма барз квалитетни голуби и далєй одходзи на вистави указац их, бо гвари же чловек вше муши буц присутни на тих виставох. Поровнує тоту любов зоз  шпивачом хтори гоч ма одлични шпиванки, вше муши буц присутни пред свою публику бо то так у голубарстве.

(Опатрене 35 раз, нєшка 1)