fbpx

Традиция ше предлужує

автор апм 22. януар 2019

За нашого подобового уметнїка Владу Нярадия, предходни, 2018. рок бул успишни, з оглядом на тото же мал замерковану самостойну виставу у Завичайним музею у Руми, дзе представел свойо найлєпши подобово роботи зоз циклусу „Записи з Метеорох”, хтори наставали од 2013. по 2018. рок.

Попри тей самостойней вистави, мал вецей як 30 значни заєднїцки вистави у нашей жеми и иножемстве, а на хторих ше участвує зоз поволанку орґанизатора лєбо по конкурсу, дзе ше виклада по вибору селекцийних медзинародних комисийох хтори творя историчаре уметносци и подобово критичаре.

– Видвоєл бим Биєнале рисунку „Остен” у Скопю, у Македониї, потим Биєнале миниятури у „Sint – Niklaas” у Белґиї, штернасту екслибрис виставу Русе у Болгарскей, треци биєнале „Лаґуна Пиава” у Арґентини. Кед слово о виставох у Сербиї, видвоєл бим „Триєнале” рисунку у Беоґрадзе, Єшеньску виставу здруженя подобових уметнїкох Сербиї у Беоґрадзе, Виставу скулпторох Сербиї у Беоґрадзе, Рочну виставу Здруженя применєних уметнїкох, применєней уметносци и дизайнерох Сербиї, тиж так у Беоґрадзе – визначел Няради и додал же за ньго бул окреме значни и други медзинародни Арт фест у Валєве, а медзи заєднїцкима виставами видвоює и свойо представянє у Яґодини, Велькей Плани, Старей Пазови, Парачину, Иванїци, Чачку, Крушевцу, Алексинцу, Новим Садзе, Зренянину и других местох.

– Гоч сом у прешлим року мал дзешец поволанки на подобово колониї, участвовал сом лєм на двох, у Коцуре и у Сечню, понеже сом пре обовязки нє могол вецей – гварел уметнїк и додал и же є похвалєни за уметнїцку фотоґрафию по конкурсу Городского музею у Вербаше, хтори бул у маю, у рамикох манифестациї Ноц музейох.

– Можем повесц же ми уж, традицийно, и рок за нами, односно 2018. бул успишни у шицких конарох подобовей уметносци и наздавам ше же ше тота традиция предлужи и надалєй – заключел Няради.

(Опатрене 68 раз, нєшка 1)