fbpx

Початок у импровизованей терховнї

автор мар 28. януар 2019

Сиґурно же є найуспишнєйша спортистка у цалим Руским Керестуре, медалї и припознаня котри освоєла у бодибилдинґу анї нє може почитац. Вона, насампредз, и мац троїх дзецох, тераз одроснутих, котрих у першим шоре научела прави вредносци, а то  – як буц людзе.

Илона Зарубица ма релативно нєзвичайну приповедку зоз свойого дзецинства. Пре мацерову роботу до оводи ходзела даскельо роки, а кед єй уж допило учиц и робиц з рока на рок вше исте, бо овода нє було, лєм предшколске оддзелєнє, до школи почала рок скорей. Ростом була висша од своїх товаришох, алє досц поцагнутша.

– Перши днї у школи сом була циха, а кед зме ше бавели, я вше була тота цо наймирнєйша. Зоз часом ше то пременєло, а поготов кед ми мац загрожела же ме враци назад до оводи, та сом ше такой научела  озвец. Знала мац же цошка треба зробиц, бо сом вше любела буц „лидер” медзи другима. Мам єдну фотоґрафию зоз якогошик наступу, шпивам зоз трома дзивчатми, и я за цали крочай опрез нїх, же бим ше указала – здогадує ше Гека.

Вироятнє же таки жаданя и велька шмелосц ище одмалючка, Геку одведли ґу успихом. Накази ше почала занїмац зоз спортом, вошла до швета бодибилдинґу у котрим нєшка єй мено познате вшадзи, алє наисце вшадзи. Питанє кельо єст ище таки жени, и зоз тельо посцигнуцами на цалей планети: У Сербиї их єст лєм два котри таки порядни на змаганьох.

– Я сцела мац мускули, алє сом нє знала цо ме чека. Початок мойого вежбаня паметам у „Паличу” дзе ми мац робела,  и дзе була  виложена плаката же ше у валалє отвера „теретана”. Було то за беґельом, на улїци Ирини Провчи, а отворел ю Любомир Орос, думам же є тераз уж роками у иножемстве. Була то терховня у його приклєце, цошка цалком иншаке од нєшкайших, аж  знам же нам и премакало док зме вежбали, та зме подкладали лавор.

ОД МАЦЕРИ ПО МИС УНИВЕРЗУМА

Нїґда нє одустала од себе, вше твардо верела же вона то може, а за шицко находзела потримовку у своїх дзецох, Ацови котрого мала на самим початку кариєри, и двойнятох, Шейли и Педьови, котри народзела о шейсц роки познєйше.

– Нєшка Ацо асистент на Польопривредним факултету у Новим Садзе, вон, поправдзе, барз вельо тренирал. Шейла рушела по моїх шлїдох, наступала за репрезентацию Джиу джитсу, тиж ше змага и у бодибилдинґу, а дипломовала на ДИФ-у. Педя иншаки, тренира лєм з часу на час, тераз є пред одходом до Словацкей, дзе идзе робиц. Шицки тройо з гордосцу поведза же им я мац, гоч им скорей було чудне же чом їх мама иншака, док нє похопели вредносц того з чим ше занїмам – гвари вона.

У своїм обисцу Гека ма приватну терховню, у котрей вежбаю и други, а вона шицким особни тренер. Ридко дзе єст условия мац такого успишного особного тренера. Єй термин за вежбанє почина вечар, кед єст найменєй других важабачох – од 20 до 23 годзин. У тей терховнї зарамикована кажда єй диплома и припознанє, там стоя и велї  погари и медалї.

– Найзначнєйши ми два перши места на змаганьох за мис Универзуму, и штири перши места на Шветових змаганьох, гоч би ми  було вельке  и да мам лєм єдну. После предостатнього змаганя и титули у Маямию, думала сом же закончим кариєру, медзитим, кед сом и тераз нєдавно освоєла перше место на змаганю у Таранту, и на мойо роки указала же мож, а шицки од мнє були младши, тот успих ме барз мотивовал. Будзем ше змагац покля можем – предлужує шампионка Универзуму у бодибилдинґу.

Єден час ше занїмала и зоз судзеньом, алє гоч то бул исти тот спорт, нє могла без наступаня и бини.

– Кед нє вежбам, я вистата. Нє вежбам лєм за швета, и през викенд, мойо цело так звикло. На тренинґ вше идзем з дзеку, а з вельку радосцу ше врацам. У периодзе док ми дзеци були мали, три роки сом була судия.

ПРЕПУТОВАЛА БАРЗ ВЕЛЬО

Рочни одпочивок нє памета кеди мала, як и сама гварела, кед би знала на початку же цо ю будзе чекац на такей драги, сиґурно же би нє рушела по нєй, алє нїґда нє подумала одустац.

– Препутовала сом велї жеми на тим швеце, мушела бим роздумац, писац и класификовац по рокох кед бим сцела начишлїц, а за шицко требало видвоїц пенєж. Прето сом ше одрекала од вельо койчого – визначує вона, алє гвари же ше єй нєдавно удало одпутовац як туриста до Тунису зоз дзивку Шейлу, та гвари же на плажох виволала вельке интересованє странских туристох, и же ше шицки зоз ню жадали сликовац.

Люби укладац до того цо по єй думаню мудре, а то, як гвари, релативна ствар, алє водзи ше зоз Нєґошовим стихом Хто нє препутує, кнїжку нє отвори.

У єй обисцу ма вецей як 200 файти рижнородного квеца, вельо нука, а ище вецей вонка. Єй дом  то и єй оаза мира. Влєце ужива у тей краси, у паху квеца, и фонтани, а  окремни хвильки тоти кед вежнє  до рукох щеточку, олєйово фарби, платно и  кед малює.

– У власней збирки малюнкох мам коло 50 слики котри настали у рижних периодох мойого живота. Мальовац сом почала ище у док сом жила у Словениї. Там зме мали хижу у лєше и було ми покус допито, мала сом лєм єдно дзецко и власну терховню.

Илона робела як судийка

РОДИЧИ ПОТРИМАЛИ ЄЙ ЄДИНСТВЕНОСЦ

Одмалючка була иншака. Понеже єй оцец бул боксер, любов ґу спорту єй праве вон пренєсл, та вноци вєдно ставали патриц бокс, прето же пре часову розлику, то вше на програми було позно.

– Оцови сом вше приповедала же сцем буц моцна, и праве  ми вон справел импровизовану терховню, з древа кулї и обичну лавку за дзвиганє тих кульох.  Оцец ми приповедал приповедки на интересантни теми котри видумовал. Тоти приповедки ме провадзели през цали живот. Як дзивка сом любела тото цо други нє робя. Плївала сом од брани, та по крущички мост, на бициґли сом пошла на сладолед до Боґоєва, на морю сом плївала до далєка кельо ґод сом могла, а назад сом ше врацала задком, и так сом научела звладац страх – бешедує Илона, а надалєй предлужує о анеґдоти зоз свою мацеру.

– Уж як дзивка сом тренирала бежанє, вєдно зоз єдним бачиком Лукачовим и мою мацеру.  Бежали зме од Руского Керестура по Кулу. Та моя мац заостала можебуц и 100 метери за нами, алє нє так же нє могла, то бул єй темпо, а єден шофер застановел камион и геверестовал мнє и Лукача же чом зме тото дзецко так охабели за нами. Тоти цо познаю мою мацер, знаю же вона ростом нїзка, а з капулячу на глави цалком здабала на дзецко – зоз ошмихом закончує наша собешднїца.

ОД АЕРОБИКУ ПО БЕНЧ

Як дзивка на 17 роки тримала аеробик и другим женом, а нєшка тренира по 3 годзини дньово. Терховня єй вецей значи и од дньовей хижи. На бенчу дзвига по 120 килограми, а зоз ногами и 400. Єй мац ше и нєшка стара за ню же чом дзвига таке чежке.

ТАМ ПОЧАЛО

Першу терховню у валалє отворел Любомир Орос у хторей ми штверо з почали тренирац: домашнї Любомир, нєшкайши майстор за пеци Бан, моя товаришка Блаженка и я – толкує Илона, и памета же перши єй фотоґрафиї Орос послал до Словениї. Були обявени у єдним маґазину, а потим Илона поволана на змаганя, и то бул официйни початок. Од теди, нїґда нє станула.

Илона зоз Петром Челиком

 

Илона зоз Петром Челиком

(Опатрене 187 раз, нєшка 1)