Суботичанє бавели найлєпше, а перше место пошло до Нового Саду

автор з. колєсар 1. юлий 2020

Прешлого викенду, точнєйше всоботу, 27. юния, на Паличу одбавени турнир у одбойки на писку, котри у рамикох СБ „Яша Баков” орґанизовало Дружтво Руснацох Суботица.

Красна хвиля потримала рекреативцох котри ше зоз наших местох зишли на красним амбиєнту, на Палицким озеру, на котрим, як и предходних даскельо рокох, у рамикох СБ Яша Баков одбавени турнир у одбойки на писку.

На турнир ше приявели 6 екипи, и то: СД „Русин” зоз Руского Керестура, ФК „Искра” зоз Коцура, „Папивинґ” зоз Вербасу, КУД „Тарас Шевченко” зоз Дюрдьова, РКЦ зоз Нового Саду и домашнї Дружтво Руснацох Суботици.

Турнир би мал и медзинародни характер, алє одбойкаше зоз Републики Горватскей, Петровцох и Миклошевцох, пре хвильково обставини зоз корона вирусом, гоч як барз сцели, нє могли присц на Палич.

Бавело ше по Берґеровей системи, 5 кола кажде зоз каждим на два достати сети.

Остатнїх рокох у тим спорту як найлєпши указали ше домашнї одбойкаше зоз Суботици, а так було и того року. Медзитим, пре потупенє правила же екипа може мац найвецей 4-ох членох, вони на концу, гоч зоз шицкима побидами турнир закончели як остатнї, понеже им побиди преквалификовани до пораженьох пре пиятого бавяча. После такого розплєту ситуациї перше место завжала екипа Руского културного центру зоз Нового Саду котра зазначела шицки 5 побиди, друга була екипа СД Русин заз Руского Керестура котра мала 4 побиди и 1 страцене змаганє, Папивинґ мал 3 побиди и 2 страцени змаганя, штварте место освоєла Искра зоз 2 побидами и 3 пораженями, пияти були одбойкаше зоз КУД „Тарас Шевченко”, вони зазначели 1 побиду и 4 пораженя, а остатня була домашня екипа Дружтво Руснацох Суботици, котра за желєним столом страцела шицки 5 змаганя.

Шлїдуюце друженє у рамикох СБ „Яша Баков” будзе змаганє у вареню пасулї, котре, як и прешлого року, будзе отримане на Пелетовим салашу у Коцуре.

СОСТАВ ЕКИПОХ

Дружтво Руснацох Суботици: Томислав Рац, Мирза Лихович, Ведран Пеич, Тияна Крижанович, Денис Баки

Руски Културни Центер: Иван Горняк, Иґор Виславски, Владимир Иван и Златко Колєсар

СД „Русин”: Янко Хома, Иван Чапко, Деян Чернок и Деян Надь

Папивинґ Доо: Сашенька Папуґа, Иван Папуґа, Звонко Салаґ и Светозар Прекаяц

Искра: Марко Буила, Андреа Горняк, Никола Тимко и Катарина Кулич

КУД „Тарас Шевченко”: Кристина Горняк, Игор Салак, Андрей Молнар, Алексей Кухар

 КОНЄЧНИ ПЛАСМАН 

  1. Руски Културни Центер 5-0
  2. СД „Русин”    4-1
  3. Папивинґ Доо     3-2
  4. ФК „Искра”     2-3
  5. КУД „Тарас Шевченко”     1-4
  6. Дружтво Руснацох Суботици 0-5
(Опатрене 19 раз, нєшка 1)