ПЕТРОВЦИ – Всоботу, 4. юния, на „Петровским дзвонє” у Етноґрафскей збирки у Петровцох отворени вистав иконох о. Михайла Йосафата Гардия з Метлики (Словения), древорезох Йовґена Сопку з Петровцох, та сувенирох з древа Михала Панковича з Петровцох.
Всоботу отримани и промоциї кнїжкох и виданьох Союзу Русинох РГ – „Страданє Руснацох у Отечественей войни 1991/92”, автора Миколу Папа, „Цихосц умера на дланї”, Владимира Провчия, „Зоз терашньосци до вичносци”, о. Михайла Йосафата Гардия, и алманах Созюу Русинох „Думки з Дунаю”.
На 20 годзин почал Литературно-музични вечар, хтори водзели Любица Гаргай и Агнетка Балатинац, а участвовали нашо руски поетеси и поетове з Горватскей и Словениї.
Уводни реферати о рочнїцох хтори того року означени на „Петровским дзвонє” пречитали: предсидателька Созюу Русинох РГ Дубравка Рашлянин о 185-рочнїци приселєня Руснацох до Петровцох и Горватскей, петровски парох мр.сц. о. Владимир Седлак о 180-рочнїци грекокатолїцкей парохиї у Петровцох, а главна и одвичательна редакторка видавательства Союзу Вера Павлович о 45-рочнїци виходзенє часопису „Нова думка”.
Означени и 120-роки народзеня Митра Надя и 80 роки од шмерци Осифа Костелника. О тих двох наших писательох реферати, хтори написала Андреа Маґоч, пречитали Томислав Рац и Любица Гаргай.
Нашо поетеси и поетове з Горватскей Мария Папуґа, Агнетка Костелник Балатинац, Любица Гаргай, Томислав Мишир, Владимир Провчи и Звонимир Барна гуторели свойо стихи, а о. Михайло Йосафат Гарди з Метлики у Словениї, попри своїх стихох, одшпивал и баладу о дїдови. О. Йосафат на ґитари, вєдно зоз свою унуку Миу Кочевар на кларинету, одграл и Майску писню Моцарта.
У музичней часци шпиваче з КУД „Осиф Костелник” з Вуковару одшпивали осем руски шпиванки, а на соботовей програми присуствовала и народна посланїца у Скупштини Сербиї Олена Папуґа з Руского Керестура.