НОВИ САД – Седем польопривредни ґаздовства и три правни особи стреду, 27. юлия, у Покраїнскей влади подписали контракти о доставаню субвенционованих средствох за набавку процивкаменцових мрежох за овоцнїки. Контракти з добитнїками субвенцийох подписал покраїнски секретар за польопривреду, водопривреду и лєсарство Вук Радоєвич.
Тераз по конкурсу спомнутого покраїнского секретарияту за тоту намену опредзелєни 45,3 милиони динари, дзе 22,6 милиони достали реґистровани польопривредни ґаздовства, а 22,7 милиони динари правни особи.
З тим, як гварел Радоєвич, у Войводини под процивкаменцовима мрежами буду ище 58 гектари овоцнїкох и овоцаре барз заинтересовани за тот конкурс, хтори тирва по септембер. З нїм з покраїнского буджету за тоту намену вєдно опредзелєни ище 65 милиони динари.
Ресорни покраїнски секретар з тей нагоди обецал же з ребалансом покраїнского буджету, вироятно у септембу, значни средства буду унапрямени за рижни мири у польопривреди и поволал войводянских польопривреднїкох же би апликовали на конкурси.
Надпомнул же можу конкуровац и на конкурси за вигодни кредити до Покраїнского фонду за розвой польопривреди.
