НОВИ САД – Новини „Руске слово” нєшка, 15. юния полня 72 роки виходзеня и Новинско-видавательна установа „Руске слово”, прейґ хторей ше у Републики Сербиї витворює право на информованє и видавательство на руским язику, нєшка означує 72 роки постояня и роботи.
У 2017. року НВУ „Руске слово” означує и три значни ювилеї: 70 роки часопису за дзеци „Заградка” (1947), 65 роки часопису за литературу, културу и уметносц „Шветлосц” (1952) и 45 роки часопису за младих МАК (1972). Установа обявює и кнїжки на руским язику, литературни дїла наших руских авторох, та од 1945. року по нєшка обявени вецей як 500 наслови.
Друковани верзиї новинох и часописох нєшка маю сучасни випатрунок, а читачом су доступни и у електронскей форми на веб-сайту Установи – www.ruskeslovo.com, на хторим и єй дньова аґенция Рутенпрес
Од 2004. року снователь НВУ „Руске слово“ Национални совит рускей националней меншини, а дїялносц, з векшей часци, финансує Покраїнски секретарият за културу, явне информованє и одношенє з вирскима заєднїцами Покраїнскей влади.
Установа ма 24-еро занятих на нєодредзени час и 5-еро на одредзени час, як и вонкашнїх сотруднїкох. Ма два дїловни простори – у Новим Садзе на трецим поверху у Футожскей ч. 2, у хторих тераз Завод за културу войводянских Руснацох и просториї Дописовательства у Руским Керестуре (у будинку бувшей Друкарнї „Руске слово”).
З информативну и видавательну дїялносц НВУ „Руске слово” витворює уставни и законски права на информованє и видавательство на руским язику, оможлївює правочасову доступносц информацийох и литератури на руским язику и з тим розвива културу и язик, пестує традицию и чува национални идентитет Русацох на тих просторох.