БАЧ – На Зонскей смотри рецитаторох, отриманей 17. и 18. марца у Бачу, участвовали и седемнацецеро рецитаторе по руски з Руского Керестура, Дюрдьова, Нового Саду и Коцура, од хторих ше дзевецеро пласовали на Покраїнску смотру.
Зоз младшого возросту, з писню по руски далєй ше пласовал Иван Молнар зоз Дюрдьова, а зоз штреднього возросту Валентина Новта и Ребека Семан, обидва з Керестура, як и Милица Михальовски з Дюрдьова.
Зоз старшого возросту, на Покраїнску смотру иду Марко Недич з Коцура, Йован Живкович з Керестура, хтори рецитовал за Нови Сад, як и Тимеа Будински, Мирослав Малацко и Павлина Шепински, шицки тройо з Керестура.
Попри нїх, на Зонскей смотри у младшим возросту по руски рецитовали и Яна Варґа, Ема Живкович и Иван Планчак, шицки з Керестура, як и Кристина Ковач з Нового Саду. У штреднїм возросту, хтори ше, як и младши, змагали перши дзень, 17. марца, участвовали и Кристина Дюранин и Ясмина Мудри, обидва з Дюрдьова, як и Катарина Недич з Коцура. У старшим возросту, 18. марца, змагала ше и Валентина Салаґ з Дюрдьова.
Рецитаторох обидва днї оценьовал предсидатель жирия Миодраґ Петрович, як и Каталин Фазекаш и Амалия Ковач.
Внєдзелю, 18. марца, смотра почала зоз пригоднима словами и минуту цихосци як здогадованє на длугорочних сотруднїкох, та и на Михайла Зазуляка, хтори остатнї роки бул консултант за руски язик.
Рецитаторох по руски пририхтали Оленка Живкович, Наталия Зазуляк, Ивана Дудаш и Мая Зазуляк Гарди у Керестуре, Яким Гарди, Мария Самарджич и Єлена Салаґ у Дюрдьове, Мелания Римар и Оленка Живкович у Новим Садзе, и Весна Дринчич Дїлас у Коцуре.
Покраїнска смотра рецитаторох будзе отримана у Сечню од 20. по 22. април.
