ПОЧИТОВАНИ ЧИТАЧЕ-НАЩИВИТЕЛЄ САЙТА www.ruskeslovo.com

Пред Вами перше виданє “Руске слово-Плус” котре ше реализує у рамикох проєкта “е-Руске”. Редакция новинох “Руского слова” ище од децембра 2007. року на интернет кладзе комплетне виданє новинох, а од априла того року, з часу на час, вона будзе видавац и окремни боки новинох “Руске слово-Плус”, котри буду мац лєм интернет виданє. То буду змисти котри обширнєйше буду зазначовац даєдни интересантни подїї, котри у друкованих новинох пре огранїчуюци простор нє мож презентовац. У интернет виданю “Руске слово-Плус” акцент будзе давац на фотоґрафиї, а менєй на тексти. Источашнє, будзе то нагода нашим читачом же би тоти боки и сами креїровали.
Поволуєме Вас же бисце у електронскей форми посилали свойо кратки тексти и фотоґрафиї зоз подїйох за котри думаце же су интересантни явно их обявиц. Редакция “Руске слово-Плус” преценї и ушори послати материял и порихта го за интернет виданє. Надпоминаме Вам же войводянски Руснаци єдини у реґионє ма комплетне виданє своїх новинох на интернету, єдини маю дньову информативну аґенцию и єдини почали видавац интернет новини. Припаднїки рускей заєднїци у Войводини маю хвильково найшвидше информованє, та прето потримайце “е-Руске” и предплатце ше на нашо интернет виданє.

Редакция