СЕДЕМНАЦ “РУЖОВО ЗАГРАДКИ”

Автор Андреи Даждию у уводним слове своєй кнїжки визначує же дзекуюци “Ружовей заградки”, фестивалу новей рускей шпиванки компонованей у народним духу, музични скарб Руснацох збогацени за 208 шпиванки. У луксузним и сучасним дизайну котри подписую Мария Гудак за компютерски обробок текстох и Любомир Сопка котри дал ришенє насловного боку, попри шпиванкох и нотних записох зоз 17 “Ружових заградкох” ту и компакт диск на котрим мож чуц шицки интерпретациї композицийох.
У пририхтованю того виданя участвовали Злата Няради, Дюра Дудаш, Славко Орос, Владимир Паланчанин и Владимир Сивч. Редакцию виданя творели Янко Хома, Душан Теофанов, Андреи и Мирослава Даждию, Зденко Обад Щитароци, Агнета Тимко, Михайло Биндас и Микола М. Цап. Рецензент бул Мр Зоран Мулич, лекторка София Николаєвич, а одвичательни редактор виданя Микола Шанта.
Кнїжка “Ружова заградка” 1990-2007, котру друковала “Maxima graf”, ма 295 боки и тварди рамики. Єй друкованє оможлївели Покраїнски секретарият за образованє и културу, Секретарият за предписаня, управу и национални меншини, Радио-телевизия Войводини, Национални совит Руснацох и Народна библиотека Сербиї.

Є. П.