Здраво заградкаре!

Яй, яка радосц! Юний нє вичурел анї до половки, а школа лєм здихує од вистатосци и чека кеди уж раз повилєцуєце з нєй, а нини позамикаю и уходни дзвери.

Цо лєм будземе робиц два и пол мешаци без ученя и поцерпаня яки задатки буду на контролним? Яке глупе питанє, агейце! Знам же нє будзеце азбриґовани як потрошиц цале лєто. Ша, то голєм нє чежко. Мож ше ходзиц купац на беґель або на базен, мож одпутовац аж и на морйо (кед родичи нє видумаю шпоровац на нови авто, на нови цегелки до кухнї або на даяки ормачики до шпайзу...)

Верим же найлєгчейше будзе трошиц лєтнї вечари. Мож ше шпацирац, бавиц ше джмурки, мацуркац ше, слухац музику и “длобац” дп компютерох або мобилних телефонох, а озда будзе и ноцни турнири у малим фодбалу, та рижни културно забавни програми и лєтнї школи.

Лєдво сце ше ментовали домашнїх задаткох, а я вам заш лєм сцем задац цошка, алє наисце нє чежке: раз, голєм раз през лєто кущичко подумайце и на “Заградку”, та напишце писньочку, нарисуйце дацо веселе чи шмишне, або пошлїце поздрав з лєтованя. Септемберске число часописа будзе справене з лєтнїх памяткох.

Бавце ше, одпочивайце, уживайце!

Ваша редактора