НОВИ САД – До конца рока би мал буц обявени компакт-диск Националного оркестру Руснацох, дознава Рутенпрес у Заводзе за културу войводянских Руснацох (ВР), а Завод того року участвує и у проєкту на твореню заєднїцкей вецейязичней театралней представи.
Пририхтованє комапкт-диску Националного оркестру „Музика нас зєдинює” тих дньох при самим концу, а попри двох венчикох руских композицийох, хтори Оркестер виводзел на шветочних академийох з нагоди националного швета Руснацох у Новим Орахове и Вербаше, на диску буду и гимна Сербиї и шветочна шпиванка Руснацох у Сербиї „Браца Русини”, у виводзеню новосадского Хору „Гармоиния”. Початком того мешаца гимна и шветочна шпиванка, з провадзеньом Националного оркестру, зняти у студию Радия Радио-телевизиї Сербиї.
Попри за видаванє спомнутого CD-у, Завод за културу ВР, на основи конкурованя, од Городу Нови Сад достал средства и за витворенє вецейязичней театралней представи „Свадзби” А. П. Чехова.
Праве вчера директор Заводу за културу войводянских Руснацох Серґей Тамаш и Театер младих подписали Контракт о реализациї тей представи у хторей ґлумци ґлумя на своїм мацеринским язику, а будзе витворена у сотруднїцтве зоз заводами вецей националних заєднїцох у Войводини.
Премиєра представи планована 15. януара 2016. року у Малей сали Театру младих у Новим Садзе, а проби водзи ґлумица Сербского народного театру Лидия Стеванович.
