КОЦУР – Вчера, 10. юния, шахисти коцурского „Омладинца“, у дербию кола на домашнїм терену дочекали найвекшого кандидата за уход до Другей шаховскей лиґи, екипу „Лайош Сеґи“ зоз Байши и страцели зоз 4,5:1,5.
Єдину побиду за „Омладинєц“ зазначел Карло Бала, Владимир Лазор ремизовал, а Никола Тадич, Споменко Павичевич, Ґоран Попович и Миряна Шолая свойо партиї страцели .
Шаховски клуб зоз Байши и пред змаганьом бул фаворит, понеже у своїх шорох маю трох ФИДЕ майстрох, та тото пораженє нє мож похопиц як нєсподзиванє.
Прешле коло було и остатнє у першей часци сезони у Войводянскей лиґи Бачка, а „Омладинєц“ ярню часц закончел на одличним другим месце зоз 12 освоєни бодами. Друга часц сезони почнє 9. септембра, а „Омладинєц“ будзе госц екипи у Вербаше.