Наслов: Чом ше качка з воду мачка
Автор: Юлиян Пап
Видаватель: НВУ “Руске слово” Нови Сад
ISBN: 978-86-7105-277-1
Цена:
Мелания Семан: ПРИПОВЕДКИ И ПИСНЬОЧКИ ЗА МЛАДШИ И СТАРШИ ДЗЕЦИ
Приповедки и писньочки Юлияна Папа понукнути у тим рукопису наменєни дзецом предшколского возросту и дзецом нїзших класох основней школи, алє их дзечнє буду читац и векши дзеци.
На основи вельорочного искуства у роботи з предшколскима дзецми – познаюци їх жаданя, потреби и можлївосци розуменя поезиї и прози – можем повесц же способ виражованя Юлияна Папа прилаплїви, розумлїви, лєгки за провадзенє и паметанє, прилагодзени такому возросту дзецох. Тексти єдноставни, похоплїви, праве прето же су вязани за каждодньови живот дзецох. Заступени описи природи и подїйох зоз каждей рочней часци, та их мож хасновац през цали школски рок. Виреченя кратки, стихи ше римую. Зоз каждей приповедки виходзи поука.
На концу даєдних текстох вибрани и потолковани менєй познати слова. То добре, бо нєшкайши дзеци, поготов у тим возросту, нє маю часто нагоди стретац ше зоз старима рускима виразами, а на тот способ их упознаю.
З оглядом на тоти констатациї, оценюєм же вибрани тексти Чом ше качка з воду мачка треба друковац у окремней кнїжки. Зоз ню ше збогаци руска дзецинска литература и значно помогнє у воспитно-образовней роботи з дзецми. Даєдни тексти зоз тей збирки, хтори потераз обявени у “Заградки”, виховательки у Руским Керестуре уж хасновали у роботи зоз предшколскима дзецми.